Buffon បង្ហើបថាអាចលេងដល់អាយុ ៥០ ឆ្នាំ

2018-10-09 13:48:10
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកចាំទី Gianluigi Buffon ក្នុងថ្ងៃនេះ បានបង្ហាញពីភាពមិនច្បាស់លាស់អំពីពេលវេលាដែលខ្លួននឹងចូលនិវត្តន៍ តែបង្ហើបថាអាចលេងដល់អាយុ ៥០ ឆ្នាំ ឲ្យតែបន្តមានឱកាស។

កីឡាករ Buffon បានប្រាប់ទស្សនាវដ្ដី L'Equipe Sport & Style Magazine ថា នៅពេលប៉ុន្មានឆ្នាំចុងក្រោយនេះ ខ្លួនចាប់ផ្ដើមយល់ថា វាគឺជា "កំហុស” បើសិនជាបន្តកំណត់នូវអ្វីដែលខ្លួនអាចធ្វើបាន។ បន្ទាប់មក អ្នកចាំទីអ៊ីតាលី បានលើកឡើងថា តាំងពីចូលអាយុ ៣០ ឆ្នាំមក មានពេលជាច្រើនលើក ដែលខ្លួនបានដាក់កំណត់អាយុចូលនិវត្តន៍ ប៉ុន្តែដោយស្ថានភាពសមប្រកប ខ្លួនក៏បន្តលេងដល់បច្ចុប្បន្ន ទោះជាមានវ័យដល់ទៅ ៤០ ឆ្នាំទៅហើយក្ដី។

អ្នកចាំទី បានបន្ត៖ "ខ្សែជីវិតបានធ្វើឲ្យខ្ញុំអាចបន្តលេងបានដូចសព្វថ្ងៃ។ ដូច្នេះ ខ្ញុំមិនដឹងទេ ហើយក៏មិនចង់ដឹងដែរថា នឹងមានអីកើតឡើងនៅថ្ងៃខាងមុខ។ ខ្ញុំអាចចូលនិវត្តន៍នៅ ៦ ខែ ឬ ១ ឆ្នាំ ឬ ១០ ឆ្នាំទៀត"។

ទោះជាយ៉ាងណា Buffon ក៏បានទទួលស្គាល់ផងដែរថា នៅក្នុងដំណើរជីវិត រឿងខ្លះត្រូវតែកើតឡើងដោយចៀសមិនផុត។

សូមបញ្ជាក់ផងដែរថា Buffon បានចាប់ផ្ដើមលេងឈុតធំឲ្យក្លឹប Parma នៅឆ្នាំ ១៩៩៥ ហើយលេងនៅទីនោះរហូតដល់ឆ្នាំ ២០០១ មុនមកចូលរួមជាមួយ Juventus។ កីឡាករបានបន្តលេងឲ្យក្លឹបយក្សអ៊ីតាលីរហូតដល់ពាក់កណ្ដាលឆ្នាំ ២០១៨។ ក្នុងអំឡុងពេលជាង ១៧ ឆ្នាំនៅ Juventus អ្នកចាំទី Buffon គឺជាវីរបុរសរបស់ក្លឹប។ កីឡាករលេងបាន ៦៥៦ ប្រកួត និងជួយឲ្យក្លឹបឈ្នះពានធំៗជាច្រើន។

កាលពីខែកក្កដា ឆ្នាំ ២០១៨ Buffon បានមកចូលរួមជាមួយក្លឹប PSG។ ទោះជាយ៉ាងណា កន្លងទៅថ្មីៗនេះ អ្នកចាត់ការក្លឹប លោក Thomas Tuchel ធ្លាប់បានលើកឡើងថា តំណែងអ្នកចាំទីដៃទី ១ នៅក្លឹបអាចមិនស្ថិតក្នុងដៃរបស់ Buffon។

គិតមកទល់ពេលនេះ Buffon លេងបាន ៦ ប្រកួតហើយឲ្យក្លឹបបារាំង៕

ប្រភព៖ Goal ប្រែសម្រួល៖ ហ៊ីម រស្មី