ប៊ូតាន់​ត្រូវ​​បាន​គេ​ប្រសិទ្ធិនាម​ថា​ជា​ដែនដី​​ដ៏​មាន​សុភមង្គល​បំផុត​លើ​លោក

  • 2018-10-20 08:33:08
  • ចំនួនមតិ 0 | ចំនួនចែករំលែក 0

ចន្លោះមិនឃើញ


ប្រទេស​ប៊ូតាន់​ត្រូវ​បាន​គេ​ហៅ​ថា​ជា​ទី​កន្លែង​ដែល​មាន​សុភមង្គល​បំផុត​នៅ​លើ​ផែនដី​បន្ទាប់​ពី​ស្តេច​​របស់​ប្រទេស​នេះ​បាន​និយាយ​នៅ​ដើម​ទសវត្ស ១៩៧០ ថា​ប្រទេស​​របស់​ទ្រង់​នឹង​អភិវឌ្ឍ​តែ​ក្នុង​លក្ខខ័ណ្ឌ​ដែល​ធ្វើ​ឱ្យ​ប្រជាជន​សប្បាយ​រីករាយ​ប៉ុណ្ណោះ។

ប៊ូតាន់​​គឺ​ជា​ប្រទេស​តូច​មួយ​មាន​ផ្ទៃ​ដី​ ៣៨ ៣៩៤ គម2 (តូច​​ជាង​កម្ពុជា​ដល់​ទៅ​ជិត​៥​ដង) នៅ​ចន្លោះ​ប្រទេស​មហាយក្ស​២​គឺ​ចិន និង ឥណ្ឌា កៀប​ដូច​សាំងវិច ដោយ​ប្រជាជន​​ជាង ២,៧ ប៊ីលាន ​នាក់​​ (២ ៧០០ លាន​​) របស់​ប្រទេស​​​ដែល​មាន​ប្រជាជន​ច្រើន​បំផុត​លើ​លោក​ទាំង​២​នេះ។ វា​ជា​ដែនដី​ពណ៌​បៃតង ហើយ ៧២% នៃ​ផ្ទៃដី​សរុប​គ្រប​ដណ្ដប់​ទៅ​ដោយ​ព្រៃ​ឈើ។

ប្រទេស​អាស៊ី​ខាង​ត្បូង​មួយ​នេះ កាត់​ផ្ដាច់​ពី​ពិភព​ខាង​ក្រៅ​រហូត​ដល់​សតវត្ស​ទី​២០។ រាជាណាចក្រ​នេះ​ទើប​មាន​ផ្លូវ​ថ្នល់​នៅ​ឆ្នាំ ១៩៦១ ហើយ​និង​ មាន​ទូរទស្សន៍​នៅ​ក្នុង​ឆ្នាំ ១៩៩៩។ នេះ​បើ​តាម ABC News។

អ្នកសារព័ត៌មាន​ជើង​ចាស់​របស់ ABC News របស់​អាមេរិក លោក Bob Woodruff បាន​រៀបរាប់​កាល​ពី​ដើម​ឆ្នាំ​នេះ​​ថា លោក​បាន​​ទៅ​​ទស្សនា​ប្រទេស​ជាង ១២០ នៅ​ជុំវិញ​ពិភពលោក ហើយ ប៊ូតាន់​គឺ​ជា​ប្រទេស​ដ៏​ស្រស់​ស្អាត​បំផុត​ដែល​លោក​មិន​ធ្លាប់​បាន​ឃើញ​ពី​មុន។ វិហារ​ព្រះពុទ្ធសាសនា​ជា​ច្រើន​ដ៏​ធំ​ស្កឹមស្កៃ​ហ៊ុមព័ទ្ធ​ទៅ​ដោយ​កូន​ភ្នំ​បៃតង និង ទន្លេ។ គ្មាន​ឡើយ​ភ្លើង​ចរាចរណ៍​នៅ​ទូទាំង​ប្រទេស ហើយ​មាន​ឡាន​តិច​បំផុត សូម្បី​តែ​នៅ​​ក្នុង​រាជធានី ធីមភូ (Thimphu)។

ភ្ញៀវ​ទេសចរ​មិន​ត្រូវ​បាន​អនុញ្ញាត​ឲ្យ​ដើរ​ក្នុង​ក្រុង ឬ តាម​ភ្នំ​ដោយ​គ្មាន​​​មគ្គុទ្ទេសក៍​ទេសចរ​​​ដើរ​តាម​ឡើយ។ ប៉ុន្តែ​ ប៊ូតាន់​​ ខុស​ពី​កូរ៉េ​ខាងជើង​ត្រង់​របប​ផ្ដាច់​ការ​ព្យុងយ៉ាង ត្រូវ​មាន​​​សន្តិសុខ​ដើរ​តាម​អ្នក​ទេសចរ​ព្រោះ​ហេតុផល​នយោបាយ ប៉ុន្តែ​រាជាណាចក្រ​ប៊ូតាន់ តម្រូវ​ឲ្យ​មាន​មគ្គុទ្ទេសក៍​ដើរ​តាម​អ្នក​ទេសចរ​គ្រប់​ពេលវេលា និង គ្រប់​ទី​កន្លែង ព្រោះ​​ដែនដី​មួយ​នេះ​មិន​ចង់​ឲ្យ​មនុស្ស​មក​ពី​ពិភព​ខាង​ក្រៅ​បំផ្លាញ​វប្បធម៌​ប្រពៃណី​ដ៏​ផូរផង់​របស់​​ពួកគេ ហើយ​​រចនាបថ​ស្ថាបត្យកម្ម​ត្រូវ​បាន​គ្រប់​គ្រង​យ៉ាង​តឹងរ៉ឹង​បំផុត។

ប្រជាជន​ក្នុង​ស្រុក​ត្រូវ​តម្រូវ​ឲ្យ​ស្លៀក​សំលៀកបំពាក់​បែប​ប្រពៃណី​ជា​រៀង​រាល់​ថ្ងៃ ព្រោះ​ប៊ូតាន់​​ជា​កូន​ប្រទេស​តូច​ដែល​មាន​ប្រជាជន​ប្រមាណ​​តែ​ជាង ៨១ ម៉ឺន​ នាក់​​ប៉ុណ្ណោះ ដែល​មិន​ពិបាក​​ក្នុង​ការ​បង្កើត​ច្បាប់ និង ការ​គ្រប់​គ្រង​ប្រជាជន​ក្នុង​ស្រុក​​ឡើយ៕

ប្រភព៖ ABC News   ប្រែ​សម្រួល៖ សុខ លាងហ៊ត