អស់សេចក្តី ស៊ិន ឧត្តមផល្លា ស្រាយមន្ទិលរឿងអតីតតារាសម្ដែង ច័ន្ទ រិទ្ធមេធានី ធ្លាក់ខ្លួនរត់ម៉ូតូកង់បី

2018-10-24 07:21:43
ចំនួនមតិ 0 | ចំនួនចែករំលែក 0

ចន្លោះមិនឃើញ

កន្លងមកសារព័ត៌មានក្នុងស្រុកជាច្រើនបានចុះផ្សាយព្រោងព្រាងអំពីករណីអតីតតារាសម្តែងដ៏ល្បីល្បាញទសវត្សរ៍ ៨០-៩០ លោក ច័ន្ទ រិទ្ធមេធានី ធ្លាក់ខ្លួនរត់ម៉ូតូកង់បីយកប្រាក់ចិញ្ចឹមជីវិត។ ទោះយ៉ាងណាដំណឹងនេះមិនត្រូវបាន សាមីខ្លួនចេញមុខបកស្រាយឡើយ ប្រការនេះធ្វើឲ្យមហាជនហាក់មិនអស់ចិត្តសោះឡើយ។

លោក ច័ន្ទ រិទ្ធមេធានី និងអ្នកនាង អម្ពរ ទេវី

ចម្ងល់នេះត្រូវបាន អ្នកនាង ស៊ិន ឧត្តមផល្លា ដែលជាម្ចាស់ផេក Movie Star research បកស្រាយអស់សេចក្តីថា កំពូលតារាសម្ដែងដ៏ល្បីល្បាញ លោក ច័ន្ទ រិទ្ធមេធានី ពិតជាមានមុខរបររត់កង់បីពិតមែន ដោយសព្វថ្ងៃលោករស់នៅផ្សារក្រមួន ស្ថិតក្នុងសង្កាត់ចាក់អង្រែក្រោម រាជធានីភ្នំពេញ ជាមួយគ្រួសារខាងប្រពន្ធ។ លោកបានឲ្យអ្នកនាង ស៊ិន ឧត្តមផល្លា ដឹងថា កន្លងមកខាងក្រុមហ៊ុនផលិតកុន បានទាក់ទងមកលោក ដើម្បីថតភាពយន្ត ប៉ុន្តែលោកមិនទាន់ចង់ចូលប្រលូកអាជីពចាស់វិញឡើយ ដោយសារតែលោកចង់រស់នៅក្នុងជីវិតសាមញ្ញ។

អ្នកនាង ស៊ិន ឧត្តមផល្លា

ទោះយ៉ាងណា លោកពិតជាមានការនឹករលឹកដល់មិត្តសិល្បកររួមជំនាន់ ដែលធ្លាប់សម្តែងរួមគ្នាដូចជា អ្នកនាង អម្ពរ ទេវី លោក ទេព រិនដារ៉ូ អ្នកនាង នារី រ័ត្នគន្ធា ជាដើម។ លោកថា ធ្លាប់ជាតារាសម្ដែងម្នាក់ លោកពិតជាមានការខ្មាសអៀន ក្រោយពេលដែលលោកក្លាយជាអ្នករត់កង់បី មិនចង់ចេញមុខជួបគេឯងនោះទេ។

លោក ច័ន្ទ រិទ្ធមេធានី ពេលបច្ចុប្បន្ន

ក្រៅពីធ្លាក់ខ្លួនរត់កង់បី អតីតតារាសម្តែងដែលមានទម្រង់មុខដូចតារាបូលីវូដរូបនេះ ក៏មានជំងឺលើសឈាមប្រចាំកាយផងដែរ តែដាច់ខាតលោកមិនលើកដៃសំពះសុំជំនួយពីមហាជនឡើយ នេះក៏ព្រោះតែលោក មិនឲ្យគេមើលងាយតារាជំនាន់មុនដាច់ខាត៕