ឡាន Lexus អត់កញ្ចក់ចំហៀង ចេញតម្លៃលក់នៅជប៉ុនហើយ

2018-10-26 07:15:58
ចំនួនមតិ 0 | ចំនួនចែករំលែក 0

ចន្លោះមិនឃើញ

កាលពីខែកន្លងទៅ Lexus បានបង្ហាញព័ត៌មានទាក់ទងនឹងប្រព័ន្ធកាមេរ៉ាមើលចំហៀងបែបឌីជីថល បំពាក់លើរថយន្តម៉ូដែល ES លក់នៅលើទីផ្សារប្រទេសជប៉ុន។ ប្រព័ន្ធនេះនឹងចូលមកជំនួសកញ្ចក់មើលចំហៀង ដោយមានមុខងារពិសេសៗជាច្រើន។

ប្រព័ន្ធកាមេរ៉ាមើលចំហៀងលើរថយន្ត Lexus ES ម៉ូដែលឆ្នាំ ២០១៩ អាចបង្ហាញរូបភាពដល់អ្នកបើកបរបាន តាមរយៈអេក្រង់ចំនួនពីរទំហំ ៥ អ៊ីញដែលស្ថិតនៅផ្នែកចំហៀងទាំងសងខាង។

Lexus និយាយថាកាមេរ៉ាមើលចំហៀងនេះអាចធន់នឹងទឹកភ្លៀង, អាចបង្ហាញរូបភាពច្បាស់មិនថាស្ថិតក្នុងស្ថានភាពបែបណា, អាចមើលឃើញធំទូលាយលើសពីកញ្ចក់ធម្មតា។ ចំពោះប្រព័ន្ធកាមេរ៉ានេះមានលើ Lexus ES ប្រភេទ Version L ជាប្រភេទ Full Option មានតម្លៃថ្លៃជាងគេ។

លើទីផ្សារប្រទេសជប៉ុនរថយន្ត Lexus ES ស៊េរីថ្មីមានតែជម្រើសម៉ាស៊ីន Hybrid មួយប៉ុណ្ណោះ ដែលផ្សំឡើងដោយម៉ាស៊ីនសាំង ២,៥ លីត្រ ៤ ស៊ីឡាំង អមនឹងម៉ូទ័រអគ្គិសនីមានកម្លាំងសរុប ២០៥ សេះ។ តាមការសាកល្បងរបស់ Lexus រថយន្ត ES 300h នេះអាចបើកបរចម្ងាយ ២៣,៤ គ.ម សម្រាប់ប្រេងសាំង ១ លីត្រ។

តម្លៃរបស់ Lexus ES ស៊េរីថ្មីនៅជប៉ុនមានចាប់ពីប្រមាណ ៥១ ៦៨៦ ដុល្លារសម្រាប់ប្រភេទធម្មតា, តម្លៃ ៥៦ ០៦៩ ដុល្លារសម្រាប់ប្រភេទ F Sport និងតម្លៃ ៦២ ២១៩ ដុល្លារសម្រាប់ប្រភេទ Version L៕