មេ​ដឹកនាំ​អ៊ីស្លាម​ ព្រមាន​បិទ​ PUBG បន្ទាប់​ពី​លេច​លឺប្ដី​ប្រពន្ធ​មួយ​គូ​លែង​គ្នា រឿង​មិន​ព្រម​ប្រគល់​កញ្ចប់​ឈាម​ឲ្យ​គ្នា

  • 2018-10-26 11:28:33
  • ចំនួនមតិ 0 | ចំនួនចែករំលែក 0

ចន្លោះមិនឃើញ

អាជ្ញាធរ​និង​មេដឹកនាំ​សាសនា​អ៊ីស្លាម​បាន​បង្ហាញ​ការ​ព្រួយ​បារម្ភ​ជុំវិញ​ភាព​ងប់ងុល​របស់​ពលរដ្ឋ​ខ្លួន​ក្នុង​ការ​កម្សាន្ត​លេង​ជាមួយ​ហ្គេម PlayerUnknown's Battlegrounds (PUBG) ក្រោម​ហេតុផល​កំពុង​ធ្វើ​ឲ្យ​អ្នក​លេង​ត្រូវ​ខ្ជះខ្ជាយ​ពេលវេលា​ឥត​ប្រយោជន៍។

សព្វថ្ងៃ​កំពុង​ទទួល​បាន​ប្រជាប្រិយភាព​ខ្លាំង​នៅ​តំបន់ Kurdistan ជា​ពិសេស​ក្នុង​ទីក្រុង Sulaymaniyah នៃ​ប៉ែក​ខាង​ជើង​ប្រទេស​អ៊ីរ៉ាក់ មាន​អ្នក​លេង​ស្ថិត​ក្នុង​វ័យ​ជំទង់​ជា​ច្រើន​កំពុង​ញៀន​នឹង​ឥទ្ធិពល​ហ្គេម​បាញ់​ប្រហារ​មួយ​នេះ។ រហូត​មាន​របាយការណ៍​កន្លង​ទៅ​ធ្លាប់​សង្កត់​ធ្ងន់​ថា​គូ​ស្វាមី​ភរិយា​មួយ​គូ​ត្រូវ​បង្ខំ​ចិត្ត​លែងលះ​គ្នា ដោយ​សារ​ខាង​ប្រពន្ធ​បដិសេធ​មិន​ព្រម​ប្រគល់​កញ្ចប់​ឈាម​ឲ្យ​ទៅ​ប្តី​របស់​នាង​អំឡុង​ការ​លេង​ហ្គេម ផ្ទុយ​ទៅ​វិញ​បែរ​ជា​ប្រគល់​ឲ្យ​ទៅ​អ្នក​លេង​ឯ​ទៀត​ដែល​មិន​ស្គាល់​គ្នា។

របាយការណ៍​អវិជ្ជមាន​ជា​ច្រើន​នេះ​ហើយ ក៏​ជំរុញ​ឲ្យ​មេដឹកនាំ​អ៊ីស្លាម​ចេញ​សារ​ត្រៀម​បិទ​ចោល​ហ្គេម PUBG ក្នុង​តំបន់​របស់​ខ្លួន។ លោក Irfan Rasheed គណៈកម្មាធិការ​ដឹកនាំ​ការ​កំណត់​ច្បាប់ (fatwa) ក្នុង​ទីក្រុង Sulaymaniyah បាន​ប្រាប់​សារព័ត៌មាន Rudaw ដូច្នោះ​ថា៖ "យើង​សម្រេច​ធ្វើ​ការ​ពិនិត្យ​លើ​ហ្គេម PUBG ដែល​ជា​ទង្វើ​ក្បត់​នឹង​សាសនា ព្រោះ​កំពុង​នាំ​ឲ្យ​មនុស្ស​ជា​ច្រើន​មាន​ភាព​ងប់ងុល​និង​ត្រូវ​ខ្ជះខ្ជាយ​ពេលវេលា"។

លោក​បន្ត​ទៀត​ថា៖ "ច្បាប់​របស់​អ៊ីស្លាម​ការ​ដែល​ខ្ជះខ្ជាយ​ពេលវេលា​ដោយ​គ្មាន​មូលហេតុ​ជា​ទង្វើ​ដែល​ហាមឃាត់​ដោយ​ព្រះ Allah ខណៈ​ហ្គេម​នេះ​បាន​ធ្វើ​ឲ្យ​ពលរដ្ឋ​នៅ Kurdistan ងប់ងុល​និង​ពុំ​បាន​បង្កើត​ប្រយោជន៍​ណា​មួយ​សម្រាប់​ខ្លួន​និង​អ្នក​នៅ​ជុំវិញ​ពួក​គេ​ឡើយ"។

រំឭក​ថា​ហ្គេម PUBG ជា​ហ្គេម​បែប​បាញ់​ប្រហារ​ដែល​ទម្លាក់​មនុស្ស ១០០ នាក់​ពី​លើ​យន្តហោះ​មក​ចូល​កោះ​មួយ ដើម្បី​ទៅ​រើស​អាវុធ​និង​របស់របរ​ប្រើប្រាស់ ហើយ​បាញ់​ប្រហារ​គ្នា​រហូត​ជម្រុះ​រក​បាន​អ្នក​ខ្លាំង​ចុង​ក្រោយ​មួយ​រូប​ជា​អ្នក​ឈ្នះ ដោយ​បច្ចុប្បន្ន​ក៏​កំពុង​ជាប់​ឈ្មោះ​ជា​ហ្គេម Online ដ៏​ពេញ​និយម​បំផុត​មួយ​ក្នុង​សហគមន៍​ហ្គេម​ទូទាំង​សកលលោក។

ចុច Like និង See First ដើម្បីទទួលព័ត៌មានបច្ចេកវិទ្យាមុនគេ......

អានអត្ថបទ:

ប្រភព៖ Dailymail   ប្រែ​សម្រួល៖ កៅ រក្សា

អត្ថបទពេញនិយម
អត្ថបទថ្មី