"បន្ទប់ជួល" ភាពយន្តខ្នាតខ្លីល្អ ផលិតដោយយុវជនខ្មែរ បានជយលាភីលេខ១ ពី ACF

2018-10-29 03:32:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ខ្សែភាពយន្តខ្នាតខ្លីមានចំណងជើង "បន្ទប់ជួល" របស់ផលិតករវ័យក្មេង អុន ភានិត ទទួលបានជយលាភីលេខ១ ពីការប្រកួតប្រជែងភាពយន្តខ្នាតខ្លី ឆ្នាំ២០១៨ របស់មូលនិធិក្រុមប្រឹក្សាអាជ្ញាកណ្ដាល(ACF) ក្នុងវិស័យការងារនៅកម្ពុជា។

ខ្សែរឿងមានរយៈពេល ៤នាទី ៤៦វិនាទី និយាយពីកម្មកររោងចក្រ ដែលធ្វើការដោយមិនទទួលបានប្រាក់កម្រៃរយៈពេលបីខែ។ ក្រោយមក ពួកគាត់ក៏បានទៅរកដំណោះស្រាយពីក្រសួងការងារ និងក្រុមប្រឹក្សាអាជ្ញាកណ្ដាល ហើយកម្មករទាំងបីនាក់នោះបាន ចូលធ្វើការវិញ។

ក្នុងការប្រកាសជយលាភីនោះ មានភាពយន្តខ្លីចំនួន៥ បានទទួលពានរង្វាន់ ដូចជារឿង "អ្នកណាជួយខ្ញុំ" ទទួលបានរង្វាន់លើកទឹកចិត្តចំនួន ៦០ ម៉ឺនរៀល ។ វីដេអូស្ដីពី "ការចូលរួមចំណែករបស់ក្រុមប្រឹក្សាអាជ្ញាកណ្ដាលក្នុងវិស័យការងារកម្ពុជា" ទទួលបានពានរង្វាន់លើកទឹកចិត្ត ទឹកប្រាក់ ៦០ម៉ឺនរៀល។ រឿង "ខឹងខុសខឹងខាត" ជយលាភីលេខ៣ ចំនួន ២លានរៀល រឿង "សំឡេងវិទ្យុ" ជយលាភីលេខ ២ ទឹកប្រាក់ ២លាន៨០ម៉ឺនរៀល និងរឿង "បន្ទប់ជួល" ជយលាភីលេខ១ ទឹកប្រាក់ ៤លានរៀល។

ការប្រកួតប្រជែងភាពយន្តខ្លីរដូវកាលទី២ ឆ្នាំ២០១៨ មានគោលបំណងលើកកម្ពស់ការយល់ដឹងរបស់សាធារណជនចំពោះយន្តការ ដោះស្រាយវិវាទប្រកបដោយដោយសន្តិវិធី ដើម្បីពង្រឹងទំនាក់ទំនងវិជ្ជាជីវៈ និងរួមចំណែកដល់កំណើនសេដ្ឋកិច្ចជាតិ៕

រូបភាព៖ Chaktomuk Short Film Festval