តិចអត់ដឹង! ហេតុអ្វីបានជាកាមេរ៉ា DSLR អស់ថ្មលឿនម្ល៉េះ?

2018-10-29 03:32:00
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកប្រើប្រាស់កាមេរ៉ា DSLR មួយចំនួនធំច្រើនរអ៊ូថា ម៉ាស៊ីនរបស់ខ្លួនមិនសូវកាន់ថ្ម ថតមិនបានយូរ ឬទុកចោលក៏ស្រកថ្មដែរ។ បញ្ហាទាំងនេះកើតឡើងដោយសារអ្នកថតផ្ទាល់។ ខាងក្រោមនេះជាមូលហេតុទាំង ៧ យ៉ាង ដែលអ្នកថតតែងមិនបានគិតដល់ថាកាមេរ៉ាស៊ីថ្ម៖

១.ទម្លាប់ប្រើ អេក្រង់ LCD

អ្នកថតរូបខ្លះទម្លាប់ប្រើប្រាស់តែអេក្រង់ LCD ជាជាងការថតតាមរយៈ Viewfinder។ ជាធម្មតាការប្រើអេក្រង់ LCD ត្រូវទាមទារថាមពលច្រើន ដោយសារការកម្រិតនៃការជះពន្លឺចេញមក។

អ្នកថតរូបតែងយល់ថា LCD គឺជាបន្ទះអេឡិចត្រូនិក ប្រើអំពូលភ្លើងទាញយកទិន្នន័យ ពីកាមេរ៉ាមកបង្ហាញជារូបភាព។ ដូច្នេះវាត្រូវការប្រើថាមពលអគ្គិសនីច្រើន។ ចំណែក Viewfinder គឺចន្លោះតូចមួយ សម្រាប់ឲ្យអ្នកថតរូប មើលឃើញរូបភាព ដែលឆ្លុះចេញពីបន្ទះកញ្ចក់នៅក្នុងកាមេរ៉ា ដោយមិនបានប្រើថាមពលអគ្គិសនីនោះទេ។

២. Zoom ញឹកញាប់

កុំភ្លេចថា Lens ក៏ត្រូវការថាមពលអគ្គិសនីដែរ។ រាល់ការ Zoom ឬ Focus មិនថាដោយដៃអ្នកថត ឬ Automatic ក៏ដោយ Lens បានទាញថាមពលពីថ្មកាមេរ៉ាមកធ្វើការទាំងអស់។ កាលណាអ្នកថតធ្វើការច្រើនលើ Lens មានដូចជា Zoom ជាដើមនេះ ថ្មកាមេរ៉ាឆាប់អស់ណាស់។ យកល្អអ្នកថតគួរប្ដូរទីតាំងដោយថ្មើរជើងតាមលទ្ធភាព។ ការធ្វើបែបនេះ ក្រៅពីជួយសំចៃថ្ម ក៏ជួយឲ្យជំនាញរបស់អ្នកថតរីកចម្រើន និងទទួលបានប្លង់ប្លែកៗច្រើនដែរ។

៣. ដំណើរការ Flash ស្វ័យប្រវត្តិ (Automatic)

បើថតនៅពេលរាត្រី ការបើក Flash តាមកាលៈទេសៈខ្លះក៏អាចថា អំណោយផលជាងប្រើ ISO។ ផ្ទុយទៅវិញនៅពេលថ្ងៃ បើអ្នកភ្លេចបិទដំណើរការនៃ Flash ក្រៅពីថតធ្វើឲ្យខូចគុណភាពរូប វាក៏អាចធ្វើឲ្យថាមពលថ្មអស់លឿនដែរ។

៤. ដំណើរការមុខងារដែលមិនចាំបាច់ប្រើ

មុខងារខ្លះដូចជា Image Stabilization ប្រសិនអ្នកមាន Tripod នោះ មិនគួរបើកឲ្យដំណើរការឡើយ ហើយសំឡេង Beep ក៏ដូចគ្នា នៅពេលថត ឬដំណើរការចុចលើអេក្រង់ ចាំបាច់ត្រូវបិទ ក៏ដូចជាមុខងារ Wi-Fi អ្នកគួរទម្លាប់បើក តែពេលត្រូវការប្រើប្រាស់បានហើយ។

៥.ទុកកាមេរ៉ាចោលក្នុង Record Mode

ត្រឹមការថតរូបសន្លឹកធម្មតាមិនជាស៊ីថ្មខ្លាំងនោះទេ លើកលែងតែការថតវីដេអូ ហើយអ្វីដែលកាន់តែបង្កបញ្ហា គឺអ្នករមែងច្រឡំទុកកាមេរ៉ាចោលក្នុងសភាព Record Mode ដោយមិនដឹងខ្លួន។ នៅពេលឈប់ថតវីដេអូ អ្នកគួរកាច់គន្លឹះមកកាន់ Photo វិញ ដើម្បីឲ្យកាមេរ៉ា Auto-Sleep ជួយសំចៃថាមពលថ្ម។

៦.អ្នកភ្លេចដំណើរការ Power Saving Mode

ការបើកដំណើរការ Power Saving Mode ជារឿងដែលម្ចាស់កាមេរ៉ាគ្រប់រូប ត្រូវអនុវត្តជាចាំបាច់ ព្រោះមុខងារនេះ អាចជួយបិទកាមេរ៉ាដោយខ្លួនឯង អំឡុងពេលអ្នកទុកចោល ក៏ដូចជាផ្អាកចោលមុខងារមិនប្រើប្រាស់មួយចំនួនផ្សេងទៀត។

៧.ការថតរូបក្នុងទម្រង់ឯកសារ RAW

មិនខុសពីអ្នកជំនាញបានលើកឡើងទេថា រូបភាពទម្រង់ RAW File អាចផ្ដល់នូវសាច់រូបល្អ មិនងាយបែក។ ការជ្រើសរើសយក File RAW នាំឲ្យ Software កាមេរ៉ាធ្វើការខ្លាំងនិងស៊ីថ្ម។ ផ្អែកតាមកាលៈទេសៈ ឧបមាថា អ្នកធ្វើដំណើរកម្សាន្តជាមួយក្រុមគ្រួសារ អ្នកគួរប្ដូរមកប្រើត្រឹម JPEG បានហើយ៕

អានអត្ថបទផ្សេងទៀត

ប្រែសម្រួល៖ ឈិន ធារ៉ាត់