តារាជើងស៊ុត៧រូបនេះមានទាំង វឌ្ឍនាកា ត្រូវគេព្យាករប្រជែងស្បែកជើងមាស AFF
- 2018-11-01 23:18:00
- ចំនួនមតិ 0 | ចំនួនចែករំលែក 0
តារាជើងស៊ុត៧រូបនេះមានទាំង វឌ្ឍនាកា ត្រូវគេព្យាករប្រជែងស្បែកជើងមាស AFF
ចន្លោះមិនឃើញ
នៅសល់តែប៉ុន្មានថ្ងៃទៀតប៉ុណ្ណោះ ព្រឹត្តិការណ៍បាល់ទាត់ធំប្រចាំតំបន់អាស៊ានដែលធ្វើឡើង២ឆ្នាំម្តងគឺ AFF Championship ឆ្នាំ២០១៨នឹងបើកយុទ្ធនាការស្វែងរកពិន្ទុក្នុងពូលដើម្បីស្វែងរកក្រុមឆ្ពោះទៅវគ្គ៤ក្រុមចុងក្រោយហើយ។ មុនការប្រកួតមកដល់មានការព្យាករថា ខ្សែប្រយុទ្ធលេចធ្លោ៧រូបអាចនឹងប្រជែងគ្នាស្វិតស្វាញដើម្បីស្បែកជើងមាសក្នុងនោះក៏មានតារាឆ្នើមកម្ពុជា ចាន់ វឌ្ឍនាកា ផងដែរ។
តាមវិបសាយរបស់ affsuzukicup បានបង្ហាញកីឡាករជាខ្សែប្រយុទ្ធ៧រូបដែលអាចក្លាយជាអ្នករកគ្រាប់បាល់ច្រើនជាងគេដូចខាងក្រោម៖
Adisak Kraisorn៖ ខ្សែប្រយុទ្ធជម្រើសជាតិថៃ
អវត្តមានខ្សែប្រយុទ្ធឆ្នើម Teerasil Dangda ពីក្រុមជម្រើសជាតិក្នុងពានរង្វាន់ឆ្នាំនេះ Kraisorn បានក្លាយជាតួនៃក្តីសង្ឃឹមរកគ្រាប់បាល់របស់ជម្រើសជាតិថៃ។ ពេលថៃឈ្នះពានរង្វាន់មួយនេះកាលពីឆ្នាំ២០១៤ រូបគេក៏រួមចំណែកដ៏សំខាន់ផងដែរក្នុងនោះរូបគេស៊ុត២គ្រាប់។
ចាន់ វឌ្ឍនាកា៖ ខ្សែប្រយុទ្ធជម្រើសជាតិកម្ពុជា
តារាឆ្នើមរបស់ជម្រើសជាតិកម្ពុជា ចាន់ វឌ្ឍនាកា ក៏បានធ្វើឲ្យមានការភ្ញាក់ផ្អើលដែរនៅពេលរូបគេស៊ុតចូល២គ្រាប់លើក្រុមជម្រើសជាតិម៉ាឡេស៊ីកាលពីឆ្នាំ២០១៦ក្នុងពានរង្វាន់មួយនេះ។ ប្រកួតចុងក្រោយមិត្តភាពជាមួយម៉ាឡេស៊ីក៏រូបគេស៊ុតបាន១គ្រាប់ដែរ ដូច្នេះអ្នកព្យាករគិតថា គេអាចក្លាយជាបេក្ខភាពសំខាន់ក្នុងក្នុងតំណែង Top Scorer។
Nguyen Anh Duc៖ ខ្សែប្រយុទ្ធជម្រើសជាតិវៀតណាម
ថ្វីបើវ័យ៣៣ឆ្នាំ ប៉ុន្តែ Nguyen Anh ជាសមាជិកមិនខាងអត់បានរបស់ក្រុមជម្រើសជាតិវៀតណាម។ រូបគេជាអ្នករកគ្រាប់បាល់បានច្រើនជាងគេនៅលីគបាល់ទាត់កំពូលវៀតណាមកាលពីឆ្នាំ២០១៧។ សមាជិករបស់ក្លឹប Becamex Binh Duong រូបនេះស៊ុតបាន៧គ្រាប់ហើយឲ្យក្រុមជម្រើសជាតិវៀតណាមក្នុងការបង្ហាញខ្លួន២៧លើក។
Phil Younghusband៖ ខ្សែប្រយុទ្ធជម្រើសជាតិហ្វីលីពីន
តាមពិតទៅ រូបគេបានក្លាយជាសមាជិកបង្ហាញខ្លួនច្រើនបំផុត និងរកគ្រាប់បាល់នាំមុខគេឲ្យក្រុមជម្រើសជាតិហ្វីលីពីន។ គេចាំថា Younghusband ធ្លាប់រកគ្រាប់បាល់បានក្នុងពានរង្វាន់មួយនេះ៣រដូវកាលជាប់គ្នាគឺឆ្នាំ២០១០ ២០១២ និង២០១៤។ កីឡាកររូបនេះមានកេរ្តិ៍ឈ្មោះល្បីក្នុងនាមជាខ្សែប្រយុទ្ធគ្រោះថ្នាក់ម្នាក់។
Alberto Beto៖ ខ្សែប្រយុទ្ធជម្រើសជាតិឥណ្ឌូណេស៊ី
រូបគេអាចចាត់ទុកថា ជាកីឡាករវ័យចំណាស់ជាងគេក្នុងពានរង្វាន់ប្រចាំអាស៊ានមួយនៅពេលគេឈានដល់វ័យ៣៧ឆ្នាំហើយ ប៉ុន្តែនៅតែជាខ្សែប្រយុទ្ធគ្រោះថ្នាក់ម្នាក់។ កីឡាករឥណ្ឌូណេស៊ីកើតនៅប្រេស៊ីលរូបនេះបានក្លាយជាអ្នករកគ្រាប់បាល់ផ្តល់ភាពរីករាយដល់អ្នកគាំទ្រឥណ្ឌូណេស៊ីស្ទើរមួយទសវត្សហើយ។ កាលពីឆ្នាំ២០១០ រូបគេជាស្ថិតនៅលេខ២ក្នុងនាមជា Top Scorer ក្នុងពានរង្វាន់ AFF Championship នេះ។ ចាំមើលឆ្នាំ២០១៨នេះ រូបគេរកបានប៉ុន្មានគ្រាប់?
Safawi Rasid៖ ខ្សែប្រយុទ្ធជម្រើសជាតិម៉ាឡេស៊ី
គ្រោះកាចរបស់ម៉ាឡេស៊ីលើក្រុមជម្រើសជាតិផ្សេងទៀតអាចមានធាតុផ្សំរបស់ Safawi Rasid។ គេដឹងថា កីឡាកររូបនេះមានលក្ខណៈសម្បត្តិគ្រប់គ្រាន់ក្នុងការរកគ្រាប់បាល់ដែលកើតចេញពីការបង្កើតឱកាសរបស់មិត្តរួមក្រុម។ យ៉ាងណាកីឡាករវ័យ២១ឆ្នាំទើបបង្ហាញខ្លួនឲ្យជម្រើសជាតិបាន៨ដង និងបាន២គ្រាប់។
Aung Thu៖ ខ្សែប្រយុទ្ធជម្រើសជាយិមីយ៉ាន់ម៉ា
កាលពីឆ្នាំ២០១៦ក្នុងពានរង្វាន់នេះ Aung Thu ក៏បង្កព្យះភ្លៀងបង្កើតការចាប់អារម្មណ៍ខ្លាំងដែរ។ រូបគេស៊ុតបាន២គ្រាប់ដែលបានធ្វើឲ្យក្លឹបនៅថៃចាប់អារម្មណ៍ ហើយនាំយកទៅលីគថៃ។ សមាជិកក្លឹប Police Tero រូបនេះរកបាន៨គ្រាប់ឲ្យជម្រើសជាតិពីការបង្ហាញ២៧ដង។ ឆ្នាំនេះគេជឿថា រូបគេនឹងការគ្រោះថ្នាក់ខ្លាំងដល់គូប្រកួត។
ខាងលើគ្រាន់តែជាការលើកឡើងរបស់អ្នកវិភាគប៉ុណ្ណោះ ប៉ុន្តែនៅមានកីឡាករសំខាន់ៗជាច្រើនទៀតដែលជាបេក្ខភាពសំខាន់ផងដែរដូចជាខ្សែប្រយុទ្ធរបស់ជម្រើសជាតិសិង្ហបុរី ឡាវ និងទីម័រខាងកើតជាដើម៕