ជួបផ្ទាល់ទើបដឹងថា Frost Zk សុខចិត្តចោលតំណែងធំ មកបើកម៉ូតូផ្សងព្រេងដើម្បីសេរីភាព

2018-11-02 06:34:46
ចំនួនមតិ 0 | ចំនួនចែករំលែក 0

ចន្លោះមិនឃើញ

ថ្ងៃនេះ Sabay នឹងបើកកកាយជីវប្រវត្តិរបស់អ្នកធ្វើ Vlog ជិះម៉ូតូដំបូងគេរបស់កម្ពុជាលោក Frost Zk ដែលកំពុងទទួលបានភាពល្បីល្បាញ ក្នុងបណ្ដាញសង្គម YouTube។ មុនឈានដល់សាច់រឿងលំអិត អំពីកម្រិតវប្បធម៌ ប្រវត្តិការងារ អាជីពជិះម៉ូតូ និងរឿងផ្សេងៗទៀតនោះ យើងសូមទម្លាយថា ហេតុអ្វីបានជាបុរសសំបូរដោយពុកចង្កា និងពុកមាត់ ដាក់រហស្សនាមខ្លួនឯងថា Frost Zk ។

តាមពិតទៅ Frost ជាឈ្មោះហៅក្រៅ ដែលលោកដាក់ពេលលេង E-Sport កាលពីនៅក្មេង ហើយក៏ជាប់នេះរហូតបច្ចុប្បន្ន ចំណែក Zk មកពី ហ្សាកូ (Zako) ជាឈ្មោះពិតក្នុងបញ្ជីជាតិ ដែលជីតារបស់លោកដាក់ឱ្យ។

តើលោក ហ្សាកូ មានកម្រិតវប្បធម៌កម្រិតណា?

បើតាមរយៈបទសម្ភាសន៍ជាមួយ Sabay កាលពីថ្មីៗនេះ អ្នកកើតនៅទីក្រុងភ្នំពេញ បានបញ្ចប់ការសិក្សានៅវិទ្យាល័យទួលទំពូង។ ក្រោយបញ្ចប់បាក់ឌុប លោកបានបន្តថ្នាក់ឧត្ដមសិក្សា នៅសាកលវិទ្យាល័យបៀលប្រាយ ជំនាញ "ព័ត៌មានវិទ្យា ឬ IT" ក្នុងអំឡុងឆ្នាំ ២០០៨។

ឈប់រៀន ដើរធ្វើការឱ្យគេ

យ៉ាងណាជិវិតជានិស្សិតជំនាញ IT មិនមានរយៈពេលវែងឡើយ ក្រោយធុញទ្រាន់ ហើយលោកបានបញ្ចប់វាគ្មានស្រណោះត្រឹមឆ្នាំទី៣ និងដើរធ្វើការតាមបណ្ដាក្រុមហ៊ុននានា។

ទោះបីជាយ៉ាងណា ដ្បិតឈប់ត្រឹមឆ្នាំទី៣ ប៉ុន្តែលោកក៏មានសញ្ញាប័ត្រភាសាអង់គ្លេស បន្ទាប់ពីបញ្ចប់ការសិក្សានៅសាកលវិទ្យាល័យ បញ្ញាសាស្ត្រ (រៀនបង់លុយ) និងសញ្ញាប័ត្រអាហារូបករណ៍ភាសាអង់គ្លេស ពីវិទ្យាស្ថានអន្តរជាតិអាម៉េរិកាំង (AII) ផងដែរ។ ក្នុងវិទ្យាស្ថាន AII លោកជាសិស្សអង់គ្លេសពូកែម្នាក់ ពោលគឺបានលេខ១ ប្រចាំថ្នាក់សឹងតែរាល់ខែ និងបានចំណាត់ថ្នាក់លេខ២ ពេលប្រឡងសិស្សពូកែប្រចាំសាលា។

អំណោយផលលើភាសាអង់គ្លេស ការបញ្ចេញសំឡេងរបស់លោក ប្រៀបដូចនឹងជនបរទេសដែរ។ មានមនុស្សជាច្រើន បានសួរថា តើលោកជាកូនកាត់បរទេស ឬអាណិកជន? Vlogger ល្បីឈ្មោះ Frost Zk បានប្រាប់ថា នេះក៏ដោយសារតែ លោកមានមិត្តភ័ក្ដិជាជនបរទេសច្រើន ដូច្នេះការបញ្ចេញសំឡេងរបស់លោក ក៏រត់ទោតាមហ្នឹងដែរ។

ធ្វើជាអ្នករៀបចំកម្មវិធី (Event Organizer) នៅក្រុមហ៊ុនបារីធំជាងគេមួយនៅស្រុកខ្មែរ

ការងារធំជាដុំកំភួនរបស់លោក គឺធ្វើជាអ្នករៀបចំកម្មវិធីក្រុមហ៊ុនបារីធំជាងគេមួយនៅស្រុកខ្មែរ ប៉ុន្តែលោកមិនបានចាំថាឆ្នាំណាឡើយ។ មានប្រាក់ខែគ្រប់គ្រាន់ តំណែងធំ ប៉ុន្តែហាក់គ្មានសេរីភាព ដែលនេះជាធម្មតាអ្នកណាក៏ជួបប្រទះ ក្នុងនាមជាបុគ្គលិកក្រុមហ៊ុនឯកជន។ ក្រោមហេតុផលនេះ ហ្សាកូ បានសម្រេចចិត្តឈប់ធ្វើការជាអ្នករៀបចំកម្មវិធីតែម្ដង។ ពេលនេោះលោកបានចាប់ផ្ដើម ធ្វើ Vlog បានប្រហែល៣ឆ្នាំដែរ ប៉ុន្តែមិនទាន់ដើរដូចបច្ចុប្បន្នទេ។

ចាប់ផ្ដើមមាន Main Sponsor លើកដំបូង

ក្រោយឈប់ពីការងារលោកបានបង្ហោះសារមួយលើផេករបស់ខ្លួន ដើម្បីស្វែងរកអ្នកឧបត្ថម្ភនៅពីក្រោយ និងគាំទ្រគម្រោងធ្វើ Volg ជិះម៉ូតូផ្សងព្រេងរបស់លោក។ សំណាងល្អស្រាប់តែមានឯកឧត្ដមម្នាក់ ដែលជាម្ចាស់ក្រុមហ៊ុនប្រេងរំអិល បានឧបត្ថមនិងក្លាយជា Main Sponsor រហូតដល់បច្ចុប្បន្ន ហើយលោកបានក្លាយខ្លួនជា Vlogger ជិះម៉ូតូផ្សងព្រេងដំបូងពេញម៉ោង (Full Time) ចាប់ពីពេលនោះ (ឆ្នាំ២០១៣) រហូតមក។

បន្តបន្ទាប់មកទៀត ក៏មានអ្នកជួយជាសម្ភារ និងទឹកសុទ្ធជាហូរហែ ពេលលោកជិះម៉ូតូផ្សងព្រេងទាំងក្នុង និងក្រៅស្រុក។

ចំពោះប្រាក់ Sponsor វិញ តើលោកយកពីគេប៉ុន្មាន?

ហ្សាកូ ពន្យលថា៖ "មានអ្នកខ្លះគាត់យល់ច្រឡំ ខ្ញុំអត់យកធ្វើអ្នកមានអីទេ គ្រាន់តែយកលុយមួយរួចខ្លួន ទៅឡាវ ឬវៀតណាមប៉ុណ្ណឹង និងលុយមួយរួច ដើម្បីត្រឡប់មកផ្ទះវិញប៉ុណ្ណោះ"។

តើ Frost Zk រកលុយពី YouTube បានប៉ុន្មានក្នុងមួយខែ?

បុរសដែលមានលោកឪពុកជាមន្ត្រីរាជការ និងម្ដាយជាអ្នកជំនួញ បានទម្លាយថា៖ "អ្នកខ្លះគាត់ច្រឡំ និយាយឱ្យអស់ ស្មោះពីចិត្ត បើអ្នកធ្វើ YouTube ស្មោះត្រង់ដូចលោក រកលុយមិនបានពី YouTube ទេ ហើយពេលខ្លះសឹងតែគ្មានលុយបង់ថ្លៃអ៊ីធឺណិត"។

កូនប្រុសច្បង់ក្នុងចំណោមបងប្អូនប្រុស២នាក់ ប្រាប់ថា ក្នុងមួយខែបុរសវ័យ ៣០ ឆ្នាំ អាចរកបានពីបណ្ដាញមួយនេះច្រើនបំផុត ១០០ ដុល្លារ។ ពេលខ្លះលោកចំណាយលុយ ផ្ទាល់ខ្លួនដើម្បី ធ្វើ YouTube ក៏មាន។ លោកមិនរំពឹងលើការរកលុយ តាមវិធីនេះឡើយ។

ក្រៅពីនេះ ប្រភពថវិកាផ្សេងទៀត ដែលលោកយកផ្គត់ផ្គង់ជីវភាពប្រចាំថ្ងៃ គឺបានមកពីការធ្វើគម្រោងឱ្យ Brand ផលិតផលរបស់ក្រុមហ៊ុនផ្សេងៗ។

ធ្វើយ៉ាងម៉េចដើម្បីក្លាយខ្លួនជា Vlogger, Vlogger Full Time និង YouTuber?

បើតាមសម្ដីរបស់លោក Zk ដើម្បីក្លាយខ្លួនជា Vlogger និង YouTuber មួយរូប អ្នកនោះឯងត្រូវមានអន្តសញ្ញាណរបស់ខ្លួន។ ត្រូវដឹងថាខ្លួនឯងជាអ្នកណា អត្តចរិតរបស់ខ្លួនឯងបែបណា? ជាអ្នកណា? កុំក្លែង Fake ឱ្យសោះ!

"១០នាទី វាមានតម្លៃណាស់ ដែលគេមើលយើង ដូច្នេះទាល់តែយើងមានអត្តសញ្ញាណអ្វីមួយ មានចំណុចពិសេសឬ ចំណេះដឹងអ្វីមួយដល់គេ"។

បើចង់ធ្វើ Vlogger ពេញម៉ោង (Full Time) ត្រូវមាន Skill អ្វីមួយ ការងារអ្វីមួយ ដើម្បីរកប្រាក់មកផ្គត់ផ្គង់ជីវភាពខ្លួនឯងបាន ព្រោះបើអត់លុយ យូរទៅក៏គង់តែណាយដូចគ្នា និងបាក់ទឹកចិត្តលែងធ្វើ។

អ្វីជាឧបសគ្គ ពេលធ្វើ Vlog ជិះម៉ូតូផ្សងព្រេង?

ដោយសារជាមនុស្សក្លាហាន ដំណើរផ្សងព្រេងមិនជាបញ្ហាសម្រាប់លោកទេ ប៉ុន្តែ លុយកាក់ ជាឧបសគ្គធំបំផុតរបស់លោក។ បើគ្មានប្រាក់គ្រប់គ្រាន់ ដំណើរផ្សងព្រេងរបស់លោក ក៏មិនអាចដំណើរការបានរលូន។

មួយវីញទៀត គឺខ្លួនលោកផ្ទាល់។ លោកជាមនុស្សមានតណ្ហា ឃ្លានចំណាយផ្លូវ ពេលជិះកាន់តែច្រើន ចម្ងាយផ្លូវរបស់លោកកាន់តែច្រើន។ លោកសន្យាថា នឹងយកទង់ជាតិខ្មែរ បង្ហាញលើទឹកដីបរទេស ឱ្យបានច្រើនតាមតែអាចធ្វើបាន។

ម៉ូតូប្រភេទណា ទើបអាចធ្វើដំណើរកម្សាន្តបែបនេះបាន?

មនុស្សមួយចំនួនតែងថា ពេលជិះម៉ូតូខ្លាចខូចម៉ូតូ តាមផ្លូវអីជាដើម? ចុះបងយល់យ៉ាងណា? លោកថា បើមានការរៀបចំត្រឹមត្រូវ នោះមិនមានបញ្ហាទេ។

តើដំណើរកម្សាន្តរបស់លោក Frost Zk បានផ្ដល់បវ្រយោជន៍អ្វីខ្លះដល់ខ្លួនលោក និងសង្គម?

លោកបេសកកម្មមួយឈ្មោះថា "ម៉ូតូ និងធម្មជាតិ"។ គម្រោងនេះ លោកចង់ឱ្យក្មេងៗជំនាន់ក្រោយ យល់ដឹងស្រលាញ់ បរិស្ថាននិងធម្មជាតិ។ ក្នងវីដេអូប្លុករបស់លោក តែងតែបង្កប់សារអប់រំ អំពីការជួយថែរក្សាសម្បត្តិធម្មជាតិ និងបរិស្ថាន។ Frost Zk ចូលចិត្តដើរលេងកន្លែងធម្មជាតិ ព្រោះធម្មជាតិបានបង្កើតមនុស្ស ឱ្យមានអ្វីៗគ្រប់យ៉ាង មិនមែនមនុស្សមនុស្សបង្កើតធម្មជាតិឡើយ។

តើក្រុមគ្រួសារយល់យ៉ាងណា ពេលលោកឈប់ធ្វើការ ហើយមកធ្វើប្លុកវិញ?

Frost Zk ដែលបានដុះខាត់ខ្លួនឯង កុំឱ្យស្រលាញ់លុយជាធំ និងជាមនុស្សចូលចិត្តរាប់អានមនុស្ស គិតតែលើមិត្តភាព បង្ហើបថា ក្រុមគ្រួសារក៏មានការឆ្ងល់ដែរ ហេតុអ្វីលោកមានតំណែងធំប៉ុណ្ណាប៉ុណ្ណី បែរជាឈប់ធ្វើការ ប៉ុន្តែក្រោយមកក្រុមគ្រួសាររបស់លោក ក៏យល់ជម្រៅចិត្តថាលោកចង់បានអ្វីឱ្យពិតប្រាកដ។

គួរបញ្ជាក់ថាខែក្រោយនេះ ក្រុមម៉ូតូរបស់លោក ហ្សាកូ (មានម៉ូតូតូចៗម៉ាស៊ីន ១២៥សេសេ ដូចជា អាសង់អីជាដើម) នឹងចេញដំណើរទៅលេងប្រទេសឡាវ៕

អានអត្ថបទផ្សេងទៀត

អត្ថបទ៖ អ៊ុំ សុភក្តិ