ច័ន្ទរាជ្យ ស្ថាបនិកក្លឹប CTT សម្លឹងឃើញក្បាច់គុនខ្មែរនឹងភ្លឺស្វាង
- 2018-11-02 23:32:00
- ចំនួនមតិ 0 | ចំនួនចែករំលែក 0
ច័ន្ទរាជ្យ ស្ថាបនិកក្លឹប CTT សម្លឹងឃើញក្បាច់គុនខ្មែរនឹងភ្លឺស្វាង
ចន្លោះមិនឃើញ
លោក ហ៊ុន ច័ន្ទរាជ្យ បានវិលត្រឡប់មកទឹកដីកំណើតវិញកាលឆ្នាំ២០១១ ដោយមានគោលបំណងធំមួយគឺបង្កើតចលនាក្បាច់គុនចម្រុះនៅកម្ពុជា។ ៧ឆ្នាំកន្លងទៅនេះលោក បានខិតខំប្រឹងប្រែងការកសាងទម្រង់មួយដែលជួយកីឡាករខ្មែរថ្មីៗជាច្រើនឲ្យចាប់ផ្តើមរះឡើង។
ក្នុងនាមជាអ្នកដឹកនាំក្លឹបកីឡា Cambodian Top Team និងជាអគ្គលេខាធិការនៃសហព័ន្ធសិល្បៈយុទ្ធគុនចម្រុះដែលទើបបង្កើតជាផ្លូវការកាលពីពេលថ្មីៗនេះ លោកបានផ្សាភ្ជាប់ខ្លួនទៅក្នុងវិស័យក្បាច់គុនខ្មែរដែលជាមូលដ្ឋានពោរពេញដោយអ្នកមានសមត្ថភាព និងទេពសល្យ។កូនសិស្សជាច្រើនដែលហ្វឹកហាត់នៅក្នុងក្លឹបរបស់លោកភាគច្រើនមានកិច្ចសន្យាជាមួយស្ថាប័នប្រដាល់ពិភពលោក ONE Championship។ ពួកគេទទួលបានឱកាសឡើងប្រកួតលើសង្វៀនជុំវិញពិភពលោកហើយបានយកជ័យជម្នះយ៉ាងក្រាស់ក្រែលមកឲ្យកម្ពុជាវិញធ្វើឲ្យពិភពលោកអារម្មណ៍លើកម្ពុជា។
គ្រូ MMA រូបនេះរំលឹកថា ៖«ពេលខ្ញុំមកទីនេះដំបូង ពួកគេមិនស្គាល់ថា ប្រដាល់គុនចម្រុះ MMA ជាអ្វីនោះទេ។ ពិតជាពិបាកណាស់ពេលព្យាយាមប្រាប់ពួកគេថា ក្បាច់គុនចម្រុះគឺជាកីឡា ហើយវាមិនដូចការវ៉ៃតប់គ្នាតាមដងផ្លូវនោះទេ»។
«យើងខំពន្យល់ពួកគេ និងបានបង្រៀនពួកគេពីគុនចម្រុះ MMA ថា តាមពិតវាមានសុវត្ថិភាពជាងកីឡាប្រដាល់ធម្មតា ឬការប្រដាល់គុនខ្មែររបស់យើងទៅទៀត។ និយាយទៅទម្រាំពួកគាត់យល់ត្រូវចំណាយពេលយូរដែរ»។
បច្ចុប្បន្ន ច័ន្ទរាជ មើលឃើញអនាគតដ៏ត្រចះត្រចង់មួយសម្រាប់កីឡាករនៅក្នុងតំបន់ ហើយគិតថាពេលវេលាដ៏អស្ចារ្យបំផុតនោះគឺមិនទាន់មកដល់នៅឡើយទេ។ លោកថា ៖ «អ្នកប្រដាល់ជំនាន់ក្រោយ ប្រហែលជាគ្រាន់បើជាងកីឡាករសព្វថ្ងៃ ទោះឥឡូវពួកគេនៅក្មេង។ ខ្ញុំហៅពួកគេថា កូនពូជអ្នកប្រដាល់គុនចម្រុះ។ នេះហើយជាហេតុផលដែលយើងវិនិយោគពេលវេលា និងលុយកាក់នៅពេលបច្ចុប្បន្នដើម្បីកូនចៅជំនាន់ក្រោយ»។
កីឡាករក្មេងៗជំនាន់ក្រោយមានទេពកោសល្យ និងលក្ខណៈសម្បត្តិដែលលោក ច័ន្ទរាជ ជឿជាក់ថា នឹងធ្វើឲ្យពួកគេអាចឈានជើងចូលសង្វៀនអន្តជាតិធំៗបាន ប៉ុន្តែលោកក៏ចង់ធ្វើយ៉ាងណាឲ្យប្រាកដថា លោកបើកផ្លូវសម្រាប់គ្រប់កីឡាករទទួលបានឱកាស។ ធ្វើជាអ្នកដឹកនាំក្លឹប CTT សំខាន់បំផុតនោះគឺត្រូវបើកចំហផ្លូវក៏ដូចជាឱកាសផ្សេងៗទៀតដល់កីឡាករឲ្យបានគ្រប់គ្នា។
លោកចែករំលែកពីប្រវត្តិសិស្សរបស់ខ្លួនថា ៖«ក្មេងៗទាំងនេះចេញមកពីគ្រួសារក្រីក្រ ពួកគេស្រេកឃ្លានណាស់ ពួកគេនឹងធ្វើអ្វីគ្រប់យ៉ាងដើម្បីជួយខ្លួនឯង និងក្រុមគ្រួសារ។ ពួកគេចង់ឲ្យមានជីវិតប្រសើរជាងនេះ។ យើងឲ្យពួកគេចូលសាលារៀន ផ្តល់ឱកាស និងជម្រើសផ្សេងៗនៅក្នុងជីវិត។
ប្រសិនបើពេលពួកគេធំឡើងមិនចង់ធ្វើជាអ្នកប្រដាល់ MMA ក៏មិនអីដែរ។ ការរៀនសូត្រគឺជាជម្រើសទី១របស់ពួកគេ។ ធ្វើជាអ្នកប្រដាល់អាជីព ឬ ប្រដាល់គុនចម្រុះ MMA គឺគ្រាន់តែក្នុងករណីគាត់រៀនមិនចូល»។
អតីតអ្នករស់នៅក្រុងញូវយ៉ក សហរដ្ឋអាមេរិករូបនេះបានចំណាយពេលវេលាក្នុងជីវិតរបស់ខ្លួនដើម្បីកសាងគ្រួសារអ្នកប្រយុទ្ធខ្មែរមួយក្រុម ហើយដែលកំពុងត្រៀមខ្លួនបង្ហាញសមត្ថភាពលើឆាកប្រដាល់ក្បាច់គុន។ បច្ចុប្បន្ននេះគាត់បានធ្វើដំណើរឆ្ងាយៗទៅក្រៅប្រទេសជាមួយកីឡាករប្រចាំ ONE Championship របស់លោក ហើយធ្វើការប្រកួតប្រជែងលើសង្វៀនដ៏ធំៗជាច្រើនដូចជា ONE: Kingdom of HEROES នៅទីក្រុងបាងកក ប្រទេសថៃជាដើម។
នាថ្ងៃសុក្រ ទី៩ ខែវិច្ឆិកា ឆាប់ៗនេះលោកនឹងធ្វើដំណើរទៅក្រៅប្រទេសទៀតដើម្បីផ្សព្វផ្សាយឲ្យគេស្គាល់ថាអ្វីជាព្រលឹងខ្មែរ។ មាស ម៉ើ ដែលមានប្រវត្តិឈ្នះ៥ដង និងចាញ់២ដងនឹងឈានជើងចូលសង្វៀនប្រដាល់ក្នុងទ្រុងនៅប្រទេសសិង្ហបុរីជាមួយ Anthony Engelenដែលធ្លាប់ឈ្នះ៦ដង ចាញ់៤ដងក្នុងកម្មវិធី ONE: HEART OF THE LION។
លោក ច័ន្ទរាជ្យ សង្ឃឹមថា មិនយូរមិនឆាប់លទ្ធផលដែលលោករំពឹងទុកពីវិស័យកីឡាប្រដាល់គុនចម្រុះនឹងបានសម្រេច ហើយលោកនឹងរំភើបត្រេកអរជាអនេក។ «កម្ពុជាពិតជាអាចឡើងលើឆាកពិភពលោកបាន។ ខ្ញុំទស្សន៍ទាយថា យើងនឹងលេចធ្លោខ្លាំងក្នុងរយៈពេល១០ឆ្នាំខាងមុខទៀត»៕