ក្រៅពីស្អាត និងល្បី តារាកូនកាត់ទាំងនេះក៏មានសំណាងបានគូស្នេហ៍សុទ្ធតែឡូយៗ

2018-11-07 08:55:00
ចំនួនមតិ 0 | ចំនួនចែករំលែក 0

ចន្លោះមិនឃើញ

មិនមែនតែតារាកូរ៉េ និងចិនទេដែលមានសម្រស់លេចធ្លោនាពេលបច្ចុប្បន្ន ប៉ុន្តែបើងាកមកមើលតារាស្រីថៃវិញ ក៏ស្រស់ស្អាតមិនធម្មតាដែរ ពិសេសអ្នកដែលជាកូនកាត់។

ជាក់ស្ដែងតារាស្រីទាំង ៨រូបខាងក្រោមនេះវិញ សុទ្ធសឹងមានសម្រស់ដាច់គេប្រចាំពិភពសិល្បៈ និងជាទីប្រាថ្នារបស់បុរសៗជាច្រើន តែគួរឲ្យស្ដាយអ្នកទាំងនេះមានគូគាប់ប្រចាំចិត្តរួចអស់ហើយ។ ក្រៅពីស៊ីដាច់ខាងសម្ផស្ស អមជាមួយភាពល្បីល្បាញ តារាទាំងកូនកាត់ទាំង ៨នេះក៏មានដៃគូសុទ្ធតែជាអ្នកពូកែយល់ចិត្ត រហូតត្រូវនារីផ្សេងៗលួចច្រណែននឹងសំណាងពួកគេទៀតផង។

១. តារាសម្ដែង Chompoo Araya

តារាស្រីមានឈាមកាត់អាមេរិកនេះ គឺជាតារាថៃដំបូងដែលតែងលេចមុខលើកម្រាលព្រំក្រហមមុនគេ។ តារាស្រីកើតឆ្នាំ ១៩៨១រូបនេះ បានរៀបការជាមួយស្វាមីដែលជាអ្នកមានម្នាក់មកពីត្រកូលអភិជនឈ្មោះ Nott Visrut ហើយបច្ចុប្បន្នមានកូនភ្លោះ ២នាក់គឺ Thunder និង Storm។

២. តារាសម្ដែង Yaya Urassaya

Yaya គឺជាតារាស្រីដែលកើតក្នុងឆ្នាំ ១៩៩៣ និងជាកូនកាត់ថៃណ័រវេស។ ត្បិតមានវ័យក្មេងក៏ពិតមែន ប៉ុន្តែប្រជាប្រិយភាពរបស់នាងពិតជាមានច្រើន មិនចាញ់រៀមច្បងចាស់ៗឡើយ។ បេះដូងរបស់តារាស្រីរូបនេះក៏មិនទំនេរដែរ ព្រោះបច្ចុប្បន្ននាងកំពុងមានទំនាក់ទំនងស្នេហាជាមួយនឹងតារាសម្ដែងជួរមុខដូចគ្នា Nadech Kugimiya។

៣. តារាសម្ដែង Kimmy Kimberley

តារាស្រីកូនកាត់ថៃអាល្លឺម៉ង់រូបនេះកើតក្នុងឆ្នាំ ១៩៩២។ ប្រជាប្រិយភាពរបស់ Kim ក៏មិនខុសពី Yaya ដែរ ព្រោះចំនួនអ្នកគាំទ្រនាងកាន់តែច្រើនឡើងៗ។ នាងគឺជាសង្សារបណ្ដូលចិត្តរបស់តារាសម្ដែង Mark Prin។ ទំនាក់ទំនងស្នេហារបស់ពួកគេតែងធ្វើឲ្យអ្នកគាំទ្រសរសើរមិនដាច់ពីមាត់ពីភាពផ្អែមល្ហែមដែលអ្នកទាំង ២ មានឲ្យគ្នា។

៤. តារាសម្ដែង Bella Ranee

តារាស្រីប្រចាំទូរទស្សន៍ប៉ុស្តិ៍លេខ ៣ថៃ Bella Ranee ក៏ជាតារាស្រីដែលកំពុងសាងកេរ្ត៍ឈ្មោះមិនធម្មតានៅប៉ុន្មានឆ្នាំចុងក្រោយ។ កូនកាត់អាមេរិកកើតក្នុងឆ្នាំ ១៩៨៩ រូបនេះក៏មានម្ចាស់ចិត្តជាតារាសម្ដែងដែរ គឺ Weir Sukollawat។

៥. តារាសម្ដែង Mai Davika

សម្រស់របស់តារាស្រីកូនកាត់ថៃបែលហ្ស៊ិក កើតឆ្នាំ ១៩៩២រូបនេះ កាន់តែលេចធ្លោពីមួយឆ្នាំទៅមួយឆ្នាំ ឯភាពល្បីល្បាញវិញក៏ឡើងស្រឺតៗ។ ភាពល្អស្រស់បែបនេះហើយ មិនខ្វះទេអ្នកចង់បានបេះដូងនាងទៅថ្នមថែ ប៉ុន្តែគួរឲ្យស្ដាយ Mai មានតារាសម្ដែង Ter Chatavit ជាម្ចាស់ស្នេហ៍ទៅហើយ។

៦. តារាសម្ដែង Patricia Tanchanok

Pat គឺជាកូនកាត់អង់គ្លេសថៃ កើតឆ្នាំ ១៩៩៧នេះក៏ក្ដាប់បានតំណែងតួឯកច្រើនរឿងដែរ ជាហេតុធ្វើប្រជាប្រិយភាពរបស់នាងកាន់តែកើនឡើងតាមនោះ។ មិនត្រឹមតែប៉ុណ្ណោះ ស្រីស្អាតថ្ពាល់ខួចនេះ ក៏មានសង្សារជាកូនចៅអ្នកមានទ្រព្យល្បីឈ្មោះប្រចាំប្រទេសថៃដែរ គឺតារាសម្ដែង Pachara Chirathivat។

៧. តារាសម្ដែង Mint Chalida

Mint គឺជាស្រីស្អាតកូនកាត់ ៣សាសន៍ គឺ ឥណ្ឌា ចិន និងថៃដែលកើតឆ្នាំ ១៩៩៣។ នាងក៏ជាប់ឈ្មោះជាតារាជួរមុខរបស់ប៉ុស្តិ៍លេខ ៣ថៃដែរ ឯគូស្នេហ៍របស់នាងគឺជាអ្នកស្នងមរតករបស់រមណីយដ្ឋានសម្រាកលម្ហែល្បី Bonanza Khaoyai។ កាន់តែងាយស្រួលក្នុងការចំណាំ គឺសង្សាររបស់ Mint គឺជាប្អូនប្រុសបង្កើតរបស់តារាសម្ដែង Songkarn Tejanarong មានឈ្មោះថា Pupaa Taechanarong។

៨. តារាសម្ដែង Margie Rasri

តារាស្រីកកើតឆ្នាំ ១៩៩០ កូនកាត់អេស្ប៉ាញ Margie ក៏ជាបុគ្គលល្បីដែលទាក់ចិត្តមហាជនជាច្រើនដែរ តាមរយៈសម្រស់ សមត្ថភាពសម្ដែង និងចរិតគួរឲ្យស្រឡាញ់។ ព្រោះតែឃើញពី ឫកពារបស់ Margie ទើបកម្លោះសង្ហាកូនអ្នកមាន Pok Patsonkorn លង់ស្នេហ៍ដកចិត្តមិនរួចរហូតកាន់ដៃគ្នាចូលរោងការកាលពីខែធ្នូ ឆ្នាំ ២០១៧៕