សេម រ៉កខ័រ ចង់ប្រើតន្ត្រីដើម្បីជាសំឡេងដល់អ្នកមានវិបត្តិផ្លូវចិត្ត

2018-11-14 06:00:00
ចំនួនមតិ 0 | ចំនួនចែករំលែក 0

ចន្លោះមិនឃើញ

បន្ទាប់ពីឆ្លងកាត់ការតស៊ូនិងភាពលំបាករាប់មិនអស់ តារាចម្រៀងចង្វាក់រ៉ក សេម រ៉កខ័រ បានប្ដេជ្ញាប្រើប្រាស់អាជីពជាអ្នកចម្រៀងរបស់ខ្លួនដើម្បីជាសំឡេងនិងសារលើកទឹកចិត្តដល់អ្នកកំពុងតែមានការតស៊ូនិងមានវិបត្តិផ្លូវចិត្តក្នុងជីវិត។

ថ្លែងមកកាន់ Sabay តារាចម្រៀងរ៉ក សេម រ៉កខ័រ ចាប់ផ្ដើមច្រៀងតាំងពីវ័យក្មេងមកម្ល៉េះ ប៉ុន្តែក៏ចាប់ផ្ដើមប្រឡូកក្នុងវិស័យនេះទាំងស្រុងនៅឆ្នាំ ២០១២ ជាអ្នកច្រៀងនាំមុខនៅក្នុងក្រុមចង្វាក់ Heavy Metal ឈ្មោះ "No Forever” អស់រយៈពេល២ឆ្នាំ។ បន្ទាប់មកទើប សេម បានចាកចេញជាក្រុមនិងចាប់ផ្ដើមក្លាយជាតារាចម្រៀងទោល។ ខណៈពេលនោះ សេម ត្រូវបានគេស្គាល់តាមរយៈការច្រៀងបទ "You're The One” សម្រាប់កម្មវិធី "ស្នេហ៍៩" របស់ BBC និងបទមួយទៀតចំណងជើងងា "ឈឺយ៉ាងណាក៏ចាំ" ដែលជាផ្នែកមួយនៃកម្មវិធី "Songkite Season Of Love”។

ក្នុងនាមជាតារាចម្រៀង LGBT ម្នាក់ តារារូបនេះបានបញ្ជាក់ប្រាប់ថា ខ្លួនចង់ប្រើប្រាស់ឱកាសជាអ្នកចម្រៀងនេះ ដើម្បីជួយផ្សព្វផ្សាយក៏ដូចជាសារសំឡេងដល់បណ្ដា អ្នកដែលមានការលំបាកផ្សេងៗក្នុងជីវិត ជាការផ្ដល់កម្លាំងចិត្តគ្រប់បែបយ៉ាងមិនថាជាការ អប់រំ បញ្ហាសង្គមផ្សេងៗ ព្រមទាំងរឿងរ៉ាវស្នេហាផងដែរ។ ជាក់ស្ដែងបទ "កុំឈប់" របស់ សេម គឺផ្ដោតសំខាន់ចំពោះអ្នកមានអាការៈបាក់ទឹកចិត្តតែម្ដង ដោយជំរុញឲ្យពួកគេជម្នះរាល់ការលំបាកនឹងនៅតែមានសង្ឃឹមក្នុងជីវិត។

ជុំវិញការលំបាកផ្សេងៗក្នុងអាជីពនេះ ដោយខ្លួនជាតារាចម្រៀងក្នុងសហគមន៍ LGBT មួយរូប សេម ពិតជាមានការលំបាកខ្លាំង បើគិតប្រៀបធៀបពី ៥ឆ្នាំមុនរហូតដល់ពេលបច្ចុប្បន្ន។ បញ្ហានោះរាប់បញ្ចូលទាំង ស្ទីលនៃតន្ដ្រី ព្រមទាំងមិនមានការគាំទ្រពីសំណាក់មិត្តភ័ក្ដិគ្រួសារ ជាពិសេសក្នុងវិស័យសិល្បៈតែម្ដង។ ទោះជាយ៉ាងណាក៏ដោយ ក៏ម្ចាស់បទ "កុំឈប់" រូបនេះនៅតែបន្តការតស៊ូរបស់ខ្លួន ដោយមានឆន្ទក្នុងចិត្តដូច្នេះថា "បរាជ័យមានច្រើនរាប់មិនអស់ ហើយនៅតែមានអ្នកគាំទ្រ ទោះបីជាមានអ្នកស្អប់ ដូច្នេះត្រូវតែផ្ដោតអារម្មណ៍ជាមួយខ្លួនឯងនិងអ្នកគាំទ្រជាជាងបណ្ដាពួក Haters”។

បើចង់ដឹងកាន់តែច្បាស់ ទស្សនាវីដេអូសម្ភាសន៍ទាំងស្រុងខាងក្រោម៖

អត្ថបទ៖ ធារ៉ូ