Michael Johnson ៖ "ខ្ញុំឈប់រាប់ បន្ទាប់ពីធ្លាក់ការងារ៤២កន្លែង"

2018-11-24 08:05:21
ចំនួនមតិ 0 | ចំនួនចែករំលែក 0

ចន្លោះមិនឃើញ

Michael Johnson អតីតប្រធានក្រុម Derby County ក្រោយបានតែងតាំងជាគ្រូជម្រើសជាតិប្រទេស ហ្គូយ៉ាណា កាលពីខែមិថុនាឆ្នាំ២០១៨នេះ បានរំលឹកទៅដល់ពេលវេលាដ៏ជូរចត់បំផុតក្នុងជីវិត។ លោកបានរៀបរាប់ថា លោកឈប់រាប់ បន្ទាប់ពីលោកធ្លាក់ការងារ៤២កន្លែង។

អតីតកីឡាករ Birmingham City និង Derby County បានប្រាប់ The Guardian ថាក្រោយចូលនិវត្តន៍ពីកីឡាករកាលពីឆ្នាំ២០០៩ លោកចងចាំការសន្ទនាដ៏ជូរចត់ជាមួយ Pharrel កូនប្រុសច្បងក្នុងចំណោមកូនទាំង៣របស់លោក។

"ខ្ញុំតែងតែនិយាយថា៖ ប្រសិនបើអ្នកធ្វើការលំបាកក្នុងជីវិតអ្នកនឹងទទួលបានការតបស្នង"។ កូនប្រុសខ្ញុំនិយាយថា "ប៉ាទៅក្រៅទៀតហើយ?” ខ្ញុំនិយាយថា "ប៉ាចេញទៅកម្មវិធីជួបជុំបង្កើនទំនាក់ទំនង (networking meeting)”។ កូនប្រុសខ្ញុំនិយាយថា "ប៉ុន្តែប៉ាមិនទាន់មានការងារណាមួយនៅឡើយ មែនអត់?” ខ្ញុំនិយាយថា "ទេ ទេ មិនអីចឹងទេ។ ប៉ាជិតមានការងារហើយ"។ កូនប្រុសខ្ញុំនិយាយថា "ប៉ុន្តែ ប៉ាបាននិយាយថា ប្រសិនបើប៉ាបន្ត និង ប្រឹងធ្វើការងារច្រើន ប៉ានឹងទទួលបានការងារដ៏សមរម្យមួយ។ ហេតុអ្វីបានជាប៉ាមិនទាន់មានការងារធ្វើទៀត"?

Johnson បាននិយាយថាលោកបានដាក់ពាក្យធ្វើជាគ្រូបង្វឹក ប៉ុន្តែ CV របស់លោកត្រូវបានបដិសេធ។ លោកមិនចាំថាប៉ុន្មានទេ ព្រោះលោកធ្លាក់ច្រើនកន្លែងពេក។ "ខ្ញុំឈប់រាប់ បន្ទាប់ពីធ្លាក់ការងារ៤២កន្លែង។ ខ្ញុំទទួលបានការឆ្លើយតប៥ទៅ៦ដែរ ហើយខ្ញុំត្រូវបានគេហៅសម្ភាសន៍២កន្លែង ហើយ១ក្នុងចំណោមនោះជាក្លឹបមិនលេងក្នុងលីគទៀត"។

Michael Johnson ពេលកំពុងលេងឲ្យ Birmingham ក្នុងឆ្នាំ១៩៩៧

Johnson បន្ថែមថាលោកត្រូវបន្តភាពអត់ការងារធ្វើរបៀបនេះអស់រយៈពេល៦ទៅ៧ឆ្នាំ។ លោកបានអង្គុយមើលទូរទស្សន៍ពេញៗ១ថ្ងៃ ហើយលោកធ្លាប់បានប្រាប់ខ្លួនឯងថាលោកគួរតែធ្វើអ្វីម្យ៉ាង។ គំនិតនេះបានញ៉ាំងឲ្យលោកចង់បោះបង់ចិត្តធ្វើគ្រូបង្វឹក ហើយងាកទៅចាប់អាជីពជាតៃកុងឡានដឹកទំនិញវិញ។

តែលោកលែងបានធ្វើជាតៃកុងឡាន បន្ទាប់ពីពេលដែលលោកសម្ភាសន៍តាម Skype ជាមួយប្រធានសហព័ន្ធកីឡាបាល់ទាត់ប្រទេសហ្គូយ៉ាណា។ រឿងដ៏ភ្ញាក់ផ្អើលបានកើតឡើង។ Johnson បានប្រាប់ទៅកូនលោកដោយមោទនភាពថា "មើលនែ មើលអ្វីដែលបានកើតឡើងចំពោះប៉ារបស់កូន។ ប្រាកដណាស់ ឧបសគ្គតែងកើតមាននៅលើមាគ៌ានៃការតស៊ូ ប៉ុន្តែកុំបោះបង់ នោះអ្នកនឹងទទួលបានវា"។

ហ្គូយ៉ាណា ប្រទេសស្ថិតនៅទ្វីបអាហ្រ្វិកខាងត្បូងមួយនេះធំជាងកម្ពុជាដល់ទៅជាង១ដង ប៉ុន្តែមានប្រជាជនប្រមាណតែ ៨០ម៉ឺននាក់ប៉ុណ្ណោះ។ យ៉ាងណាក្តី ហ្គូយ៉ាណាមានក្រុមបាល់ទាត់ដែលមានកីឡាករ១០នាក់កំពុងប្រកបអាជីពនៅអង់គ្លេសរួមមាន៖ អ្នកចាំទី Kai McKenzie-Lyle យុវជនរបស់ Liverpool ខ្សែបម្រើ Kadell Daniel របស់ក្លឹប Dover នៅក្របខ័ណ្ឌ National League អង់គ្លេសជាដើម។

Johnson មើលឃើញថាការចូលលេងបាល់នៅវ័យក្មេងរបស់លោក ធ្វើឲ្យលោកមិនបានរៀនសូត្រខ្ពង់ខ្ពស់ រួមផ្សំនឹងការឆាប់ដើរចេញពីអាជីពបាល់ទាត់ បុរសវ័យ៤៧ឆ្នាំរូបនេះជឿថាជាដំណើររប៉ាក់រប៉ើកនៅពេលលោកចង់ក្លាយខ្លួនជាគ្រូបង្វឹក។

ម្ល៉ោះហើយបន្ទាប់ពីនោះ អតីតកីឡាករធ្លាប់ប្រកបអាជីពនៅអង់គ្លេសរូបនេះប្រឹងរៀនដើម្បីបានអាជ្ញាប័ណ្ណគ្រូបង្វឹកបាល់ទាត់អាជីព (Uefa pro licence)។ លោកបានចុះឈ្មោះចូលរៀនអនុបណ្ឌិតផ្នែកកីឡានៅសាកលវិទ្យាល័យ Manchester Metropolitan។

Johnson បន្តថាការក្លាយខ្លួនជាគ្រូបង្វឹកហ្គូយ៉ាណា គឺជាជំហាននៃការផ្លាស់ប្ដូរក្នុងអាជីពរបស់លោក៕

ប្រភព៖ theguardian ប្រែសម្រួល៖ សុខ លាងហ៊ត