ស្លាប់ ២២នាក់និងរបួសច្រើននាក់ ក្រោយផ្ទុះរោងចក្រគីមីនៅភាគខាងជើងប្រទេសចិន

2018-11-28 06:48:20
ចំនួនមតិ 0 | ចំនួនចែករំលែក 0

ចន្លោះមិនឃើញ

យ៉ាងហោចណាស់មនុស្ស ២២នាក់បានស្លាប់ និង២២នាក់ផ្សេងទៀតរងរបួស ក្រោយមានការផ្ទុះមួយនៅរោងចក្រគីមីភាគខាងជើងទីក្រុងប៉េកាំងកាលពីថ្ងៃពុធកន្លងទៅ។

យោងតាមសារព័ត៌មានរដ្ឋឲ្យដឹងថា ហេតុការណ៍នេះកើតឡើងកាលពីវេលាម៉ោង ១២:៤១ព្រឹក (ម៉ោងក្នុងតំបន់) នៅរោងចក្រគីមី Hebei Shenghua បណ្ដាលឲ្យឆេះឡានដឹកទំនិញ ៣៨គ្រឿង និងឡាន ១២គ្រឿងទៀត ខណៈចំហៀងអគារត្រូវបានរោលដោយផ្សេងខ្មៅ។ ប្រភពដដែលបន្ដថា ដើមហេតុដំបូងបង្កឡើងដោយឡានដឹកសារធាតុគីមីគ្រោះថ្នាក់ បានផ្ទុះនៅច្រកចូលរោងចក្ររួចបន្ដឆាបឆេះដល់រថយន្ដផ្សេងទៀតដែលនៅក្បែរនោះ។

ក្រោយពេលកើតហេតុ អ្នកដែលរងរបួសត្រូវបានបញ្ជូនទៅកាន់មន្ទីរពេទ្យក្នុងតំបន់ ខណៈក្រុមសង្គ្រោះបន្ទាន់កំពុងរុករកជនរងគ្រោះផ្សេងទៀត ក៏ដូចជាបន្ដស៊ើបពីមូលហេតុដែលបណ្ដាលឲ្យមានការផ្ទុះនេះឡើង៕