នារីខ្មែរ-អាមេរិក សុវណ្ណាតាំងចិត្តផ្តួលដៃគូឲ្យលឿនបំផុតនៅសង្វៀនONE

2018-11-29 01:53:13
ចំនួនមតិ 0 | ចំនួនចែករំលែក 0

ចន្លោះមិនឃើញ

ឯម សុវណ្ណា ដែលទន្ទឹងរងចាំពេលវេលាជាយូរហើយនោះពេលនេះឈានមកដល់ហើយនៅពេលនាងត្រូវឡើងសង្វៀន ONE Championship នាថ្ងៃសុក្រ ទី៧ ខែធ្នូ ខាងមុខនេះដែលត្រូវជួបកីឡាការិនីអ៊ុយក្រែន Iryna Kyselova នៅទីក្រុងកូឡាឡាំពួរ ប្រទេសម៉ាឡេស៊ី។

កីឡាការិនីខ្មែរ-អាមេរិកវ័យ២៦ឆ្នាំ ឯម សុវណ្ណាបានហ្វឹកហាត់យូរហើយត្រៀមខ្លួនឡើងសង្វៀនក្នុងឆន្ទៈបង្ហាញអ្នកទស្សនាបានឃើញពីសមត្ថភាពរបស់នាងលើឆាកអន្តរជាតិ។ នាងនិយាយថា៖ «ចិត្តនិងកាយ ខ្ញុំត្រៀមរួចរាល់ហើយ។ ខ្ញុំទន្ទឹងចាំតែឲ្យដល់ឆាប់ៗ»។

សុវណ្ណា បានហ្វឹកហាត់ជាមួយគ្រូបង្វឹកផ្ទាល់ខ្លួនយ៉ាងសកម្មដើម្បីត្រៀមយកជ័យជម្នះលើកីឡាការិនីអ៊ុយក្រែនសម្រាប់បង្កើតកំណត់ត្រារបស់ខ្លួនឲ្យបាន។ តាមបទពិសោធ កីឡាការិនីខ្មែរ-អាមេរិករូបនេះធ្លាប់ប្រកួតឈ្នះ២ដង។ ប្រកួតទី១នាងបានផ្ដួលដៃគូឲ្យសន្លប់ដោយប្រើពេល១៨វិនាទីក្នុងទឹកទី១ និងប្រកួតលើកទីប្រើពេល៧៩វិនាទីដើម្បីឲ្យអាជ្ញាកណ្ដាលបញ្ឈប់ក្នុងទឹកទី១។

កីឡាការិនី ឯម សុវណ្ណា (រូបថត៖ Matias Andres)

សម្រាប់ការប្រកួតខាងមុខនេះនាងជឿជាក់លើខ្លួនឯងខ្លាំងដោយសារបានហ្វឹកហាត់ជាមួយលោក Justen Hamilton ដែលគ្រូចំបាប់ជឺជីតស៊ូរបស់ប្រេស៊ីល ជើងឯកខ្សែក្រវាត់នៃកម្មវិធី Fight Science MMA នៅទីក្រុងឡូស អេនជឺឡេស សហរដ្ឋអាមេរិក។

«យើងហាត់ជាមួយគ្នាបានល្អណាស់ ដោយសារគាត់មិនត្រូវបង្ហាត់កីឡាការិនីដទៃទេ អ៊ីចឹងគាត់អាចយកចិត្តទុកដាក់ច្រើនសម្រាប់បង្ហាត់ខ្ញុំ។ ពីរបីខែចុងក្រោយនេះ ខ្ញុំរីកចម្រើនបានច្រើន។ ការប្រកួតមួយនេះ គឺជាឱកាសធំមែនទែន មិនមែនតែសម្រាប់ខ្ញុំម្នាក់ទេ តែក៏សម្រាប់គាត់ដែរ។ ពីរនាក់យើងរំភើបខ្លាំងណាស់»។

ឯម សុវណ្ណា មានជំនឿថា ចំនុចខ្លាំងរបស់ខ្លួនគឺពូកែខាងកណ្តាប់ដៃចំៗ ប៉ុន្តែយ៉ាងណាមិញនាងបានព្យាយាមហ្វឹកហាត់គ្រប់ស្នៀតទាំងការវ៉ៃឈរ និងផ្នែកក្រោម។ កីឡាការិនីខ្មែរ-អាមេរិក ចង់ផ្តួលដៃគូម្នាក់នេះឲ្យបានលឿនដូចដែលនាងធ្លាប់ផ្តួលដៃមុនៗ ប៉ុន្តែនាងសម្លឹងឃើញថា ប៉ះកីឡាករអ៊ុយក្រែនម្នាក់នេះមិនមែនជារឿងងាយស្រួលនោះទេ ពីពោះកីឡាការិនីអ៊ុយក្រែនម្នាក់នេះជាជើងឯក Europe West Fight Champion និងមានកំណត់ត្រាផ្តួលដៃគូបានច្រើន។

កីឡាការិនីខ្មែរ-អាមេរិកបញ្ជាក់ថា ប្រសិនបើស្ថានភាពមិនអាចដូចការរំពឹងទុកទេ នាងនឹងវ៉ៃរហូតដល់ទឹកទី៣។ សុណ្ណាថា ៖«គ្រូបង្វឹកខ្ញុំបានសិក្សាវីដេអូរបស់ដៃគូខ្ញុំ ហើយដឹងរបៀបគេវ៉ៃអស់ហើយ»។

ក្នុងព្រឹត្តិការណ៍ដ៏រំភើបនៃខែចុងឆ្នាំនេះ ក៏មានជើងខ្លាំងគុនខ្មែរ ចាន់ រតនា ត្រូវតទល់នឹងជើងខ្លាំងឥណ្ឌូណេស៊ីដែលមានប្រវត្តិប្រកួតមិនធ្លាប់ចាញ់ឡើយ៕

អត្ថបទ៖ Matias Andres