ចំបាប់បង្ហាញក្ដីរំពឹងខ្ពស់ដណ្ដើមមេដាយស៊ីហ្គេមឆ្នាំក្រោយតែមានការលំបាកមួយ
- 2018-11-29 03:57:45
- ចំនួនមតិ 0 | ចំនួនចែករំលែក 0
ចំបាប់បង្ហាញក្ដីរំពឹងខ្ពស់ដណ្ដើមមេដាយស៊ីហ្គេមឆ្នាំក្រោយតែមានការលំបាកមួយ
ចន្លោះមិនឃើញ
សហព័ន្ធកីឡាចំបាប់កម្ពុជាកំពុងមានទំនុកចិត្តខ្ពស់ក្នុងការប្រជែងមេដាយស៊ីហ្គេមឆ្នាំ២០១៩ នៅហ្វីលីពីន ប៉ុន្តែក្នុងនោះគឺមានការលំបាកមួយ។
ថ្លែងក្នុងពិធីបិទការប្រកួតជ្រើសរើសជើងឯកថ្នាក់ជាតិរបស់សហព័ន្ធកីឡាចំបាប់កម្ពុជាកាលពីម្សិលមិញនេះលោក Cassey Barnet អនុប្រធានសហព័ន្ធមួយនេះបានឲ្យដឹងថា សហព័ន្ធរបស់លោកកំពុងមានក្ដីរំពឹងខ្ពស់ក្នុងការទទួលបានមេដាយពីស៊ីហ្គេមឆ្នាំក្រោយ។ ប៉ុន្តែក្នុងនោះក៏មានចំណុចព្រួយបារម្ភមួយដែរគឺ ដោយសារខ្លាចហ្វីលីពីនមិនដាក់បញ្ចូលប្រភេទវិញ្ញាសាទម្ងន់ធ្ងន់ ដែលជាប្រភេទវិញ្ញាសាមួយកម្ពុជាមានសក្ដានុពល។
មូលហេតុដែលនាំឲ្យលោកមានក្ដីរំពឹងឈ្នះមេដាយពីព្រឹត្តិការណ៍ស៊ីហ្គេមឆ្នាំក្រោយ ពីព្រោះកាលពីពេលថ្មីនេះ សហព័ន្ធរបស់ខ្លួនបានបង្ហាញភាពខ្លាំងក្នុងការប្រកួតជើងឯកអាស៊ីអាគ្នេយ៍ ដោយឈ្នះមេដាយមាស៣គ្រឿង ប្រាក់៤គ្រឿង និងសំរឹទ្ធ៩គ្រឿង។ ចំពោះក្ដីកង្វល់ខាងលើវិញ ប្រសិនបើហ្វីលីពីនមិនដាក់បញ្ចូលមែនលោក នឹងធ្វើការតវ៉ា។
ទាក់ទងការប្រកួតជ្រើសរើសជើងឯកថ្នាក់ជាតិឆ្នាំ២០១៨ វិញលោកមើលឃើញថា មានភាពរីកចម្រើនខ្លាំងពីមួយឆ្នាំទៅមួយឆ្នាំ។ ដោយសារសហព័ន្ធយកចិត្តទុកដាក់បណ្ដុះបណ្ដាលយុវជននៅតាមបណ្ដាខេត្តមួយចំនួនក្នុងប្រទេសកម្ពុជា។
ជាមួយគ្នានោះលោក ធិន វិចិត្រ អគ្គលេខាធិការសហព័ន្ធចំបាប់ក៏បានលើកឡើងពីការខុសប្លែកគ្នាកាលពីឆ្នាំមុនៗរបស់កីឡាករ-កីឡាការិនីមកពីតាមបណ្ដាខេត្តគឺខ្លាំងៗជាងមុនបើទោះកីឡាករ-កីឡាការិនីទាំងនោះមានពេលហ្វឹកហាត់មិនបានគ្រប់គ្រាន់ក្ដី។ ជាងនេះទៅទៀតឆ្នាំនេះមានកីឡាការិនីមកពីខេត្តកំពង់ឆ្នាំងម្នាក់អាចឈ្នះកីឡាការិនីថ្នាលរបស់ជម្រើសជាតិទៀតផង។
លោកបន្ថែមថា នេះជារឿងល្អមែនទែនសម្រាប់សហព័ន្ធ ដោយសារភាពរីកចម្រើនតាមបណ្ដាខេត្ត នឹងធ្វើឲ្យចំបាប់កម្ពុជាបន្តភាពខ្លាំងបានយូរអង្វែងលើឆាកអន្តរជាតិ ពិសេសស៊ីហ្គេមតែម្ដង។
ជាលទ្ធផលសម្រាប់ការប្រកួតជ្រើសរើសជើងឯកថ្នាក់ជាតិកីឡាចំបាប់គឺជយលាភីលេខ១បានទៅក្លឹបក្រសួងសេដ្ឋកិច្ច និងហិរញ្ញវត្ថុដែលទទួលបានមេដាយមាស៦ ប្រាក់៦ សំរឹទ្ធ២ ចំណាត់ថ្នាក់លេខ២បានទៅក្រសួងមហាផ្ទៃមាស ៦ ប្រាក់៥ សំរឹទ្ធ៣ លេខ៣បានទៅបារមីម៉ឺនឯក(ខេត្តកណ្ដាល) មាស៣ ប្រាក់២ សំរឹទ្ធ៤ និងលេខ៤ បានទៅខេត្តព្រៃវែង ប្រាក់ ៤ សំរឹទ្ធ ៥ ៕