ឱកាសល្អ! ពិព័រណ៍យន្តហោះ និងបច្ចេកវិទ្យា បើកឱ្យចូលទស្សនាដោយសេរី

2018-12-01 05:47:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ជាឱកាសល្អមួយសម្រាប់យុវជនខ្មែរ ដែលស្រលាញ់ចូលចិត្តវិស័យបច្ចេកវិទ្យា ព្រោះនាថ្ងៃទី ១៤ ដល់ ១៦ ខែធ្នូ ឆ្នាំ២០១៨ "ពិព័រណ៍យន្តហោះ និងបច្ចេកវិទ្យា" នឹងបើកឱ្យចូលទស្សនាដោយសេរី ដែលធ្វើឡើងនៅមូលដ្ឋានទ័ពអាកាស។

លោក ឈី កុលបុត្រា

យោងតាមលោក ឈី កុលបុត្រា ប្រធានក្រុមដឹកនាំកម្មវិធី ពិព័រណ៍នេះធ្វើឡើងក្នុងគោលបំណង បើកឱ្យយុវជនខ្មែរ មានឧកាសបង្ហាញសមត្ថភាព តាមរយៈការប្រកួតប្រជែង មានឧកាសសិក្សាស្វែងយល់ពីបច្ចេកវិទ្យា យកបទពិសោធល្អៗពីគ្រូបច្ចេកវិទ្យាជំនាញៗ ហើយពួកគេ ក៏អាចបានទស្សនាផលិតផលបច្ចេកវិទ្យាជាច្រើនទៀតដែរ។

លោក កុលបុត្រា បញ្ជាក់ថា៖ “យើងចង់ Inspire យុវជនខ្មែរពីបច្ចេកវិទ្យា និងគ្រឿងយន្តហោះ ការផលិតយន្តហោះ ធ្វើយន្តហោះ ...ចង់ឱ្យពួកគាត់មានឱកាសបង្ហាញទេពកោសល្យរបស់គាត់។ អ្នកខ្លះចេះធ្វើយន្តហោះ តែគាត់អត់មានឱកាសបង្ហាញសមត្ថភាពទេ"។

ក្នុងពិព័រណ៍នេះ មានប្រធានបទប្រកួតប្រជែងធំមួយ គឺ "ការធ្វើយន្តហោះកៅស៊ូ" ដែលមានក្រុមចំនួន ១៣ ចូលរួម ដោយក្នុង១ក្រុមមាន២នាក់។ ការប្រកួតប្រជែងធ្វើយន្តហោះកៅស៊ូ (ហោះបាន) គឺផ្ដោតសំខាន់លើ រយៈកម្ពស់នៃការហោះ រយៈពេលនៃការហោះ ចង្ងាយនៃការហោះ ការឌីហ្សាញ និងការធ្វើបទបង្ហាញ។

ក្រៅពីការប្រកួតប្រជែង អ្នកចូលរួម និងបេក្ខភាពប្រកួតក៏អាចទស្សនាយន្តហោះចំនួន ៨ គ្រឿង (Private Jet & Helicopter) មកពីស្ថាប័នផ្សេងគ្នាដូចជា Heli Star ជាដើម រួមទាំងមាន Work Shop អំពីបច្ចេកវិទ្យាជាច្រើនទៀតផងដែរ។

ពិព័រណ៍រយៈពេលបីថ្ងៃ និងបើឱ្យចូលរួមទស្សនាដោយសេរីនេះ ផ្ដួចផ្ដើមរៀបចំធ្វើឡើងដោយសហភាពសហព័ន្ធយុវជនខេត្តស្វាយរៀង សហការជាមួយ STEM Cambodia និងគាំទ្រដោយក្រសួងអប់រំ យុវជន និងកីឡា៕