មកដឹងតម្លៃ Mitsubishi Triton ស៊េរី ២០១៩ ប្រកាសលក់នៅខ្មែរផ្លូវការ

2018-12-02 04:50:00
ចំនួនមតិ 0 | ចំនួនចែករំលែក 0

ចន្លោះមិនឃើញ

រថយន្តស៊េរីថ្មីរបស់ក្រុមហ៊ុន Mitsubishi Triton ស៊េរី ២០១៩ ប្រភេទ Pick up បានប្រកាសដាក់លក់ជាផ្លូវការនៅលើទីផ្សារកម្ពុជាហើយ។

រថយន្តភីកអាប់ឆ្នាំ ២០១៩ បានផ្លាស់ប្ដូររូបរាងនិងប្រព័ន្ធម៉ាស៊ីនជាច្រើនផ្នែក រួមទាំងប្រព័ន្ធសុវត្ថិភាពថ្មីៗ ដែលផ្ដល់ភាពងាយស្រួលក្នុងការដឹកជញ្ជូន មានបច្ចេកវិទ្យាទំនើបៗ។

ក្រុមហ៊ុន Mitsubishi Motors កម្ពុជាបានឲ្យដឹងថា Triton នេះជារថយន្ត Pickup ស៊េរីចុងក្រោយ ដំណើរការដោយមិនបាច់ប្រើសោ ឬអាចចុចតេឡេនៅលើសោក៏បាន ហើយគ្រាន់តែចុចប៊ូតុងតែមួយប៉ុណ្ណោះដើម្បីបញ្ឆេះរថយន្ត។

Mitsubishi Triton នេះបានបំពាក់ចង្កៀង bi-LED ថ្មី ឯប៉ាណាខាងមុខក៏បានរចនាថ្មីយ៉ាងទាក់ទាញ។ម្យ៉ាងទៀត Pickup នេះភ្ជាប់មកនឹងពោងសុវត្ថិភាពចំនួន ៧ គឺនៅផ្នែកខាងមុខ , ផ្នែកចំហៀង និង មួយទៀតការពារជង្គង់អ្នកបើកបរ ឯទ្វាររថយន្តក៏មានប្រព័ន្ធសុវត្ថិភាពការពារក្មេងៗផងដែរគឺ Auto door relock system និងបានផ្លាស់ពីប្រអប់លេខអូតូ ៥ វគ្គ ប្ដូរមកប្រើប្រអប់លេខអូតូ ៦ វគ្គថ្មី បង្កើនល្បឿនបានលឿន និងមានសន្ទុះខ្លាំង។

រថយន្តនេះមានភ្ជាប់មកនូវប្រព័ន្ធ មុខងារចុះចំណោត (Hill Descent Control) សម្រាប់ទប់កុំឲ្យរអិលថយក្រោយពេលឡើងទីទូលឬភ្នំ និងមានសេនស័រមុខ-ក្រោយសម្រាប់ការចតប្រកបដោយសុវត្ថិភាព។

រថយន្តប្រើប្រព័ន្ធបើកបរប៉ុង ២ (4WD) របស់ Tritonអាចឲ្យអ្នកជ្រើសរើសប្រភេទនៃការបើកបរ Off-road បាន។ វាមានជម្រើសម៉ាស៊ីនចំនួន ២ គឺ ម៉ាស៊ីនម៉ាស៊ូតចំណុះ ២,៥ លីត្រ Turbodiesel ទំហំ ៤ ស៊ីឡាំងបង្កើតកម្លាំងបាន ១០៧ និងម៉ាស៊ីនម៉ាស៊ូតចំណុះ ២,៤ លីត្រ MIVEC Turbodiesel ទំហំ ៤ ស៊ីឡាំងបង្កើតកម្លាំងបាន ១៧៩ សេះ។

ចំណែកការរត់ក្នុងរយៈចម្ងាយផ្លូវរបស់ Trition ប្រើម៉ាស៊ូតនេះគឺ ១០០ គីឡូម៉ែត្រស៊ី ៧ ទៅ ៨ លីត្រលើផ្លូវក្រៅក្រុង បើក្នុងក្រុង ១០០ គីឡូម៉ែត្រស៊ី ១០ ទៅ ១១ លីត្រ។

សម្រាប់តម្លៃ Mitsubishi Triton ២០១៩ លក់លើទីផ្សារគឺ ៤៩.៩០០ ដុល្លារ៕