ចំណុចគួរដឹង ដើម្បីទទួលបានប្រាក់ឧបត្ថម្ភពីប.ស.ស ពេលសម្រាលកូន
- 2018-12-03 07:26:32
- ចំនួនមតិ 0 | ចំនួនចែករំលែក 0
ចំណុចគួរដឹង ដើម្បីទទួលបានប្រាក់ឧបត្ថម្ភពីប.ស.ស ពេលសម្រាលកូន
ចន្លោះមិនឃើញ
បេឡាជាតិរបបសន្តិសុខសង្គមឲ្យដឹងថាខ្លួនបានចំណាយថវិកាជាង៥លានដុល្លារជិតមួយឆ្នាំ២០១៨នេះសម្រាប់បើកជាប្រាក់ឧបត្ថម្ភដល់កម្មការិនីទាំងក្នុង និងក្រៅប្រព័ន្ធក្នុងការសម្រាលកូន។
បេឡាជាតិរបបសន្តិសុខសង្គម ហៅកាត់ថា ប.ស.ស បានសរសេរនៅលើ ទំព័រហ្វេសប៊ុករបស់ខ្លួននៅថ្ងៃនេះថាគិតចាប់ពីថ្ងៃទី១ ខែមករា ដល់ថ្ងៃទី៣ ខែធ្នូ ឆ្នាំ២០១៨ នេះប.ស.ស បានបើកប្រាក់ឧបត្ថម្ភបន្ថែមរបស់រាជរដ្ឋាភិបាលសរុបជាង២៣ពាន់លានរៀល ឬប្រហាក់ប្រហែលនឹង៥,៦លានដុល្លារអាមេរិកដល់កម្មការិនីទាំងក្នុង និងក្រៅប្រព័ន្ធដែលជាសមាជិករបស់ប.ស.ស។ ស្រ្តីសម្រាលកូនស្រុបមានចំនួន៥៨ ៦៩៨នាក់ ក្នុងនោះស្រ្តីមានកូនភ្លោះពីរចំនួន៤២៨នាក់ និងភ្លោះបីចំនួនប្រាំនាក់។
បើតាមប.ស.ស ស្រ្តីសម្រាលកូនម្នាក់បានទទួលប្រាក់ឧបត្ថម្ភចំនួន៤០ម៉ឺនរៀល សម្រាលកូនភ្លោះពីរនាក់ទទួលបានថវិកាចំនួន៨០ម៉ឺនរៀល និងសម្រាលបានកូនភ្លោះបីបានទទួលថវិកាចំនួន១២០ម៉ឺនរៀល និងប្រាក់ឧបត្ថម្ភបន្ថែមពីសម្តេច ហ៊ុន សែន ចំនួន៥លានរៀលបន្ថែមទៀត។
ដើម្បីទទួលបានប្រាក់ឧបត្ថម្ភនេះ ប.ស.ស កម្មការិនីទាំងក្នុងនឹងក្រៅប្រព័ន្ធត្រូវ ទៅបំពេញបែបបទនៅទីស្នាក់ការ ប.ស.ស ទូទាំងរាជធានី ខេត្ត ក្នុងរយៈពេលយ៉ាងយូរ បីខែ មុនពេលសម្រាលកូន ដោយសាមីខ្លួនត្រូវភ្ជាប់ជាមួយនូវលិខិតពិនិត្យផ្ទៃពោះ ដែលបានបញ្ជាក់កាលបរិច្ឆេទត្រូវសម្រាល បណ្ណសមាជិក ប.ស.ស ឬបណ្ណមូលនិធិសមធម៌សុខាភិបាល អត្តសញ្ញាណបណ្ណសញ្ជាតិខ្មែរ និងលេខទូរសព្ទដែលអាចទំនាក់ទំនងបាន។
ក្នុងករណីសាមីខ្លួនមិនបានបំពេញបែបបទនៅ ប.ស.ស ក្នុងរយៈពេលខាងលើ សាមីជន ឬអ្នកតំណាង ត្រូវជូនដំណឹងជាបន្ទាន់មកកាន់ ប.ស.ស យ៉ាងយូរបំផុត ១(មួយ)ខែ ក្រោយថ្ងៃសម្រាលកូន។ សម្រាប់ចំណុចមួយទៀតគឺសាមីខ្លួន ឬសាច់ញ្ញាតិត្រូវជូនដំណឹងមក ប.ស.ស តាមរយៈលេខទូរសព្ទទាក់ទងបន្ទាន់ ១២៨៦ ពេលដែលសម្រាកក្នុងមូលដ្ឋានសុខាភិបាល (មន្ទីរពេទ្យ) ដែលគ្មានភ្នាក់ងារ ប.ស.ស នៅប្រចាំការ៕