កត្តាសំខាន់ៗក្នុងសង្វៀន ONE នៅម៉ាឡេស៊ីថ្ងៃសុក្រនេះ

2018-12-05 04:30:45
ចំនួនមតិ 0 | ចំនួនចែករំលែក 0

ចន្លោះមិនឃើញ

ថ្ងៃសុក្រ ទី៧ ខែធ្នូនេះ ជើងខ្លាំងកម្ពុជា២នាក់នឹងបង្ហាញមុខទៀតលើឆាកក្បាច់គុនអន្តរជាតិ ONE: DESTINY OF CHAMPIONS នៅប្រទេសម៉ាឡេស៊ីគឺ ចាន់ រតនា តទល់នឹងជើងខ្លាំងមិនដែលចាញ់ឥណ្ឌូណេស៊ី ខណៈកីឡាការិនីខ្មែរ-អាមេរិកទើបរះថ្មី ឯម សុវណ្ណារី ប្រឈមនឹងអ្នកលេង ក្បាច់ក្រោមអ៊ុយក្រែន។

សង្វៀនគួរឲ្យទាក់ទាញនៅកីឡដ្ឋាន Axiata Arena ទីក្រុងកូឡាឡាំពួរនឹងកក្រើកដោយដោយអ្នកលេងក្បាច់គុនចម្រុះជាតិសាសន៍១៣គូពាក់មុខយក្សដាក់គ្នាចំពោះអ្នកគាំទ្ររាប់ពាន់នាក់។

ការបង្ហាញខ្លួនរបស់តារាប្រដាល់ទើបរះថ្មី

កីឡាការិនីខ្មែរ-អាមេរិក ឯម សុវណ្ណារី មានឱកាសបញ្ចេញស្នាដៃក្នុងព្រឹត្តិការណ៍របស់ ONE ដែលមិនមែនគ្រប់គ្នាអាចធ្វើបាននោះទេ។ ការប្រកួតមុនៗរបស់នាង គឺនាងបានផ្តួលដៃគូឲ្យសន្លប់ត្រឹមតែ១៨វិនាទីប៉ុណ្ណោះ ហើយឥឡូវនេះនាងនឹងត្រូវប្រឈមមុខនឹងជើង Iryna “Delsa” Kyselova ជាជើងឯកស្រីអ៊ុយក្រែន។

Iryna និង សុវណ្ណារី

អ្នកប្រដាល់ Iryna មានបទពិសោធលើសង្វៀនប្រដាល់ច្រើនជាង សុវណ្ណារី ដល់ទៅ ៦ដង។ យ៉ាងណាមិញកីឡាការិនីខ្មែរ-អាមេរិក ក៏បានត្រៀមស្នៀតស្រេចបាច់ ហើយនាងបានប្រាប់អ្នកគាំទ្រថា៖ «ចិត្តនិងកាយ ខ្ញុំត្រៀមរួចរាល់ហើយ។ ខ្ញុំទន្ទឹងចាំតែដល់ភ្លាមៗ»។

ការទន្ទឹងរង់ចាំយូររបស់ ចាន់ រតនា បានមកដល់ហើយ

តារាប្រដាល់ប្រចាំដួងចិត្តអ្នកគាំទ្រកម្ពុជា ចាន់ រតនា ស្រេកឃ្លានឡើងសង្វៀន ONE យូរមកហើយ។ លើកនេះរូបគេពុះកញ្រ្ជោលជាងពេលណាៗទាំងអស់ក្នុងការបញ្ចេញស្នៀតថ្មីៗដែលខ្លួនបានសំងំហាត់ជាយូរមកហើយ។ អ្នកគាំទ្រទាំងអស់ប្រាកដជាមិនខកបំណងឡើយនៅពេលរូបគេជួបជើងខ្លាំងឥណ្ឌូណេស៊ី Abro Fernandes។

ចាន់ រតនា និង Abro Fernandes

រតនានិយាយថា ៖«ខ្ញុំចង់បង្ហាញអ្វីដែលថ្មីទៅ ONE Championship ឱ្យគេចាប់អារម្មណ៍ ខ្ញុំច្រើនជាងនេះទៀត។ ខ្ញុំប្រកួតមិនសម្រាប់តែខ្លួនឯងទេ ប៉ុន្តែខ្ញុំប្រកួតសម្រាប់អ្នកគាំទ្ររបស់ខ្ញុំទាំងអស់ផងដែរ។ តាមពិតខ្ញុំសប្បាយចិត្តជាង ពេលឃើញអ្នកគាំទ្រខ្ញុំសប្បាយចិត្ត»។

ការប៉ះគ្នារវាងជើងខ្លាំងប្រដាល់សេរីកម្រិតពិភពលោក

គូឯកប្រចាំព្រឹត្តិការណ៍ជាការប៉ះគ្នារវាងជើងខ្លាំងប្រដាល់សេរីកម្រិតពិភពលោករបស់ថៃ Yodsanklai និងអ្នកគុននិយមឆ្លងដែនរបស់អូស្ត្រាលី Luis Regis។

Yodsanklai ដែលជាម្ចាស់ខ្សែក្រវាត់ពិភពលោក Muay Thai World Champion នៅសង្វៀនល្បី Lumpinee និងខ្សែក្រវាត់ជាច្រើនទៀតបានកសាងកេរ្តិ៍ឈ្មោះល្បីរន្ទឺរច្រើនឆ្នាំមកហើយ។ លើកនេះរូបគេប្តេជ្ញាផ្តួលកីឡាករអូស្ត្រាលីឲ្យខាងតែបាន។

ជើងខ្លាំង Regis ដែលមានដើមកំណើតនៅប្រទេសប្រេស៊ីល ប៉ុន្តែរស់នៅប្រទេសអូស្ត្រាលី បានឲ្យដឹងថា ខ្លួនបានដាក់ទាំងចិត្ត និងកាយធ្វើជាអ្នកប្រដាល់រហូតដល់ សព្វថ្ងៃដោយមានគោលដៅតែមួយគត់គឺស្ពាយខ្សែក្រវាត់ពិភពលោក។ តាមពិតទៅរូបគេធ្លាប់ឈ្នះខ្សែក្រវាត់ពិភពលោករួចហើយ។

កីឡាករប្រេស៊ីល-អូស្ត្រាលីនិយាយថា ៖«បើមើលកំណត់ត្រាផ្ទាល់របស់ខ្ញុំ វាមិនច្រើននោះទេ ប៉ុន្តែការឈ្នះទាំង២៥ដងនោះ សុទ្ធតែបានដោយវាយភាគីឲ្យសន្លប់ដល់ដីទាំងអស់។ពេលគេកំពុងឈវ៉ៃតទល់មុខខ្ញុំ បើសិនខ្ញុំចាប់គេជាប់ ខ្ញុំដឹងថា ខ្ញុំអាចបង្ក្រាបគេក្រោមកណ្ដាប់ដៃរបស់ខ្ញុំបាន»។

នេះជាលើកដំបូងហើយដែលសង្វៀន ONE រៀបចំឲ្យមានការប្រកួតប្រដាល់សេរីដណ្ដើមខ្សែក្រវាត់កម្រិតពិភពលោក បន្ទាប់ពីរៀបចំការប្រកួតដណ្តើមខ្សែក្រវាត់ MMA និងប្រដាល់សកលជាបន្តបន្ទាប់មក។ ចាំតាមដានទាំងអស់គ្នាថាតើ នរណាជាម្ចាស់ខ្សែក្រវាត់? ចុះអ្នកលេងគុនខ្មែរអាចបង្កើតកំណត់ត្រាជូនជាតិបានទេ?