ចាន់ រតនា​ ផ្ដល់​មេរៀន​ឲ្យ Fernandes បរាជ័យ​លើក​ដំបូង​ក្នុង​អាជីព(វីដេអូ)

  • 2018-12-07 11:29:45
  • ចំនួនមតិ 0 | ចំនួនចែករំលែក 31

ចន្លោះមិនឃើញ

កីឡាករ​ជើង​ខ្លាំង​របស់​កម្ពុជា​ ចាន់ រតនា​​ បាន​វាយ​យក​ឈ្នះ​​កីឡាករ​ឥណ្ឌូណេស៊ី Abro Fernandes ឲ្យ​ស្គាល់​បរាជ័យ​លើក​ដំបូង​ក្នុង​អាជីព MMA នៅ​មុន​នេះ​បន្តិច។​

កីឡាករ​ទាំង​ពីរ​​វាយ​ក្នុង​កម្មវិធី ONE: Destiny of Champions ដែល​ជា​ព្រឹត្តិការណ៍​ចុង​ក្រោយ​បង្អស់​របស់ One Championship ក្នុង​ឆ្នាំ​២០១៨ រៀបចំ​ក្នុង​ប្រទេស​ម៉ាឡេស៊ី​មាន​​កីឡាករ​ខ្លាំង​ៗ​ជា​ច្រើន​មក​ពី​ប្រទេស​ផ្សេង​ៗចូលរួម​ប្រកួត។

វា​ជា​ការ​ប្រកួត​ដ៏​គួរ​ឲ្យ​ចាប់​អារម្មណ៍​សម្រាប់​កីឡាករ​ទាំង​ពីរ។ នៅ​​ដើម​ទឹក​ទី​១ កីឡាករ​ឥណ្ឌូណេស៊ី បាន​បង្ហាញ​កម្លាំង​ដ៏​ខ្លាំង​ក្លាយ​តាម​រយៈ​ប្រើ​ស្នៀត​ក្រោម​ ចាប់​ផ្តួល​កីឡាករ​កម្ពុជា​ជា​ច្រើន ប៉ុន្តែ​ ចាន់ រតនា ស៊ូ​បាន​ ហើយ​រក​វិធី​ដោះ​ចេញ​ពី​​ការ​អោប​របស់​គេ​បាន​សម្រេច។ ក្រោយ​ពេល​រើ​បម្រះ​រួច រតនា បាន​ប្រើ​បច្ចេកទេស​ប្រដាល់​គុន​ខ្មែរ​គឺ​កណ្តាប់​ដៃ ទាត់​ជើង​ក្រោម និង​ទាត់​ផ្នែក​ខាង​លើ​បាន​យ៉ាង​​ល្អ​រហូត​កីឡាករ​ឥណ្ឌូណេស៊ី​រត់​ថយ​ក្រោយ។

ចំពោះ​ការ​ប្រកួត​នៅ​ទឹក​ទី​២ Abro ដែលមិន​ធ្លាប់​ស្គាល់​បរាជ័យ​សោះ​ក្នុង​អាជីព​របស់​ខ្លួន​នៅ​តែ​បង្ហាញ​ស្នៀត​ក្រោម​ដ៏​គ្រោះ​ថ្នាក់​ថែម​ទៀត។ រូប​គេ​បាន​ចាប់​បោក ចាន់ រតនា និង​ប្រើ​ក្បាច់​ឃ្លេ​រឹត​ក ប៉ុន្តែ​កីឡាករ​កម្ពុជា​រូប​នេះ​ទប់​ទល់​បាន ហើយ​ព្យាយាម​ក្រោក​ឈរ​បាន​សម្រេច។ បន្ទាប់​មក រតនា​ បាន​ប្រើ​កណ្តាប់​ដៃ និង​ទាត់​សន្ធាប់​លើ​កីឡាករឥណ្ឌូណេស៊ី​ជា​ច្រើន​រហូត​ទប់​ទល់លែង​រួច​ធ្វើ​ឲ្យ​អាជ្ញា​កណ្តាល​បញ្ឈប់​ក្នុង​ទី​២​តែ​ម្តង។

ចាន់ រតនា ពេល​ទទួល​បាន​ជ័យជម្នះ

ក្នុង​ការ​ប្រកួត ចាន់ ​រតនា​ ត្បិត​ខកខាន​ប្រកួត​ជាង​១​ឆ្នាំ​ ប៉ុន្តែ​ការ​វិល​ត្រលប់​មក​វិញ​នៅ​តែ​​មិន​បាត់បង់​ស្នៀត ដោយ​វាយ​សន្ធាប់​លើ Fernandes រហូត​ទទួល​បាន​ជ័យជម្នះ។ សម្រាប់​​លទ្ធផល​ពេល​នេះ​គឺ​ជា​ការ​ចាញ់​ក្នុង​អាជីព​ជា​លើក​ដំបូង​របស់ Fernandes ក្នុង​៨​ប្រកួត​កន្លង​ទៅ។ ចំណែក​រតនា​វិញ​បាន​សាង​កំណត់​ត្រា​ខ្លួន​ប្រកួត​៨​ដង ឈ្នះ​៥​និង​ចាញ់​៣។ ​

វីដេអូ ចាន់ រតនា ប្រកួតឈ្នះ

​​


អត្ថបទ៖ ហេង សុធារិទ្ធិ