មេរៀនត្រូវប្រុងប្រយ័ត្ន! ក្មេងស្រី ១៥ ឆ្នាំបានស្លាប់ ក្រោយធ្លាក់ iPhone កំពុងសាកចូលក្នុងអាងទឹក

2018-12-12 12:25:19
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្មេងស្រីវ័យ ១៥ ឆ្នាំ Irina Rybnikova បានស្លាប់បាត់បង់ជីវិតកាលពីថ្ងៃសោរ៍ បន្ទាប់ពីជួបឧប្បត្តិហេតុធ្លាក់ iPhone ដែលនាងកំពុងសាកទៅក្នុងអាងទឹកបន្ទប់ទឹកដោយចៃដន្យ រហូតបណ្ដាលឲ្យនាងឆក់បាត់បង់ជីវិតនៅនឹងកន្លែង។ នេះបើតាមការបង្ហើបប្រាប់ពីក្រុមគ្រួសារដែលមានមូលដ្ឋាននៅទីក្រុង Bratsk ប្រទេសរុស្ស៊ី។

ក្មេងស្រីជំទង់រូបនេះត្រូវបានស្គាល់ជាអ្នកប្រដាល់ដ៏ជំនាញមួយរូបទើបតែឈ្នះជើងឯកកាលពី ២ ខែមុន និងត្រូវបានជ្រើសរើសឲ្យចូលរួមការប្រកួតតំណាងឲ្យប្រទេសទៀតផង។

មិត្តភ័ក្ដិម្នាក់របស់ Irina និយាយថា៖ "នាងមានក្តីស្រមៃចង់ក្លាយជាម្ចាស់ជើងឯក"។ សារពីមិត្តភ័ក្ដិឯទៀតក៏មានការសោកស្ដាយជាខ្លាំងរហូតលាន់មាត់ថា៖ "នាងជាមនុស្សដ៏ល្អម្នាក់ ដែលទទួលបានការស្រលាញ់ពីអ្នករាល់គ្នាខ្លាំងបំផុត ជានិច្ចកាលនាងតែងស្រមៃពីជោគជ័យក្នុងវិស័យកីឡា"។

មើលការលើកឡើងរបស់ Yury Agrafonov ប្រធានផ្នែកវិទ្យុអេឡិចត្រូនិកនៃសកលវិទ្យាល័យ Irkutsk State ក៏ពន្យល់ថា៖ "ទឹកគឺងាយនឹងឆ្លងចរន្តខ្លាំងបំផុត វាជាមូលហេតុបង្កើតឡើងនូវសៀគ្វីខ្លីមួយពេលទូរសព្ទធ្លាក់ចូលទៅក្នុងទឹក ហើយប្រសិនណាទូរសព្ទមិនបានភ្ជាប់ទៅកាន់អគ្គិសនីកម្លាំង ២២០ វ៉ុលទេ ម្ល៉ោះក៏គ្មានសោកនាដកម្មនេះកើតឡើងដែរ"។

រំឭកថានេះពុំមែនជាលើកទីមួយទេ ត្រលប់ទៅខែមិនាឆ្នាំទៅបុរសម្នាក់ឈ្មោះ Richard Bull ក៏ធ្លាប់បានស្លាប់អំឡុងសាកថ្មទូរសព្ទបណ្តើរ ងូតទឹកបណ្តើរ ដោយធ្វើឲ្យមានចរន្តអគ្គិសនីឆ្លងរវាងដុំសាកនិងខ្សែជាមួយទឹក។ នេះបើយោងតាម BBC ធ្លាប់បានចុះផ្សាយ។