Honor V20 ប្រកាសជាផ្លូវការ តម្លៃតែជាង ៤០០ ដុល្លារ កប់ទាំងរាងកម្លាំងក៏ខ្លាំង

2018-12-26 12:35:10
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមហ៊ុន Huawei បានដាក់បង្ហាញជាផ្លូវការនូវស្មាតហ្វូន Honor V20 ក្នុងប្រទេសចិន មុនឆ្ពោះទៅទីផ្សារអន្តរជាតិនាថ្ងៃទី ២២ មករាក្នុងទីក្រុងប៉ារីសប្រទេសបារាំង។

ចំណុចរសើបនៃស្មាតហ្វូនជំនាន់ក្រោយនេះគឺប្រើប្រាស់នូវសំបកខ្នងក្រោយប្រភេទ Nanolithography ដំបូងគេបង្អស់ក្នុងលោក រំលេចឆ្នូងរាងអក្សរ V ផ្លាស់ប្ដូរពណ៌តាមបន្លាស់មុំនៃជ្រុង អាចផ្តល់ប្រយោជន៍ក្នុងការរក្សារចនាបថស្រស់ស្អាតក្នុងរយៈពេលយូរ។ (មានបង្ហាញក្នុងវីដេអូខាងក្រោម)

View 20 នៃត្រកូល Honor ចុងឆ្នាំ ២០១៨ នេះមានស្នាមឆករាងរង្វង់ទុកបង្កប់កាមេរ៉ាមុខនៅផ្នែកចំហៀងខាងឆ្វេង ជាមួយផ្ទៃអេក្រង់ទំហំ ៦,៤ អ៊ីញ LCD 1080p លាតស្មើ ៩១,៨ ភាគរយប្រភេទ FullView Display 3.0 ដ៏ស៊ីវិល័យ។ អមកម្លាំងម៉ាស៊ីនខ្លាំង RAM 6GB/8GB ជាមួយអង្គផ្ទុក 128GB/256GB និងប្រើប្រាស់បន្ទះឈីប Kirin 980។

បង្កប់ដោយមុខងារស្កេនខ្ចៅដៃលើអេក្រង់ ម៉ូឌែលនេះក៏អាចផ្តិតយករូបភាពនូវកាមេរ៉ាមុខទំហំ 25MP ខណៈខាងក្រោយទំហំ 48MP ជាមួយមុខងារ Quad-Bayer អនុញ្ញាតឲ្យផ្លាស់កម្រិតភីកសែលទៅ HDR 12MP សម្រាប់ការថតពេលយប់។

ស្ថិតក្នុងជម្រើស ៣ ពណ៌មានក្រហម ខៀវ ខ្មៅ ដោយជម្រើស 6/128GB តម្លៃ ៤៣៥ ដុល្លារ ខណៈ 8/128GB តម្លៃ ៥១០ ដុល្លារ រីឯនឹងជំនាន់ពិសេស Moschino មាន RAM 8GB និងអង្គផ្ទុក 256GB ថ្លៃ ៥៨០ ដុល្លារ ចាប់លក់ក្នុងទីផ្សារប្រទេសចិននាថ្ងៃទី ២៨ ធ្នូ។