ប្រយោជន៍សុខភាព ៧ យ៉ាងពីការលេងហ្គេមមិនអានមិនដឹងមែន!
- 2014-11-16 19:49:05
- ចំនួនមតិ 0 | ចំនួនចែករំលែក 0
ប្រយោជន៍សុខភាព ៧ យ៉ាងពីការលេងហ្គេមមិនអានមិនដឹងមែន!
ចន្លោះមិនឃើញ
មើលតែចំណងជើងប្រហែលមានការខ្វែងគំនិតខ្លះទៅហើយ ម៉េចបានជាលេងហ្គេមផ្ដល់អត្ថប្រយោជន៍ដល់សុខភាពនោះ។ ជាការពិតណាស់ ឪពុកម្ដាយភាគច្រើនប្រហែលបិទសិទ្ធិកូនៗដោយសារប្រកាន់ទស្សនៈមិន ល្អចំពោះហ្គេម ព្រួយបារម្ភប៉ះពាល់ដល់ពេលវេលា ព្រមទាំងសុខភាពរបស់ក្មេងៗ។ ដោយឡែកការសិក្សានាពេលនេះ បង្ហាញផ្ទុយពីទស្សនៈ ទាំងអស់នេះទៅវិញថា ការលេងហ្គេមគឺជួយបង្កើនសុខភាពនៅពេលអាយុចាស់ទៅ។
ខាងក្រោមនេះ គឺជាលទ្ធផលនៃការសិក្សាពីអត្ថប្រយោជន៍ ៧យ៉ាងបានពីការលេងហ្គេម៖
១. វីដេអូហ្គេមគឺព្យាបាលកុមារដែលមានជំងឺរ៉ាំរ៉ៃ៖ សាកលវិទ្យាល័យអាមេរិក Utah បានបញ្ចេញរបាយការណ៍សិក្សាមួយកាលពីឆ្នាំ ២០១២ ដែលបានពិនិត្យផលប៉ះពាល់នៃការលេងហ្គេមកម្សាន្តជាទៀងទាត់នៅលើកុមារដែលមានជំងឺដូចជា៖ ជំងឺអូធីសឹម (Autism) ដែលជាជំងឺសរសៃប្រសាទធ្វើឱ្យពិបាកប្រាស្រ័យទាក់ទង, ធ្លាក់ទឹកចិត្ត និងជំងឺ Parkinson (ជំងឺមួយដែលសម្គាល់ដោយអាការៈញ័រ, យឺតៗ និងមានភាពរឹងៗ)។ ក្រោយពីសិក្សារួចឃើញថា កុមារដែលបានលេងហ្គេមបែបសិក្សា គឺទទួលបានភាពប្រសើរឡើងនៃជំងឺដែលកើតមាននេះ មិនតែប៉ុណ្ណោះអាចប្រសិនអ្នកមិនទាន់កើត ក៏អាចបង្ការមិនឱ្យកើតមានទៀតផង។ អ្នកស្រាវជ្រាវមានជំនឿថា ហ្គេមមានសមត្ថភាពជួយឱ្យអ្នកលេងមានផ្លូវចិត្តវិជ្ជមានល្អឈានទៅ អភិវឌ្ឍខ្លួន។ ដូច្នេះហើយគេនឹងមានសមត្ថភាព ក្នុងការប្រឈមនឹងជំងឺរ៉ាំរ៉ៃរបស់ពួកគេ។
២. វីដេអូហ្គេមជួយធ្វើឱ្យប្រសើរឡើងនូវជំនាញជិះម៉ូតូ៖ បណ្ដោយឱ្យក្មេងអង្គុយពីមុខ TV ជាមួយឧបករណ៍បញ្ជាហ្គេម (Game Controller) ប្រហែលមិនដូចជាការជិះម៉ូតូពិតៗនោះឡើយ។ ប៉ុន្តែអ្នកស្រាវជ្រាវពីសាកលវិទ្យាល័យ Deakin នៅទីក្រុង Melbourne ប្រទេសអូស្ត្រាលីមិនយល់ស្របឡើយ។
ការសិក្សាបានពិនិត្យលើការរីកចម្រើនលើក្មេងរៀនថ្នាក់មត្តេយ្យ ចំនួន ៥៣នាក់ ដោយបានរកឃើញថា ក្មេងដែលបានលេងហ្គេមពាក់ព័ន្ធការប្រណាំងម៉ូតូគឺពោរពេញដោយជំនាញ ក្នុងការបញ្ជាម៉ូតូជាងក្មេងដែលមិនបានលេង។
៣. វីដេអូហ្គេមកាត់បន្ថយភាពតានតឹង និងការធ្លាក់ទឹកចិត្ត៖
តាមការត្រួតពិនិត្យសុខភាពប្រចាំឆ្នាំ ២០០៩ របស់ព្រឹត្តិបត្រសារព័ត៌មាន Cybertherapy and Telemedicine រួមទាំងការសិក្សាមួយ បានរកឃើញថា អ្នកដែលបានកប់ទុកបញ្ហាសុខភាពផ្លូវចិត្តដូចជាភាពតានតឹង និងការធ្លាក់ទឹកចិត្តអាចរើបម្រាស់ចេញពីក្ដីតប់ប្រមល់ទាំងអស់ នេះ និងធ្វើឱ្យផ្លូវចិត្តប្រសើរឡើងបាន ដោយការលេងហ្គេម។
ការសិក្សាបង្ហាញថា ហ្គេមពិតជាផ្ដល់ផលប្រយោជន៍ពិតមែន ពោលគឺអាចឱ្យគេសម្រាកលំហែជាមួយការលេងហ្គេម បញ្ចៀសការព្យាយាមសម្រាកទាំងភាពតានតឹងក្នុងចិត្ត។
៤. វីដេអូហ្គេមធ្វើឱ្យធូរស្បើយពីការឈឺចុកចាប់ផ្នែករាងកាយ៖ វីដេអូហ្គេមមិនមែនគ្រាន់តែអាចផ្ដល់ភាពធូរស្បើយផ្លូវចិត្ត ប៉ុណ្ណោះទេ តែថែមអាចទាំងអាចជួយឱ្យមនុស្សបានធូរស្បើយពីការឈឺចាប់លើរួប រាងកាយខាងក្រៅទៀតផង។ អ្នកជំនាញផ្នែកចិត្តសាស្ត្រនៅសាកលវិទ្យាល័យវ៉ាស៊ីនតោនបានអភិវឌ្ឍ ហ្គេមដែលអាចជួយដលក់អ្នកជំងឺនៅមន្ទីរពេទ្យពីការឈឺចាប់លើរាងកាយ បានមួយផ្នែក។
ហ្គេមដែលមានលក្ខណៈដូចជាក់ស្ដែងពិតៗឈ្មោះថា “Snow World” ត្រូវបានដាក់ឱ្យអ្នកជំងឺលេង។ មន្ទីរពេទ្យយោធាបានរកឃើញបទពិសោធន៍ថ្មីពីហ្គេមនេះដែលបានជួយ ឱ្យទាហានរងរបួសមានសភាពឆាប់ធូរស្បើយឡើង។ ក្រោយពីបានលេងហ្គេម Snow World នេះឃើញថា ទាហានទាំងនោះបានកាត់បន្ថយការប្រើប្រាស់ថ្នាំបំបាត់ការឈឺចាប់។
៥. វីដេអូហ្គេមអាចកែលំអទស្សនៈវិស័យរបស់អ្នក៖
អ្នកម្ដាយទូទៅប្រហែលជាព្រមានកូនៗដែលអង្គុយមុខកញ្ចក់ទូរសព្ទលេង ហ្គេមថាមិនល្អចំពោះភ្នែក។ ប៉ុន្តែអ្នកជំនាញផ្នែកចិត្តវិទ្យាសម្រាប់ការអភិវឌ្ឍន៍បានរកឃើញ វាពិតជាមានអត្ថប្រយោជន៍ដល់ចក្ខុវិស័យរបស់អ្នក។ លោកបណ្ឌិត Daphen Maurer នៃបន្ទប់ពិសោធន៍សម្រាប់ការអភិវឌ្ឍន៍របស់សាកលវិទ្យាល័យ McMster University បានរកឃើញភាពគួរឱ្យភ្ញាក់ផ្អើលមួយ គឺមនុស្សដែលកើតជំងឺភ្នែកឡើងបាយ អាចមានភាពប្រសើរឡើងនូវទស្សនៈវិស័យរបស់ពួកគេ ដោយការលេងហ្គេមប្រភេទបាញ់ប្រហារ ជាក់ស្ដែងដូចជាហ្គេម Medal of Honor និង Call of Duty។ វាជាប្រភេទហ្គេមដែលតម្រូវឱ្យមានប្រតិកម្មរហ័ស យកចិត្តទុកដាក់ខ្លាំង ដែលនេះនឹងនាំឱ្យខួរក្បាលមានភាពរហ័សរហួនគិតបានម៉ត់ចត់។
៦. វីដេអូហ្គេមធ្វើឱ្យប្រសើរឡើងនូវជំនាញ៖
ភាគច្រើននៃវីដេអូហ្គេមតម្រូវឱ្យអ្នកលេងមានប្រតិកម្មរហ័ស និងការសម្រេចចិត្តរហ័ស។ សាកលវិទ្យាល័យរោគប្រសាទ Rocherster នៅញូវយ៉កបានរកឃើញ វីដេអូហ្គេមធ្វើឱ្យខួរក្បាលអ្នកលេងមានប្រតិកម្មរហ័សក្នុងការ សម្រេចចិត្តនៅក្នុងពិភពពិត។
៧. វីដេអូហ្គេមរក្សាឱ្យអ្នកសប្បាយរីករាយក្នុងវ័យចំណាស់៖ អ្នកស្រាវជ្រាវមកពីសាកលវិទ្យាល័យ North Carolina State បានឱ្យដឹងថា មនុស្សវ័យចាស់ដែលបានលេងហ្គេម គឺទទួលបានអារម្មណ៍សប្បាយចិត្ត ផ្ទុយគ្នានឹងក្រុមមនុស្សចាស់ដែលមិនបានលេងហ្គេម។ អ្នកដែលមិនបានលេងហ្គេម ត្រូវបានរាយការណ៍មកថា អ្នកទាំងនោះភាគច្រើនមានអារម្មណ៍អវិជ្ជមានច្រើន រហូតកើតចេញនូវភាពក្រៀមក្រំខ្លាំងទៀតផង។
នាឱកាសពិព័រណ៍ព័ត៌មាន បច្ចេកវិទ្យា និងទូរគមនាគមន៍ ITET រយៈពេល ៣ ថ្ងៃ នៅសាលពិព័រណ៍កោះពេជ្រ Sabay បានរៀបចំស្តង់ដ៏ធំដើម្បីស្វាគមន៍ប្រិយមិត្តដែលចង់សាកល្បងលេងសេវាកម្សាន្តរបស់ Sabay។ ប្រិយមិត្តដែលចាប់អារម្មណ៍ អាចមកទទួលយកភាពសប្បាយរីករាយសម្រាប់ការកម្សាន្តសេវាកម្សាន្តរបស់ Sabay នៅឆាកដ៏ធំនៅពិព័រណ៍ ITET 2014 និងដែលអាចឱកាសឈ្នះរង្វាន់ថែមទៀតផង។
ដោយ៖ ឈុន ហួរ ប្រភព៖ Theweek
© រក្សាសិទ្ធិគ្រប់យ៉ាងដោយ Sabay ឆ្នាំ២០២៤
គោលការណ៍ភាពឯកជន | Privacy Policy
អាសយដ្ឋាន
អគារលេខ ៣០៨ មហាវិថីព្រះមុន្នីវង្ស
សង្កាត់បឹងរាំង ខណ្ឌដូនពេញ
Sabay Digital Corporation ជាក្រុមហ៊ុនព័ត៌មានឌីជីថល និងកម្សាន្តឈានមុខគេនៅកម្ពុជា។ ព័ត៌មានបន្ថែម
ផលិតផល និង សេវាកម្ម របស់ Sabay
