Apple MacBook Air 2018 ជា​កុំព្យូទ័រ​យួរ​ដៃ​ថ្មី​សន្លាង​របស់ Apple ​នៅ​ក្នុង​ត្រកូល Air ដែល​ខាន​លេច​មុខ​ចេញ​រាប់​ឆ្នាំ​មក​ហើយ​នោះ។ ប៉ុន្តែ ការ​ចេញ​មក​លើក​នេះ​របស់​ MacBook Air ក្រុមហ៊ុន​ផ្លែប៉ោម​របស់​អាមេរិក​នេះ ដាក់​តម្លៃ​ចាប់​ផ្ដើម​រហូត​ដល់ ១ ២០០ ដុល្លារ​អាមេរិក (តម្លៃ​លើ​ទីផ្សារ​បរទេស) ឯណោះ ជា​ហេតុ​ធ្វើ​ឲ្យ​វា​មាន​តម្លៃ​ប្រហាក់​ប្រហែល​នឹង MacBook Pro ១៣ អ៊ីញ​ស៊េរី​ទាប​បំផុត​ក្នុង​ត្រកូល MacBook Pro បាត់​ទៅ​ហើយ​ ដោយ​វា​មាន​តម្លៃ ១ ៣០០ ដុល្លារ​អាមេរិក​ ជា​តម្លៃ​ចាប់​ផ្ដើម។

ដោយ​ហេតុ​តែ​តម្លៃ​ខុស​គ្នា​ត្រឹម ១០០ ដុល្លារ​ដូច្នេះ មាន​អ្នក​ចង់​ដឹង​ថា​តើ គួរ​ជ្រើស​យក MacBook Pro ១៣ អ៊ីញ ឬ​ក៏ MacBook Air ស៊េរី​ថ្មី​ឆ្នាំ ២០១៨ នេះ។ ដោយ​យល់​ឃើញ​ថា MacBook Pro ជា​ប្រភេទ laptop ដែល​មាន​គុណសម្បត្តិ​ច្រើន​ជាង MacBook Air ដូចនេះ Sabay សូម​បង្ហាញ​នូវ​ចំណុច ៤ យ៉ាង​ដែល​ប្រិយមិត្ត​គួរ​ជ្រើស​យក Macbook Pro ១៣ អ៊ីញ​ស៊េរី​ទាប​បំផុត ជា​ជាង MacBook Air៖

១. MacBook Air ឆ្នាំ ២០១៨ មិន​ស្រាល​ជាង MacBook Pro ១៣ អ៊ីញ​ប៉ុន្មាន​ឡើយ

ភាគ​ច្រើន ប្រិយមិត្ត​ដែល​ចង់​បាន MacBook Air ក៏​ដោយ​សារ​តែ​ទម្ងន់​ដ៏​ស្រាល​របស់​វា​ដែល​ងាយ​យក​តាម​ខ្លួន។ តាម​ពិត​ទៅ MacBook Air មាន​ទម្ងន់ ១,២៤ គ.ក ចំណែក​ឯ​ MacBook Pro មាន​ទម្ងន់​ប្រមាណ ១,៣៦ គ.ក ខុស​គ្នា​តែ​ជាង​មួយ​ខាំ​ប៉ុណ្ណោះ។

២. MacBook Air មាន​កម្រាស់​ក្រាស់​ជាង MacBook Pro ទៅ​ទៀត​នៅ​ផ្នែក​ក្រាស់​របស់​វា

អ្នក​ប្រើប្រាស់​ភាគ​ច្រើន​យល់​ថា MacBook Air មាន​តួ​ខ្លួន​ស្ដើង បើ​ប្រៀប​ទៅ​នឹង MacBook Pro។ ផ្ទុយ​ទៅ​វិញ MacBook Air មាន​តួ​ចំ​ឡែក ដែល​រីក​ពី​ចុង​ទៅ​គល់ ហើយ​ផ្នែក​ដែល​ក្រាស់​បំផុត​របស់ MacBook Air មាន​កម្រាស់ ០,៦១ អ៊ីញ ក្រាស់​ជាង MacBook​ Pro ១៣ អ៊ីញ​ទៅ​ទៀត ដែល MacBook Pro មាន​តួ​ស្មើ​កម្រាស់​ត្រឹម ០,៥៩ អ៊ីញ។

៣. MacBook Pro មាន​អេក្រង់​ស្អាត​ជាង MacBook Air

ជា​ការពិត​ណាស់​ទាំង MacBook Air និង MacBook Pro ១៣ អ៊ីញ​មាន​កម្រិត​ភាព​ច្បាស់​ស្មើ​គ្នា ២៥៦០x១៦០០ ប៉ុន្តែ MacBook Pro មាន​ពណ៌​ស្អាត​ជាង និង​ពន្លឺ​ភ្លឺ​ជាង។ បើ​តាម​ប្រភព​ពី Apple ផ្ទាល់ អេក្រង់ MacBook Pro ១៣ អ៊ីញ​មាន Wide P3 Color Gamut ធ្វើ​ឲ្យ​ពណ៌​អេក្រង់​មាន​ភាព​ពិត​ច្បាស់ និង​ម៉ត់​ល្អ ដែល MacBook Air គ្មាន។ បើ​និយាយ​ពី​កម្រិត​ពន្លឺ​វិញ MacBook Air មាន​កម្រិត​ភ្លឺ​ត្រឹម ៣០០ nits តែ​ប៉ុណ្ណោះ​នៅ​ពេល​ដែល MacBook Pro មាន​កម្រិត​ពន្លឺ​ដល់ ៥០០ nits។

៤. ខុស​គ្នា ១០០ ដុល្លារ​ពិត​មែន តែ MacBook Pro ១៣ អ៊ីញ​ស៊េរី​ទាប​បំផុត​ នៅ​តែ​ខ្លាំង​ជាង Macbook Air ឆ្នាំ ២០១៨

MacBook Air ឆ្នាំ ២០១៨ ប្រើប្រាស់ CPU Intel Core i5 ជំនាន់​ទី ៨ ដែល​មាន​ល្បឿន​ត្រឹម ១,៦ GHz Based-clockspeed តែ​ប៉ុណ្ណោះ បើ​ប្រៀប​នឹង MacBook Pro ១៣ អ៊ីញ​ស៊េរី​ទាប​បំផុត​វិញ​មាន​ប្រើ CPU Intel Core i5 ជំនាន់​ទី ៨ ដែល​មាន​ល្បឿន​ ២,៣ GHz Based-clockspeed បាត់​ទៅ​ហើយ។ មួយ​វិញ​​ទៀត ក្រាហ្វិក​កាត​ដែល​មក​ជាមួយ MacBook Air ឆ្នាំ ២០១៨ គឺ Intel UHD 617 ខ្សោយ​ជាង Intel Iris Plus Graphic 640 របស់ MacBook Pro ១៣ អ៊ីញ​ទៀត​ផង។

ចុចអាន៖

ប្រភព៖ Businessinsider   ប្រែ​សម្រួល៖ ផាត សុវត្ថិ