ស្ងាត់ៗ ចរិយា ពេជ្រ ឲ្យតម្រុយ ចេញទៅតាមប្ដីឆាប់ៗនេះហើយ!
- 2019-01-14 04:18:39
- ចំនួនមតិ 0 | ចំនួនចែករំលែក 0
ស្ងាត់ៗ ចរិយា ពេជ្រ ឲ្យតម្រុយ ចេញទៅតាមប្ដីឆាប់ៗនេះហើយ!
ចន្លោះមិនឃើញ
តាមការបញ្ជាក់ពីសាមីខ្លួន អតីតតារាសម្ដែង ចរិយា ពេជ្រ ប្រាប់ថា នាងគ្រោងនឹងចាកចេញទៅរស់នៅជាមួយស្វាមីនាងនៅឯនាយសមុទ្រឆាប់ៗនេះហើយ ហើយនោះជាមូលហេតុដែលនាងសម្រេចឈប់រវីរវល់ជាមួយសិល្បៈបន្តទៀត។
ស្រីស្អាត ចរិយា ពេជ្រ បានផ្អាកពីសិល្បៈ ប្រមាណ២ឆ្នាំមកហើយ តាំងពីមុនរៀបការម្ល៉េះ ពោលគឺនាងបានដកខ្លួនបន្តិចៗម្ដង អំឡុងពេលនោះ នាងមានចចាមអារ៉ាមស្នេហ៍ជាមួយខ្មែរអាណិកជនខ្មែរនៅអូស្ត្រាលី គឺស្វាមីនាងបច្ចុប្បន្ននោះឯង។ រហូតដល់រៀបការរួចពាក់កណ្ដាលឆ្នាំមុន នាងបានផ្ដាច់ខ្លួនទាំងស្រុងតែម្ដង។ បញ្ហានោះ គឺថា នាងគ្រោងចាកចេញទៅរស់នៅជាមួយស្វាមីឆាប់ៗនេះ។
“ខ្ញុំអត់វិលទៅសិល្បៈវិញទេបង ព្រោះខ្ញុំជិតចេញទៅរស់ជាមួយស្វាមីហើយ ហើយម្យ៉ាងស្វាមីខ្ញុំ គាត់ថាមិនចាំបាច់ឲ្យធ្វើអីទេ គឺគ្រាន់នៅផ្ទះថែរក្សាកូនក្នុងពោះបានហើយ!”។
ពេជ្រ បានពពោះកូនដំបូងជាមួយស្វាមីលោក ជា ចឹម បានជិត ៧ខែហើយ ដោយនៅសល់ពេលតែប្រមាណ ២ខែទៀតប៉ុណ្ណោះ កូនប្រុសរបស់នាង នឹងសម្រាល។ តាមសាមីខ្លួន ដោយសារតែរឿងពពោះជិតសម្រាលកូននេះហើយ ទើបជាហេតុដែលនាងត្រូវពន្យារពេលចេញទៅរស់នៅជាមួយស្វាមី ពោលគឺ ប្រសិនបើមិនទាន់មាន នាងអាចចេញទៅបានលឿនជាងនេះ។
នាង និងស្វាមី បានព្រមព្រៀងគ្នាសម្រាលបុត្រនៅលើទឹកដីប្រទេសកម្ពុជា យកសញ្ជាតិខ្មែររួចហើយសិន ទើបចាកចេញទៅតាមក្រោយតែម្ដង ដោយឯកសារបានស្រេចបាច់អស់ទៅហើយ។ បើទោះជាបែបនេះក្ដី អតីតស្រីស្អាតលេខ២របស់ "ប្រ៊ីដស្តុន" កូនរបស់នាង ក៏នឹងទទួលបានសញ្ជាតិទី២ គឺសញ្ជាតិអូស្ត្រាលីមួយទៀតដែរ ស្របតាមច្បាប់របស់ប្រទេសដែនដីសត្វកង់ហ្គូរូនេះ ដោយសារតែស្វាមីនាងជាពលរដ្ឋស្របច្បាប់របស់ប្រទេសនេះ។
បន្ទាប់ពីបានទាក់ទងគ្នាអស់ពេលប្រមាណ ៥ឆ្នាំ ចរិយា ពេជ្រ បានសម្រេចរៀបការជាមួយលោក ជា ចឹម ជាអាណិកជនខ្មែររស់នៅអូស្ត្រាលី កាលពីថ្ងៃទី ១៥ មករា ២០១៨ ដោយមានអញ្ជើញភ្ញៀវកិត្តិយសចូលរួមពិសាភោជនីយអាហារ ចំនួន ៥០តុ។
ក្រោយពីរៀបការហើយមួយរយៈ ស្វាមីនាងបានចាកចេញទៅប្រទេសអូស្ត្រាលីវិញ។ ប៉ុន្តែជារឿយៗ លោក ចឹម រមែងឡើងមករកភរិយាស្រស់ស្អាតរបស់ខ្លួន។ ការរស់នៅបែកគ្នានេះ តាមការបញ្ជាក់របស់សាមីខ្លួន ចរិយា ពេជ្រ ដោយសារត្រូវយកពេលរត់ឯកសារដើម្បីបានចេញទៅរស់នៅជុំគ្នា។ រង់ចាំឯកសារធ្លាក់ផង និងមានគភ៌ទើប គូស្វាមី ភរិយា មួយគូតស៊ូរស់នៅឆ្ងាយគ្នាសិន។ ប៉ុន្តែដូចការអះអាងរបស់ អតីតស្រីស្អាតខាងលើ គឺនាងគ្រោងនឹងចេញទៅរស់នៅអូស្ត្រាលីឆាប់ៗនេះហើយ ក្រោយពីសម្រាលកូនដំបូងរួច៕