កម្ពុជានឹងមានរោងចក្រកែច្នៃរោមសត្វ និងស្បែកសត្វធ្វើសំលៀកបំពាក់ដំបូងបង្អស់

2019-01-18 08:17:27
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមហ៊ុនអន្តរជាតិមួយដែលមានឈ្មោះថា ស៊ីភែល (ខេមបូឌា) ខូ អិលធីឌី មានគម្រោងបង្កើតរោងចក្រផលិតរ៉ូបធ្វើពីរោមសត្វ និងស្បែកសត្វ កែច្នៃស្បែកសត្វ និងស្បែកសត្វជាប់រោមសត្វ លើផ្ទៃដីទំហំ ១៦ ៧៧០ម៉ែត្រក្រឡា មានទីតាំងស្ថិតនៅក្នុងភូមិព្រៃសំព័រ សង្កាត់ក្រាំងពង្រ ខណ្ឌដង្កោ រាជធានីភ្នំពេញ។

រូបតំណាង

គម្រោងនេះ ត្រូវបានក្រសួងពាក់ព័ន្ធរួមមាន ក្រសួងបរិស្ថាន ក្រសួងសេដ្ឋកិច្ច និងហិរញ្ញវត្ថុ ក្រសួងរៀបចំដែនដី នគរូបនីយកម្ម និងសំណង់ ក្រសួងឧស្សាហកម្ម និងសិប្បកម្ម ក្រសួងសាធារណការ និងដឹកជញ្ជូន ក្រសួងធនធានទឹក និងឧតុនិយម ក្រសួងការងារ និងបណ្តុះបណ្តាលវិជ្ជាជីវៈ ក្រសួងកសិកម្ម រុក្ខាប្រមាញ់ និងនេសាទ ក្រុមប្រឹក្សាអភិវឌ្ឍន៍កម្ពុជា រដ្ឋបាលរាជធានីភ្នំពេញ និងមន្ទីរបរិស្ថានរាជធានីភ្នំពេញ តំណាងនាយកដ្ឋានវាយតម្លៃហេតុប៉ះពាល់បរិស្ថាន ជួបប្រជុំជាមួយតំណាងក្រុមហ៊ុន ដើម្បីពិនិត្យ និងផ្តល់យោបល់លើរបាយការណ៍វាយតម្លៃហេតុប៉ះពាល់បរិស្ថាន និងសង្គមកាលថ្ងៃទី១៨ ខែមករា ឆ្នាំ២០១៩ ក្រោមការដឹកនាំប្រជុំដោយឯកឧត្តម ស្រ៊ុន ដារិទ្ធិ រដ្ឋលេខាធិការ នៃក្រសួងបរិស្ថាន។

ឯកឧត្តម ស្រ៊ុន ដារិទ្ធិ រដ្ឋលេខាធិការ នៃក្រសួងបរិស្ថាន

ជាលទ្ធផលក្រោយការប្រជុំអន្តរក្រសួងរួចមក តម្រូវឲ្យក្រុមហ៊ុនត្រូវអនុវត្តតាមដូចជា៖

១. ត្រូវគ្រប់គ្រងសំណល់រឹង-រាវ ទាំងក្នុង និងក្រៅរោងចក្រ ឱ្យបានត្រឹមត្រូវ ជាពិសេសនៅមុខរោងចក្រឱ្យបានស្អាត

២. ប្រសិនបើគម្រោងនេះផលិតរ៉ូបធ្វើពីរោមសត្វ និងកែច្នៃរោមសត្វផង ត្រូវមានរបាយការណ៍ទាំងពីរផ្នែកដាក់ចូលក្នុងរបាយការណ៍នេះ ប៉ុន្តែបើគម្រោងគ្មានការផលិតរ៉ូបទេ យើងទទួលយករបាយការណ៍នេះ តែត្រូវប្តូរចំណងជើងឈ្មោះគម្រោងវិញ ហើយបើទៅថ្ងៃមុខ ក្រុមហ៊ុនមានគម្រោងធ្វើរោងចក្រផលិតរ៉ូបធ្វើពីរោមសត្វ នៅទីតាំងផ្សេងក្រុមហ៊ុនត្រូវធ្វើរបាយការណ៍វាយតម្លៃហេតុប៉ះពាល់បរិស្ថានដាច់ដោយឡែកពីគ្នា

៣.ក្រុមហ៊ុនទីប្រឹក្សាត្រូវបញ្ចូលមតិយោបល់ទាំងឡាយដែលអង្គប្រជុំបានលើកឡើងត្រូវបញ្ចូលទាំងអស់ក្នុងរបាយការណ៍នេះ។

ប្រភព៖ ក្រសួងបរិស្ថាន

អត្ថបទ៖ ស៊ិន សាវ៉េត