ភ្លោះទៀតហើយ! រឿងភាគថៃមួយរឿងទៀតរបស់ភីអិនអិនក៏ទាក់ទងនឹងបងប្អូនភ្លោះដែរ

2019-02-11 06:35:00
ចំនួនមតិ 0 | ចំនួនចែករំលែក 0

ចន្លោះមិនឃើញ

បច្ចុប្បន្ននេះរឿងភាគថៃមួយរឿងចំណងជើង «អ្នកម្ដាយក្លែងក្លាយ» ដែលកំពុងតែចាក់ផ្សាយនៅលើកញ្ចក់ទូរទស្សន៍ភីអិនអិន វេលាម៉ោង១២:០០ថ្ងៃ ត្រង់ គឺជារឿងមួយដែលមានពាក់ព័ន្ធនឹងបងប្អូន ភ្លោះ ដែលមានកញ្ញា Bau ចាប់ដៃគូសម្ដែងជាមួយនឹង Pop។

ដោយឡែកថ្មីៗនេះ ភីអិនអិន ក៏បានបង្ហាញចំណងជើងរឿងភាគថៃថ្មីមួយទៀត ដែលមានតួឯកស្រី ជាបងប្អូនភ្លោះដូចគ្នាចំណងជើង «ផ្កាយភ្លោះ» ដោយតួសម្ដែងគ្រងដំណែងជាតួឯកក្នុងរឿងនេះគឺ Prim ចាប់ដៃគូជាមួយ Chakrit។

បើតាមរយៈការទស្សនាវីដេអូខ្លីរបស់រឿង «ផ្កាយភ្លោះ» ដែលមានរយៈពេលជាង១នាទី បានបង្ហាញពីវាសនាបងប្អូនស្រីភ្លោះពីរនាក់គឺ Pang & Puen ដែលត្រូវបានម្ដាយយកទៅអោយខាងមណ្ឌលកុមារកំព្រា ព្រោះតែគ្មានលទ្ធភាពចិញ្ចឹម។ ពួកគេទាំងពីរនាក់ក៏ត្រូវបានបែកគ្នា Pang បានក្លាយទៅជាតារាសម្ដែងនៅក្នុងប្រទេសថៃ រីឯ Puen វិញជាម្ចាស់ហាងកាហ្វេនៅអូស្ត្រាលី នាងនៅទីនោះដោយរស់នៅជាមួយឪពុកម្ដាយចិញ្ចឹមរបស់នាង។ Puen តែងតែមានអារម្មណ៍ថាខ្លួនដូចជាមិនមែនជាសាច់ឈាមបង្កើតក្នុងគ្រួសារនេះ រហូតដល់ពេលមួយមានមិត្តស្និទ្ធស្នាលរបស់នាងម្នាក់ឈ្មោះ Feilan បានប្រាប់នាងថាគេបានឃើញតារាសម្ដែងស្រីដែលមានមុខមាត់ដូចនាង នាងក៏បានសម្រេចចិត្តទៅប្រទេសថៃដើម្បីស្វែងរកការពិត ។

ពេលទៅដល់ប្រទេសថៃ Puen ពិតជាមានការភ្ញាក់ផ្អើលខ្លាំង ដោយសារតែនាង និង Pang មានមុខមាត់ដូចគ្នាបេះបិត។ បន្ទាប់ពីពួកគេទាំងពីរនាក់បានជួបគ្នា មានរឿងចៃដន្យជាច្រើនបានកើតឡើង រហូតអោយពួកគេទាំងពីរនាក់អាចបន្លំដើម្បីធ្វើការជំនួសគ្នាបាន។

តើទាំងពីរនាក់អាចដឹងថា ពួកគេជាបងប្អូននឹងគ្នាដោយរបៀបណា? កុំភ្លេចរង់ចាំតាមដានទស្សនារឿង "ផ្កាយភ្លោះ" ចាក់ផ្សាយចាប់ពីថ្ងៃទី ១៣ កុម្ភៈ ឆ្នាំ ២០១៩ វេលាម៉ោង ៩:០០យប់ នៅលើកញ្ចក់ទូរទស្សន៍ភីអិនអិន បន្ទាប់ពីរឿង «កាមទេពស្នេហ៍ វគ្គ ស្នេហ៍ចៃដន្យ»៕

ទស្សនាឈុតខ្លីសូមចុច៖

អត្ថបទ៖ លឹម សុនា