Apple គ្រោងកើបលុយដោយដាក់សេវាកម្មអានព័ត៌មានដល់អតិថិជននាខែក្រោយនេះ

2019-02-13 03:01:33
ចំនួនមតិ 0 | ចំនួនចែករំលែក 0

ចន្លោះមិនឃើញ

បើតាមគេហទំព័រ BuzzFeed ក្រុមហ៊ុនយក្សបច្ចេកវិទ្យាអាមេរិក Apple គ្រោងនឹងដំណើរការសេវាកម្មអានព័ត៌មានដល់អតិថិជនខ្លួន នៅក្នុងព្រឹត្តិការណ៍មួយដែលខ្លួននឹងរៀបចំ នៅថ្ងៃទី២៥ ខែមិនានេះហើយ។

ព្រឹត្តិការណ៍នេះ នឹងផ្ដោតសំខាន់ទៅលើសេវាកម្មចាយលុយដែល Apple មានស្រាប់នឹងអ្វីដែលក្រុមហ៊ុនគ្រោងនឹងបញ្ចេញ ដូច្នេះចំពោះផលិតផលគ្រឿងអេឡិចត្រូនិករបស់ក្រុមហ៊ុនផ្លែប៉ោមមួយនេះ ដូចជា AirPods 2, AirPower, iPad 9.7 និង iPad Mini ជំនាន់ថ្មី ទំនងជាមិនបង្ហាញខ្លួន នាចុងខែក្រោយនេះទេ។ យ៉ាងណាមិញ ក្រៅពីសេវាកម្មអានព័ត៌មាននេះ Apple ក៏អាចនឹងបញ្ចេញសេវាកម្មមើលរឿងភាគ ដែលខ្លួនផលិត Original Series លើ iTunes ផងដែរ។

ជាធម្មតា ព្រឹត្តិការណ៍នៅក្នុងខែមិនាជារៀងរាល់ឆ្នាំ គឺជាព្រឹត្តិការណ៍ពិសេសសម្រាប់ផលិតផល iPad របស់ខ្លួន ដូច្នេះក្នុងឆ្នាំនេះ វាពិតជាប្លែកដែល Apple បានបង្វែរវាទៅជាព្រឹត្តិការណ៍ដែលផ្ដោតទៅលើសេវាកម្មចាយលុយរបស់ខ្លួនវិញ។ ប៉ុន្តែ បើតាមមតិទូទៅ Apple អាចនឹងចេញ iPad 9.7 ប្រភេទធូរថ្លៃ ៣២៩ ដុល្លារ នាពេលនោះជាសម្ងាត់ ដោយសារវាជាផលិតផលដ៏សមស្របបំផុតសម្រាប់អ្នកចង់យក iPad សម្រាប់អានព័ត៌មាន និងមើលរឿងរបស់សេវាកម្មថ្មីរបស់ខ្លួន។

ជាការពិតណាស់ នៅក្នុង iOS 12.2 beta គេឃើញមានគំរូ Image Previews ដែលវាទាក់ទងនឹងសេវាកម្មដែល Apple គ្រោងបញ្ចេញនោះ។ ដោយផ្អែកលើស្ថានភាពបច្ចុប្បន្ន ចំណូលមួយភាគធំរបស់ក្រុមហ៊ុនបច្ចេកវិទ្យាយក្សនេះបានធ្លាក់ចុះ ដោយសារតែការលក់ផលិតផលកំពូល iPhone របស់ខ្លួនមិនបានច្រើនដូចការគ្រោងទុក។ ដូចនេះ Apple មានតែរកវិធីថ្មីដើម្បីរកលុយបន្ថែម និងអាចឲ្យខ្លួនអាចរកវិធីលក់ផលិតផលរបស់ខ្លួនបានច្រើនជាងមុន។

ចុចអាន៖

ប្រភព៖ theverge ប្រែសម្រួល៖ ផាត សុវត្ថិ