បែកធ្លាយប៉ាតង់ថ្មី Apple សង្ស័យថាជា iPhone ដែលអាចបត់បាន

2019-02-16 07:30:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមហ៊ុនទូរសព្ទធំៗនៅក្នុងពិភពលោក តែងតែស្វែងរកនូវការច្នៃប្រឌិតប្លែកៗដើម្បីយកមកបំពាក់លើផលិតផលរបស់ខ្លួនធ្វើយ៉ាងណាឲ្យប្លែកនិងទាក់ទាញ ដើម្បីឲ្យមានអតិថិជនទិញយកទៅប្រើប្រាស់ឲ្យបានច្រើន។

នៅក្នុងការច្នៃប្រឌិតទាំងនោះ Smartphone ដែលមានអេក្រង់លាតបត់បានក៏ជាគំនិតថ្មីមួយសម្រាប់អនាគតផងដែរ ដោយ Xiaomi និង Samsung បានបង្ហាញផលិតផលគំរូរបស់ខ្លួនរួចមកហើយ ហើយក្រុមហ៊ុនដទៃទៀតដូចជា Huawei, LG, Lenovo និង Motorla ក៏កំពុងសម្ងំសិក្សាស្រាវជ្រាវ និងផលិតចេញនូវ Smartphone ដែលអាចបត់បាននេះផងដែរ។

ប៉ុន្តែសម្លឹងមើលភាគច្រើន ក្រុមហ៊ុនដែលកំពុងដើរលើផ្លូវនេះ សុទ្ធសឹងតែជាក្រុមហ៊ុនយក្សនៅអាស៊ី ដោយភាគច្រើននៅចិន និងកូរ៉េខាងត្បូង។ យ៉ាងណាមិញ ក្រុមហ៊ុនផលិត Smartphone កំពូលរបស់ពិភពលោក iPhone គឺ Apple នោះ ក៏ត្រូវបានគេរាយការណ៍ថា បានដាក់ចិត្តដាក់កាយលើផ្លូវដែល Smartphone ប្រើអេក្រង់លាតនេះ អាចបត់បែនបានផងដែរ។ តាមប៉ាតង់ថ្មី ដែលទើបនឹងកែប្រែចុងក្រោយបំផុតនេះ Apple បានបញ្ចេញគំរូផលិតផលខ្លួនមួយ ដែលគេអាចសន្និដ្ឋានបានថាជា សម្បក iPhone ហើយវាមានភាពបត់បែនដោយតួទូរសព្ទទាំងមូលអាចបត់ជា ២ បាន។ គួរបញ្ជាក់ផងដែរថា រូបថ្មីសម្រាប់ដាក់ជាប៉ាតង់នេះ ត្រូវបានគេដាក់ចេញដំបូងតាំងតែពីឆ្នាំ ២០១១ មកម៉្លេះ ហើយត្រូវបានកែឡើងវិញម្ដងនៅឆ្នាំ ២០១៦។

រូបរាងសម្បកផលិតផលដែលអាចបត់ជា ២ បាននេះ វាស្រដៀងទៅនឹង ម៉ូដែល Smartphone គំរូ Motorola Razr ដែលត្រៀមនឹងចេញថ្មីម្ដងទៀត ដែលវានឹងធ្វើឲ្យមានភាពងាយស្រួល បត់បានតូចជាងមុន ដាក់ក្នុងហោប៉ៅ។

មិនត្រឹមតែប៉ុណ្ណោះ នៅមានរូបផ្សេងទៀតដែលគេសង្ស័យថាជា សម្បករបស់ iPad ឬក៏ Macbook ព្រោះវាបង្ហាញពី របៀបបទ ៣ គន្លាក់ ដែលអេក្រង់ OLED បត់បែនបាន ទាំងចូលក្នុងនិងចេញក្រៅ ហើយ អេក្រង់នោះក៏មានទំហំធំផងដែរ។

គេមិនអាចនិយាយបានទេថា iPhone ឆ្នាំ ២០១៩ អាចបត់បានភ្លាមៗនោះទេ ប៉ុន្តែនៅក្នុងពេលប្រហែល ២ ទៅ ៣ ឆ្នាំទៀត Apple អាចនឹងចេញផលិតដែលមានអេក្រង់ពេញ ហើយអាចបត់បែនបាន។

ចុចអាន៖

ប្រភព៖ Cnet ប្រែសម្រួល៖ ផាត សុវត្ថិ