អ្នកជំនាញយល់ថា ការភ្ជាប់សេវាធនារ៉ាប់រងអ្នកដំណើរ អាចជាផ្នែកមួយ នៃយុទ្ធសាស្ត្រទីផ្សាររយៈពេលវែង
- 2019-03-02 06:41:51
- ចំនួនមតិ 0 | ចំនួនចែករំលែក 0
អ្នកជំនាញយល់ថា ការភ្ជាប់សេវាធនារ៉ាប់រងអ្នកដំណើរ អាចជាផ្នែកមួយ នៃយុទ្ធសាស្ត្រទីផ្សាររយៈពេលវែង
ចន្លោះមិនឃើញ
ខណៈបញ្ហាគ្រោះថ្នាក់លើដងផ្លូវបានឆក់យកអាយុជីវិតមនុស្សស្ទើររាល់ថ្ងៃ អ្នកជំនាញចរាចរណ៍ផ្លូវគោក ចង់ឃើញក្រុមប្រតិបត្តិករផ្នែកសេវាដឹកជញ្ជូនអ្នកដំណើរកាន់តែច្រើនឡើង ជ្រើសរើសការភ្ជាប់សេវាធានារ៉ាប់រងដឹកអ្នកដំណើរ ជាផ្នែកមួយ នៃយុទ្ធសាស្រ្តប្រកួតប្រជែង ផ្នែកទីផ្សារក្នុងរយៈពេលយូរអង្វែង។
លោក គង់ រតនៈ អនុប្រធានវិទ្យាស្ថានសុវត្ថិភាពចរាចរណ៍ បានឱ្យដឹងថា ករណីគ្រោះថ្នាក់ចរាចរណ៍ក្នុងប្រទេសកម្ពុជាបានកើតមានឡើងច្រើន និងហាក់កំពុងបញ្ឈឺ ដល់សកម្មភាពអប់រំផ្សព្វផ្សាយដោយនគរបាលមានសមត្ថកិច្ច មន្ត្រីអង្គការសង្គមស៊ីវិល និងប្រព័ន្ធព័ត៌មាន។ លោកចង់ឃើញប្រតិបត្តិករផ្នែកដឹកជញ្ជូន កាន់តែច្រើន ជ្រើសរើសការប្រើប្រាស់សេវាធានារ៉ាប់រងអ្នកដំណើរ បន្ថែមទៅលើការរឹតបន្តឹងការអនុវត្តច្បាប់ចរាចរណ៍។ បច្ចុប្បន្នមានសេវាដឹកជញ្ជូនអ្នកដំណើរតិចតួចនៅឡើយបានជ្រើសរើសសេវាធានារ៉ាប់រង។
“ប្រទេសជាច្រើននៅលើសកលលោកមានប្រព័ន្ធរ៉ាប់រងអ្នកដំណើរ ពិសេសប្រទេសជិតខាងកម្ពុជាតែម្តង។ អតិថិជនគឺជាស្ដេច និងជាប្រភពចំណូលរបស់ក្រុម។ ដូច្នេះពេលមួយក្រុមហ៊ុនគិតគូរសុវត្ថិភាពអតិថិជន គឺមានន័យស្មើនឹងការធានានូវនិរន្តរភាពរបស់ក្រុមហ៊ុនល្អយ៉ាងដូច្នេះដែរ”។ លោក គង់ រតនៈ បន្ថែម។
លោក ឡេង វិសិដ្ឋ នាយកប្រតិបត្តិក្រុមហ៊ុន WeGO បានមានប្រសាសន៍ថា ក្រុមហ៊ុនតែងគិតគូដល់សុវត្ថិភាព និងភាពកក់ក្ដៅរបស់អតិថិជន ក្នុងពេលធ្វើដំណើរអាទិភាពបំផុត។ កន្លងមកក្រុមហ៊ុនតែងរៀបចំវគ្គបណ្ដុះបណ្ដាលដល់ដៃគូអ្នកបើកបរ ពីច្បាប់ចរាចរណ៍ និងក្រមសីលធម៌ រៀងរាល់ខែ ទាំងនៅភ្នំពេញ និងសៀមរាប ហើយមានអ្នកបើកបរ ជាដៃគូខ្ទង់ពាន់នាក់ចូលរួម។ បន្ថែមលើនេះក្រុមហ៊ុនបានសហការ ជាមួយក្រុមហ៊ុនធានារ៉ាប់រង Forte ផ្ដល់នូវកញ្ចប់ការពារ រាល់ពេលដែលអតិថិជន ប្រើប្រាស់ App WeGO ធ្វើដំណើរ តាំងពីចំណុចចាប់ផ្ដើម រហូតដល់គោលដៅ។ “នេះគឺជាការផ្តល់ភាពកក់ក្ដៅមួយសម្រាប់អតិថិជននៅពេលធ្វើដំណើរ មួយទៀតសម្រាប់អ្នកបើកបរក៏គាត់សប្បាយចិត្តដែរ សប្បាយចិត្តត្រង់ថា ការបើកបររបស់គាត់ប្រកបដោយសុវត្ថិភាព គាត់គោរពច្បាប់ចរាចរណ៍។ អញ្ចឹងអ្វីដែលសំខាន់គឺភាពកក់ក្ដៅ ដល់អតិថិជនក្នុងពេលធ្វើដំណើរតាមដងផ្លូវ។ ចំពោះអ្នកបើកបរ គឺយើងតែងមានវគ្គបណ្តុះបណ្ដាលប្រចាំខែ ដោយអញ្ជើញពួកគាត់ចូលរួមហ្នឹងគឺយើងឆ្លាស់គ្នារហូត ដោយមានអ្នកចូលរួមជាង១០០នាក់ក្នុងមួយវគ្គៗ ទាក់ទងនឹងក្រមសីលធម៌ នៃការបម្រើអតិថិជន ការគោរពច្បាប់ចរាចរណ៍ និងព័ត៌មានផ្សេងៗទៀត”។
ចំណែកលោក លី ជាពិសិទ្ធិ ប្រធានផ្នែកទីផ្សារ នៃក្រុមហ៊ុន Grab ក៏បានចាត់ទុកការគិតគូរសុវត្ថិភាពអតិថិជនគឺជាចំណុចសំខាន់បំផុតរបស់ក្រុមហ៊ុនផងដែរ។ ហេតុដូចនេះក្រៅពីបើកវគ្គបណ្តុះបណ្ដាលទាក់ទងនឹងសុវត្ថិភាពចរាចរណ៍ដល់ដៃគូអ្នកបើកបរ ក្រុមហ៊ុនបានផ្តើមមានសេវាធានារ៉ាប់រងអ្នកដំណើរចាប់តាំងពីដំណើរការដំបូងនៅកម្ពុជាមកម្ល៉េះ។ ការផ្ដល់សេវាធានារ៉ាប់រងនេះគឺអនុវត្តស្តង់ដារដូចគ្នាទៅនឹង៨ ប្រទេសផ្សេងទៀត ដែល Grab បានប្រតិបត្តិការណ៍។
“អញ្ចឹងឡាន និងទាំងកង់បីជាដើម ក្រុមហ៊ុនយើងផ្តោតលើសុវត្ថិភាពអតិថិជនជាចម្បង ហើយក្រុមហ៊ុនក៏បានវិនិយោគច្រើនផងដែរទៅលើប្រព័ន្ធសុវត្ថិភាព។ ការផ្តល់សេវាធានារ៉ាប់រងបានបន្ថែមទំនុកចិត្ត និងភាពរីករាយដល់អ្នកដំណើរ”។ លោក លី ជាពិសិទ្ធិ បន្ថែម។
លោក យក់ ចំរើនឫទ្ធិ អគ្គនាយកក្រុមហ៊ុនធានារ៉ាប់រង Forte បានថ្លែងថា ការជាវសេវាធានារ៉ាប់រងមិនមែនជាបន្ទុកចំណាយនោះទេ ប៉ុន្តែក្នុងហេតុការណ៍ចៃដន្យណាមួយយានយន្តដឹកអ្នកដំណើររងគ្រោះថ្នាក់នឹងត្រូវបានធានារ៉ាប់រង។ ការចំណាយផ្នែកសំណងរដ្ឋប្បវេណីនឹងសម្រាលបន្ទុកដល់ម្ចាស់យានយន្ត។ ដូច្នេះនេះគឺជាការរៀបចំស្ថានភាពហិរញ្ញវត្ថុ ដែលក្រុមហ៊ុន ឬម្ចាស់យានយន្តទាំងអស់គួរតែពិចារណា។ សេវាធានារ៉ាប់រងទូទៅនៅកម្ពុជាបានកើនឡើង ១៥% ក្នុងឆ្នាំ២០១៨ តែចំពោះធានារ៉ាប់រងយានយន្តគឺបានកើនឡើងរង្វង់១០% ។ ធានារ៉ាប់រងយានយន្តរួមបញ្ចូលទាំងធានារ៉ាប់រងអ្នកដំណើរផងដែរ។ ទីផ្សារធានារ៉ាប់រងនៅក្នុងប្រទេសកម្ពុជាមានទំហំធំ តែបរិមាណការជាវសេវាធានារ៉ាប់រងនៅមានចំនួនតិចតួចនៅឡើយ។
“នៅប្រទេសជឿនលឿន បើគេនិយាយពីការធានារ៉ាប់រងផ្នែកយានយន្ត ឬអ្នកដំណើរ គឺជាកាតព្វកិច្ចរបស់ម្ចាស់យានយន្ត ដែលត្រូវតែបង់ធានារ៉ាប់រង ដើម្បីការពារអ្នកដំណើរ ឬតតិយជន។ យ៉ាងនេះក្តីច្បាប់ដូចបានរៀបរាប់ខាងលើនៅកម្ពុជាមិនទាន់បានចូលជាធរមាននៅឡើយទេ។ បើច្បាប់នេះចូលជាធរមានខ្ញុំរំពឹងថា ការជាវសេវាធានារ៉ាប់នឹងមានការកើនឡើង”។
តាមរបាយការណ៍កាលពីឆ្នាំ ២០១៣ បង្ហាញថា ប្រទេសកម្ពុជាបានខាតបង់ថវិកាអស់ប្រមាណ ៣៣៧ លានដុល្លារក្នុងមួយឆ្នាំ ដោយសារបញ្ហាគ្រោះថ្នាក់ចរាចរណ៍នៅតាមដងផ្លូវ។ នេះគឺជាតួលេខទឹកប្រាក់ដ៏ច្រើនមួយ ។ មន្ត្រីជំនាញផ្នែកចរាចរណ៍ផ្លូវគោកបានឱ្យដឹងថា ការស្លាប់បាត់បង់ជីវិតមនុស្សជាច្រើននាក់ក្នុងមួយឆ្នាំៗដោយសារគ្រោះថ្នាក់ចរាចរណ៍នៅតាមដងផ្លូវដែលបណ្ដាលមកពីការធ្វេសប្រហែសរបស់អ្នកធ្វើដំណើរ កត្តាយានយន្ត និងកត្តារួមផ្សំផ្សេងៗទៀត។
ទោះយ៉ាងលោក គង់ រតនៈ អនុប្រធានវិទ្យាស្ថានសុវត្ថិភាពចរាចរណ៍បានបន្ថែមថា ក្រុមហ៊ុនសេវាដឹកជញ្ជូនអ្នកដំណើរគួរផ្សព្វផ្សាយ ពីគោលនយោបាយ និងកម្រិត នៃការរ៉ាប់រងដល់អ្នកដំណើរឱ្យបានយល់ដឹងទូលំទូលាយ៕