ចិនគ្រប់គ្រង ៥៨% នៃអចលនទ្រព្យពិភពលោក

2019-03-16 08:59:04
ចំនួនមតិ 0 | ចំនួនចែករំលែក 0

ចន្លោះមិនឃើញ

ដោយមាន១៣៩ ក្នុងចំណោមមហាសេដ្ឋីអចលនទ្រព្យសរុប ២៣៩ នៅលើពិភពលោក ចិនបានគ្រប់គ្រង ៥៨% នៃអចលនទ្រព្យនៅលើផែនដី។ នេះបើតាមរបាយការណ៍របស់ Hurun Global Real Estate Rich List ដែលបានចេញផ្សាយកាលពីថ្ងៃព្រហស្បតិ៍កន្លងទៅ។

ទីក្រុងហុងកុង (រូបថត៖សុខ លាងហ៊ត)

សហរដ្ឋអាមេរិកឈរនៅលេខរៀងបន្ទាប់ ដោយមានមហាសេដ្ឋីអចលនទ្រព្យចំនួន ២៦ តាមពីក្រោយដោយចក្រភពអង់គ្លេសចំនួន ១៧។ រីឯទីក្រុងហុងកុងដ៏តូច មានមហាសេដ្ឋីអចលនទ្រព្យរហូតដល់ ២៥។

អ្នកវិនិយោគចិនបានឈរនៅតំណែងកំពូលទាំង៤ ដែលជាមហាសេដ្ឋីអចលនទ្រព្យមានទ្រព្យសម្បត្តិច្រើនបំផុត។

លោកស៊ូ ជៀយីន (Xu Jiayin) នៃក្រុមហ៊ុន Evergrande Group ដែលមានមូលដ្ឋាននៅ Shenzhen ជាប់ចំណាត់ថ្នាក់លេខ១ដោយមានទ្រព្យសម្បត្តិសរុប ៣៧ ប៊ីលានដុល្លារ។ លេខ២គឺលោក លី ខាស៊ីង (Li Ka-shing) នៃក្រុមហ៊ុន Cheung Kong Holdings របស់ហុងកុង មានទ្រព្យសរុប ២៩ ប៊ីលានដុល្លារ។

ចំណាត់ថ្នាក់លេខ ៣ បានទៅលោក លី សាវឃី (Lee Shau Kee) នៃក្រុមហ៊ុន Henderson Development មានមូលដ្ឋាននៅទីក្រុងហុងកុងដែលមានទឹកប្រាក់ ២៧ ប៊ីលានដុល្លារ។ ទី៤ គឺអ្នកស្រី យ៉ាង ហ៊ុយយ៉ាន (Yang Huiyan) នៃក្រុមហ៊ុន Garden Country មានទឹកប្រាក់ ២៣ ប៊ីលានដុល្លារ ហើយអ្នកស្រីគឺជាស្ត្រីតែម្នាក់គត់ដែលស្ថិតនៅក្នុងបញ្ជីមហាសេដ្ឋីអចលនទ្រព្យលំដាប់កំពូលទាំង ១០។

មហាសេដ្ឋីអចលនទ្រព្យដែលមានជាងគេបំផុតនៅសហរដ្ឋអាមេរិកគឺលោក Donald Bren ជាប្រធាន និង ជាម្ចាស់របស់ក្រុមហ៊ុនអភិវឌ្ឍន៍ Irvine ដែលមានមូលដ្ឋាននៅកាលីហ្វ័រនីញ៉ា។ លោកមានទ្រព្យសម្បត្តិសរុបចំនួន ១៧ ប៊ីលានដុល្លារ។

ប្រធានាធិបតីសហរដ្ឋអាមេរិកលោក Donald Trump បានជាប់ចំណាត់ថ្នាក់ទី ៨២ ក្នុងបញ្ជីហាសេដ្ឋីអចលនទ្រព្យពិភពលោកដោយមានទឹកប្រាក់ ៣ ប៊ីលានដុល្លារ។

លោក Rupert Hoogewerf ប្រធាននិងជាអ្នកស្រាវជ្រាវជាន់ខ្ពស់នៃវិទ្យាស្ថានស្រាវជ្រាវ Hurun បាននិយាយថា "ការរីកចំរើននៃការធ្វើនគរូបនីយកម្មនៅប្រទេសចិនបានជំរុញឱ្យមានការផ្ទុះទ្រព្យសម្បត្តិដ៏ធំបំផុតនៅក្នុងប្រវត្តិសាស្ត្រពិភពលោក ដែលជាលទ្ធផលអ្នកអភិវឌ្ឍអចលនទ្រព្យធំបំផុតនៅលើពិភពលោកសព្វថ្ងៃនេះមកពីប្រទេសចិន"៕

ប្រភព៖ globaltimes ប្រែសម្រួល៖ សុខ លាងហ៊ត