ម៉ន សាម៉េត ចាស់ហើយនៅតែល្អ ទើបផ្ដួលថៃឲ្យសន្លប់ម្សិលមិញទៀតហើយ

2019-03-23 17:32:19
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកប្រដាល់ដើមកំណើតមកពីព្រែកឯង ម៉ន សាម៉េត វ័យច្រើនមែនប៉ុន្តែក្បាច់គុន និងតិចនិកនៅតែល្អ នៅតែជាឧបសគ្គរបស់ដៃគូ ម្សិលមិញនេះផ្ដួលថៃឲ្យសន្លប់ក្នុងទឹកទី២នៃកម្មវិធីប្រដាល់សង្វៀន TV5 ។

សាម៉េត ក្រហម

ម៉ន សាម៉េត ហាក់មានយីអ៊ុនគ្រាន់បើ ទើបឈ្នះ ធន់ អៀងឡៃ យកទឹកប្រាក់ ៤០០០ដុល្លារ និងបានប្រកួតជាហូរហែមិនថាបុណ្យទន្លេ និងតាមស្ថានីយទូរទស្សន៍មួយចំនួនទេ។ បើទោះជាកីឡាករមាឌល្អិតរូបនេះបញ្ជាក់ថាខ្លួនមានអាយុ ២៥-២៦ឆ្នាំ និងប្រកួតយូរណាស់ហើយក្ដី ប៉ុន្តែមើលឃើញថាការប្រកួតរបស់គេនៅតែល្អជាពិសេសតិចនិកតែម្ដង។

សាម៉េត ក្រហម

អ្នកលេងគុនខ្មែរមកពីព្រែកឯង រូបនេះ ចំណាយពេលត្រឹម២ទឹកប៉ុណ្ណោះផ្ដួលកីឡាករឆ្លងដែនមកពីថៃ Vann Muchhey ឲ្យបោះបង់ការប្រកួត។ ទឹកទី១ សាម៉េត មិនសូវជាប្រើស្នៀតប្រយុទ្ធខ្លាំងៗនោះឡើយ ពោលត្រឹមស្ទាបស្ទង់ប៉ុណ្ណោះ។ ចូលដល់ទឹកទី២ កីឡាករថៃត្រូវ សាម៉េត ទាត់ចូលពេញជើងឆ្វេងហើយក៏ចាប់ផ្ដើមឈឺ ប៉ុន្តែទ្រាំប្រកួតបន្ត យ៉ាងណាមិញអ្នកលេងគុនខ្មែរខាងលើមិនបណ្ដោយឱកាសឲ្យហួសនោះឡើយ ពោលទាត់រហូតអាជ្ញាកណ្ដាលរាប់ម្ដង និងទាត់ឲ្យ Vann Muchhey សម្រេចបោះបង់ការប្រកួតខ្លួនឯងតែម្ដង។

ម៉ន សាម៉េត ឈ្នះថៃម្សិលមិញ

រំលឹកដែរថា គូប្រកួតអបកីឡាករជម្រុះចាញ់ធ្លាក់ពានរង្វាន់ TV5 ទម្ងន់ ៥៤គីឡូក្រាម ម្សិលមិញនេះគឺជើងខ្លាំង ម៉ន សាម៉េត ផ្ដួលថៃឲ្យបោះបង់ការប្រកួតត្រឹមទឹកទី២ នៅសង្វៀនប្រដាល់ព្រែកកំពិល ខេត្តកណ្ដាល៕

អត្ថបទ៖ នួន ស៊ីណា