ជនបរទេសធ្លាប់ល្បីពេញ FB ព្រោះច្រៀងភាសាខ្មែរ មានប្រវត្តិផ្នែកតន្រ្តីច្រើនស្មានមិនដល់

2019-04-05 02:20:00
ចំនួនមតិ 0 | ចំនួនចែករំលែក 0

ចន្លោះមិនឃើញ

បុរសជនជាតិអូស្រ្តាលីម្នាក់នេះ ធ្លាប់ល្បីឈ្មោះកក្រើកពេញបណ្ដាញសង្គម FB ម្ដងរួចហើយ ដោយសារតែច្រៀងភាសាខ្មែរបានពីរោះ និងច្បាស់ល្អ។ ចម្រៀងដែលធ្វើឲ្យល្បីដំបូងលើប្រព័ន្ធ Online គឺបទ "បងស្រណោះសំដី" ដែលមានអ្នកចូលមើលរាប់ពាន់ដង និង Share សន្ធឹកសន្ធាប់ផងដែរ។

ចុចអាន៖ ជនបរទស៣រូបនេះហើយ ធ្វើឲ្យកក្រើកពេញបណ្តាញសង្គម ពេលច្រៀងជាភាសាខ្មែរ

លោកមានឈ្មោះថា Euan Gray បានមករស់នៅប្រទេសកម្ពុជា តាំងពីឆ្នាំ២០១២ និងបានរៀបការជាមួយនារីខ្មែរ នៅខេត្តបាត់ដំបង ។ និយាយទៅ លោកជាមនុស្សម្នាក់ចូលចិត្តតន្ត្រី ហើយកាលពីរស់នៅអូស្រ្តាលី លោកថែមទាំងមានក្រុមតន្ត្រីផ្ទាល់ខ្លួនមានឈ្មោះថា "The Rooftops”។ គិតមកទល់ពេលនេះ លោកបានប្រឡូកក្នុងផ្នែកតន្ត្រីមិនតិចជាង២០ឆ្នាំឡើយ។

នៅកម្ពុជា Euan Gray បានចេញសម្ដែងតន្ត្រីជាញឹកញាប់ ព្រមទាំងបានបើក Studio មួយមានឈ្មោះថា "SongKites Studio” ផងដែរ។ ក្រៅពីចេះច្រៀង លោកអាចលេងឧបករណ៍ Saxophone លេងហ្គីតា បូករួមទាំងស្គរ ព្យាណូ ខ្លុយ ខ្លះថែមទៀត។ ទាំងនេះហើយ បានធ្វើឲ្យបុរសច្រមុះស្រួចរួបនេះ ចាប់ឱកាសជា Judge ក្នុងកម្មវិធីតន្ត្រីដំបូងគេនៅកម្ពុជា គឺ Battle of the Band Cambodia។

Euan Gray បានបញ្ចេញអារម្មណ៍ផ្ទាល់ជាគណៈមេប្រយោគក្នុងកម្មវិធីនេះ ដែលធ្វើឲ្យលោកកាន់តែអភិវឌ្ឍន៍បានច្រើនលើភាសាខ្មែរ និង Style ខ្មែរផងដែរ។ លើសពីនេះ លោកអាចយល់ដឹងពីភាពខ្លាំងនិងខ្សោយ នៅក្នុងឧស្សាហកម្មតន្ត្រី គន្លឹះរីកចម្រើនផ្នែកតន្ត្រីថែមទៀត។ កម្មវិធី Battle Of the Band Cambodia បានជួយជំរុញលើកទឹកចិត្តក្នុងការអភិវឌ្ឍក្រុមចម្រៀង ការលើកទឹកចិត្ត រួមទាំងគំនិតច្នៃប្រឌិត ការតាំងចិត្តខ្ពស់ ដើម្បីឲ្យយុវជនមានឱកាសបង្ហាញជំនាញផ្សេងៗគ្នា ក្នុងការសម្ដែងជាក្រុម។

លោក ជឿជាក់ថាបានរៀនសូត្រច្រើនពីកម្មវិធីនេះ ។ ម្យ៉ាងទៀតលោក យល់ថា តន្ត្រីកើតឡើងពីភាពច្នៃប្រឌិត កម្សាន្ត និងចំណង់ចំណូលចិត្តលាយបញ្ចូលគ្នា។ ភាពជោគជ័យផ្នែកនេះ ពេលខ្លះត្រូវធ្វើឲ្យស្របជាមួយនឹងទេពកោសល្យ និងត្រូវរក្សាតម្លៃខ្លួនឯងឲ្យខ្ពស់ជានិច្ច។

ក្នុងនាមជាអ្នកធ្លាប់ប្រឡូកផ្នែកតន្ត្រីយូរឆ្នាំ Euan Gray ចង់ឲ្យក្រុមតន្ត្រីដែលចូលចិត្តលេងបែបខ្លាំងៗរហូតនោះ ងាកមករកអ្វីថ្មីប្លែក បើមិនដូច្នេះទេ អ្នកគាំទ្រនឹងឈប់មើលការសម្ដែងរបស់អ្នកទៀតហើយ។ អ្នកត្រូវចេះរកអ្វីប្លែក មិនច្រំដែល បើធ្លាប់តែលេងបែបខ្លាំងៗ គួរប្ដូរជាទន់ភ្លន់ បែបស្វាហាប់វិញ។ ជាក្រុម អ្នកត្រូវរៀនបង្ហាញភាពអស្ចារ្យជាមួយគ្នា លាយមនោសញ្ចេតនាជាមួយគ្នាផ្ទាល់តែម្ដង នោះអ្នកទស្សនានឹងមានអារម្មណ៍ដូចគ្នា។ ក្រុមតន្ត្រី គួរធ្វើខ្លួនឲ្យធូរស្រាល និងបង្កើតទំនាក់ទំនងជាមួយមនោសញ្ចេតនា ហើយព្យាយាមបញ្ចេញ ពេលលេងតន្ត្រីរបស់អ្នក៕

រូបថត៖ ផ្តល់ឲ្យ

អត្ថបទ៖ លឹម សុនា