ចាន់ ប៊ុនហឿន ធ្វើការធ្ងន់ល្ងាចនេះប៉ះ ឆោកឈៃ នៅសង្វៀនបាយ័ន

2019-04-05 03:28:17
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកលេងគុនខ្មែរកំពុងល្បីឈ្មោះ ចាន់ ប៊ុនហឿន នឹងត្រូវធ្វើការធ្ងន់ល្ងាចនេះនៅសង្វៀនបាយ័នស្ទឹងមានជ័យ នាជំនួបមិត្តភាពអន្តរជាតិជាមួយកីឡាករល្អជង្គង់ ឆោកឈៃ ។

ចាន់ ប៊ុនហឿន

កីឡាករដើមកំណើតមកពីខេត្តកំពង់ស្ពឺខាងលើនេះ ទទួលបានប្រជាប្រិយភាពខ្លាំងនាពេលបច្ចុប្បន្ននេះតាំងពីប្រកួតខ្សែក្រវាត់ជាមួយ ឡៅ ចិត្រា រួចមក។ ប៊ុនហឿន ជាអ្នកប្រដាល់កម្រចាញ់របស់កម្ពុជាជាពិសេសជំនួបមិត្តភាពអន្តរជាតិនាពេលកន្លងមក។

កូនសិស្សលោក ឯម វុត្ថា ខាងរូបនេះគឺមានស្នៀតល្អច្រើន ដូចជា ពូកែទាត់ជើងក្រោម មានបច្ចេកទេសវ៉ៃកែងល្អ ស្របពេលចាប់វ៉ៃជង្គង់ក៏ប្រើបានល្អទៀតផង។ ផ្លែមួយៗរបស់ ប៊ុនហឿន គឺធ្ងន់ សូម្បី ឡៅ ចិត្រា ក៏បញ្ជាក់បែបនេះដែរ។

ចាន់ ប៊ុនហឿន

ការប៉ះជាមួយកីឡាករ ឆោកឈៃ លើកនេះក៏មិនស្រួលដែរសម្រាប់អ្នកលេងគុនខ្មែរខាងលើ ព្រោះអ្នកណាមិនល្បីថៃរូបនេះពូកែដើរបុក មានកម្លាំងខ្លាំង ស្នៀតពិសេសមួយទៀតនោះ គឺចាប់កាច់វ៉ៃជង្គង់លើដៃគូ។ មិនត្រឹមតែប៉ុណ្ណឹងទេ អ្នកលេងគុនថៃរូបនេះ ធ្លាប់ប៉ះអស់ហើយអ្នកប្រដាល់ល្បីឈ្មោះរបស់កម្ពុជា ផល សោភ័ណ្ឌ ឡៅ ចន្រ្ទា មាជ សុខរ៉ា មឿន សុខហ៊ុច ចាន់ ប៊ុនលាភ ជាដើម។

ឆោកឈៃ ខៀវ

បញ្ជាក់ដែរថា កម្មវិធីប្រដាល់មិត្តភាពអន្តរជាតិរបស់សង្វៀនបាយ័នស្ទឹងមានជ័យ ល្ងាចនេះនឹងចាប់ផ្ដើមពីម៉ោង៧យប់តទៅ។ ធន់ ចាន់តាក ប៉ះ Janwath Keathkhamthorn លើប្រភេទទម្ងន់ ៦៣,៥ Kg ខណៈ ចាន់ ប៊ុនហឿន ប៉ះ Chhork Chhai ៦៣,៥ Kg ដូចគ្នាដែរ៕

អត្ថបទ៖ នួន ស៊ីណា