មកទល់ពេលនេះ មានតែ ៤ក្រុមទេដែលកក់កៅអី UCL រដូវកាលក្រោយ

2019-04-08 10:50:56
ចំនួនមតិ 0 | ចំនួនចែករំលែក 0

ចន្លោះមិនឃើញ

បើតាមគេហទំព័រផ្លូវការរបស់ UEFA បានបញ្ជាក់ថា គិតត្រឹមថ្ងៃទី០៨ ខែមេសា មានតែក្លឹបចំនួន ៤ប៉ុណ្ណោះក្នុងទ្វីបអឺរ៉ុបដែលធានាបានកៅអីវគ្គជម្រុះពូលក្នុងក្របខ័ណ្ឌកំពូលអឺរ៉ុប។ ក្លឹបទាំង ៤នោះមានដូចជា ក្លឹបនៃលីគកំពូលអេស្ប៉ាញ Barcelona ក្លឹបអង់គ្លេស Liverpool ក្លឹបយក្សបារាំង Paris Saint-Germain និងក្លឹបយក្សអ៊ីតាលី Juventus។

ក្លឹប Barcelona នៅពេលនេះដែរ កំពុងតែឈរកំពូលតារាងនៃ La Liga និងនៅសល់ ៧ប្រកួតទៀត ហើយមាន ៧៣ពិន្ទុ ដែលឃ្លាត ១៣ពិន្ទុពីក្រុមលេខ ៣ Real Madrid និងឃ្លាត ២៣ពិន្ទុពីក្រុមលេខ ៤ Getafe។ ហេតុនេះហើយ ប្រសិនបើក្លឹបកាតាឡាន់មួយនេះភ្លាត់ចាញ់ប្រកួតដែលនៅសល់ ហើយReal Madridឬ Getafe ឈ្នះគ្រប់ប្រកួតក៏ដោយ ក៏ Barcelonaនៅតែឈរលើចំណាត់ថ្នាក់លេខ ៣ដែរ។

ក្លឹប Liverpool វិញ នៅពេលនេះលេងបាន ៣៣ប្រកួតហើយក្នុង Premier League។ ក្លឹបមួយនេះកំពុងតែឈរលើកំពូលតារាង ដោយមាន ៨២ពិន្ទុក្នុងដៃ ខណៈក្រុមលេខ ៣ Tottenham Hotspur មាន ៦៤ពិន្ទុ និងក្រុមលេខ ៤ Arsenal មាន ៦៣ពិន្ទុ ដែលក្រុមទាំងពីរនេះលេងបាន ៣២ប្រកួត។ ប៉ុន្តែស្រដៀងគ្នានឹង Barcelona ដែរ យ៉ាងហោចណាស់ក៏ Liverpool នៅឈរលេខ ៣ដែរ បើសិនជាពួកគេចាញ់ ៥ប្រកួតដែលនៅសល់។

ងាកមកមើលនៅអ៊ីតាលីវិញ Juventus ដាច់ផឹងពី Top 4 តាំងពីមុនបញ្ចប់ខែមីនា ហើយក្លឹបសេះបង្កង់នេះ ឈរលើកំពូលតារាង ដោយមាន ៨១ពិន្ទុ ខណៈក្រុមលេខ ២ Napoli មាន ៦៤ពិន្ទុ ហើយ Inter Milan នៅលេខ ៣ មាន ៥៧ពិន្ទុ។ ដូច្នេះហើយ Juventus ហោចណាស់ក៏ធ្លាក់មកលេខ ២ដែរ ប្រសិនបើ ៧ប្រកួតទៀត ពួកគេបរាជ័យ។

ចំពោះ Paris Saint-Germain វិញ ក្លឹបមួយនេះ ប៊ិះនឹងលើកពានទៅហើយ បើសិនជាឈ្នះ Strasbourg កាលពីយប់ថ្ងៃអាទិត្យ។ ក្លឹបយក្សបារាំងនេះ លេងបាន ៣០ប្រកួតទេ តែមាន ៨១ពិន្ទុទៅហើយ ខណៈក្រុមលេខ ២ Lille លេងបាន ៣១ប្រកួត ហើយមានតែ ៦១ពិន្ទុប៉ុណ្ណោះ៕