OnLeaks ដែល​ជា​គណនី​ Twitter ដ៏​ល្បី​មួយ​តែង​​បញ្ចេញ​ដំណឹង​ច្បាស់ៗ​​ទាក់ទង​នឹង​ចំណុច​ពិសេស​នៃ​ស្មាតហ្វូន​ដែល​មិន​ទាន់​ប្រកាស​ចេញ​នោះ​ បាន​បញ្ចេញ​រូបភាព​ជា​ច្រើន​សន្លឹក​ដែល​អះអាង​ថា​ជា​​​រូបរាង​ចុង​ក្រោយ​នៃ​ iPhone ជំនាន់​ថ្មី ដែល​ស្នង​តំណែង​ពី iPhone XS។

iPhone ជំនាន់​ថ្មី​នេះ​គេ​បាន​ឲ្យ​ឈ្មោះ​ថា iPhone XI (iPhone 11)។ ផ្នែក​ខាង​ក្រោយ​របស់​វា​គឺ​មាន​លក្ខណៈ​ខុស​ពី iPhone XS ត្រង់​ថា​ មាន​កាមេរ៉ា​រហូត​ដល់​ ៣ គ្រាប់ និង​មាន​ការ​រៀប​ចំ​ជា​ដុំ​បួន​ជ្រុង។ កាមេរ៉ា ៣ នេះ​រំពឹង​ថា​នឹង​មាន​កាមេរ៉ា​មេ, កាមេរ៉ា​ប្រភេទ Telephoto និង​កាមេរ៉ា​ថ្មី​គឺ​ប្រភេទ Wide-Angle។

នៅ​ផ្នែក​ខាង​មុខ​វិញ​គឺ​មាន​រចនាបថ​ដដែល​ ដោយ​មាន​អេក្រង់​ OLED ទំហំ ៥,៨ អ៊ីញ ពោល​ដូច​ជា​ iPhone X និង iPhone XS ដែរ។ គេ​មិន​ប្រទះ​ឃើញ​រន្ធ​ USB-C នៅ​លើ iPhone ជំនាន់​ថ្មី​នេះ​ទេ មាន​ន័យ​ថា​ Apple នៅ​តែ​បន្ត​ប្រើ​រន្ធ​ Lightning ដូច​ដើម។

គេ​រំពឹង​ថា​ Apple នឹង​ប្រកាស​ចេញ​អ្នក​ស្នង​តំណែង iPhone XR, iPhone XS និង iPhone XS Max នៅ​ខែ​កញ្ញា​ដូច​ឆ្នាំ​មុន ដោយ​នឹង​ចេញ​លក់​នៅ​សប្ដាហ៍​បន្ត​បន្ទាប់៕​

ប្រភព៖ GSMarena   ប្រែ​សម្រួល៖ សុខហេង