អ្នកគាំទ្រ Liverpool យ៉ាងតិច ៦នាក់ត្រូវបានចាប់ខ្លួនមុនថ្ងៃប្រកួតប៉ះនឹង Barca

2019-05-01 11:54:25
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកគាំទ្រក្លឹបអង់គ្លេស Liverpool ចំនួន ៦នាក់ ត្រូវបានប៉ូលិសទីក្រុងបាសេឡូណា ចាប់ខ្លួន កាលពីល្ងាចថ្ងៃអង្គារកន្លង ពោលគឺមួយថ្ងៃមុនការប្រកួតជើងទី១ នៃវគ្គពាក់កណ្ដាលផ្ដាច់ព្រ័ត្រ UEFA Champions League រវាងក្លឹប Barcelona និងក្លឹប Liverpool។

មូលហេតុនៃការចាប់ខ្លួននេះគឺដោយសារតែ ការបង្កភាពចលាចល ពីសំណាក់ជនជាតិអង់គ្លេសដែលគេកំណត់អត្តសញ្ញាណបានជាអ្នកគាំទ្រ Liverpool កំឡុងពេលដែលអ្នកគាំទ្ររាប់រយនាក់ជួបជុំគ្នានៅសួនដ៏ល្បីក្នុងទីក្រុងបាសេឡូណាគឺ Placa Reial។

ពួកគេទាំងនោះបានច្រានអ្នកដែលនៅទីក្រុងបាសេឡូណាទម្លាក់ចូលក្នុងអាងបាញ់ទឹក ដែលសកម្មភាពនេះត្រូវបានគេថតវីដេអូ ហើយបង្ហោះចូលក្នុងបណ្ដាញសង្គម។ មិនតែប៉ុណ្ណោះ ពួកគេក៏បានបង្ករបួសស្នាមទៅលើបុគ្គលិកសណ្ឋាគារនៅតំបន់នោះរហូតដល់ទៅបែកច្រមុះទៀតផង នេះបើតាមកាសែត Mundo Deportivo។

ទិដ្ឋភាពអ្នកគាំទ្រ Liverpool រាំច្រៀងនៅ Placa Reial

បើតាមកាសែត Sport របស់អេស្ប៉ាញ ពួកអ្នកគាំទ្រទាំងនេះ ក៏បានគប់ស្រាបៀចំនួនជិត ៣,០០០កំប៉ុងទៅកាន់ក្រុមប៉ូលិសទៀតផង។

យ៉ាងណាមិញ អ្នកគាំទ្រ Liverpool បានបង្ហោះក្នុងបណ្ដាញសង្គមថា ក្រុមប៉ូលិសប្រតិកម្មជ្រុលហួសហេតុពេក ដោយពួកគេគ្រាន់តែច្រៀង សប្បាយ និងផឹកស៊ី នៅទីនោះ ប៉ុន្តែពួកប៉ូលិសបានមករុញ និងវាយពួកគេដោយគ្មានមូលហេតុ៕

វីដេអូដែលអ្នកគាំទ្រ Liverpool រុញទម្លាក់អ្នកទីក្រុងបាសេឡូណាចូលក្នុងអាងទឹក៖