ធ្លាប់តែឭពីបុណ្យរ៉ាម៉ាទន! តោះស្វែងយល់ខ្លះៗពីប្រវត្តិ និងដើមកំណើតពិធីបុណ្យនេះ
- 2019-05-07 03:18:01
- ចំនួនមតិ 0 | ចំនួនចែករំលែក 0
ធ្លាប់តែឭពីបុណ្យរ៉ាម៉ាទន! តោះស្វែងយល់ខ្លះៗពីប្រវត្តិ និងដើមកំណើតពិធីបុណ្យនេះ
ចន្លោះមិនឃើញ
ជារៀងរាល់ឆ្នាំអ្នកកាន់សាសនាឥស្លាមនៅជុំវិញពិភពលោកបានប្រារព្ធពិធីបុណ្យរ៉ាម៉ាទន ដែលជាពិធីបុណ្យតមអាហារធំមួយរបស់សាសនិកឥស្លាម។ រ៉ាម៉ាទន ជាខែទី៩នៃនៅក្នុងប្រតិទិនរបស់ឥស្លាម និងជាខែពិសិដ្ឋរបស់វប្បធម៌ឥស្លាមផងដែរ។
រ៉ាម៉ាទនជាខែមួយនៅក្នុងខែទាំង១២របស់ឥស្លាម និងក៏ជាផ្នែកមួយរបស់ប្រតិទិនអារ៉ាប់បុរាណផងដែរ។ ពិធីបុណ្យនេះប្រែប្រួលទៅតាមប្រតិទិនឥស្លាម ហើយឆ្នាំនេះបានចាប់ផ្ដើមនៅថ្ងៃទី៦ ខែឧសភា ឆ្នាំ២០១៩ និងបញ្ចប់ទៅវិញនៅរយៈពេល២៩ ឬ៣០ថ្ងៃអាស្រ័យលើការពិនិត្យលើថ្ងៃខ្នើតលើប្រតិទិន។
ឈ្មោះរ៉ាម៉ាទន (Ramadan)មកពីពាក្យដើមអារ៉ាប់ «Arramad» ។ អ្នកកាន់សាសនាឥស្លាមជឿថានៅឆ្នាំ៦១០នៃគ្រឹស្តសករាជមានទេវតា Gabriel បានបង្ហាញខ្លួននៅចំពោះមុខព្យាការី(អ្នកនាំសារ) Muhammad និងបានបង្ហាញនូវគម្ពីកូរអាន (Quran) ដែលជាគម្ពីពិសិដ្ឋរបស់សាសនាឥស្លាម។
ការបង្ហាញគម្ពីកូរអានដល់ព្យាការីMuhammadនេះត្រូវគេជឿងថាបានកើតឡើងនៅក្នុងខែរ៉ាម៉ាទន។ អ្នកកាន់សាសនាឥស្លាមបានតម អាហារនៅក្នុងអំឡុងខែនេះដើម្បីរំឭកដល់ការទទួលបានគម្ពីកូរអាននេះ។
គម្ពីកូរអានមានចំនួន១១៤ជំពូក ដែលជាព្រះបន្ទូលផ្ទាល់របស់ព្រះAllah។ ក្នុងឱកាសនៃពិធីបុណ្យរ៉ាម៉ាទន អ្នកកាន់សាសនាឥស្លាមបានផ្សារភ្ជាប់ចំណងទាក់ទងជាមួយព្រះAllah កាន់តែខ្លាំង។ ពួកគេធ្វើដូចនេះ តាមរយៈការបួងសួង និងសូត្រគម្ពីកូរអាន ដោយការយកចិត្តទុកដាក់ លះបង់ ជៀសវាងការនិយាយដើមគ្នា ការនិយាយកុហក និងជម្លោះ។
ក្នុងរយៈពេលនៃពិធីបុណ្យនេះសាសនិកឥស្លាមមិនបរិភោគទឹក និងតមការរួមភេទគិតចាប់ពីថ្ងៃរះដល់ថ្ងៃលិច។ ការតមអាហារជាកាតព្វកិច្ចរបស់ឥស្លាមសាសនិកគ្រប់រូប លើកលែងតែក្មេងមានអាយុក្រោម១២ឆ្នាំ អ្នកមានជំងឺ មានផ្ទៃពោះ អ្នកធ្វើដំណើរ និងមនុស្សចាស់។
ការទទួលទានអាហារជុំគ្នាជាឱកាសសម្រាប់ការជួបជុំរវាងសហគមន៍ផ្សេងៗ និងស្រាយបួសរួមគ្នា។ ការហូបអាហារពេលព្រឹកនៅមុនថ្ងៃរះប្រហែលជាម៉ោង៤ទាបភ្លឺ និងអាហារពេលល្ងាចបន្ទាប់ពីថ្ងៃលិចនៅប្រហែលម៉ោង៧ និង៣០នាទី។
ដោយហេតុថាព្យាការី Mohammadស្រាយបួសដោយទទួលទានបាយ និងទឹក សាសនិកឥស្លាមក៏ទទួលទានដូចគ្នានេះដែរ ហើយក៏មានដែរបង្អែម និងផ្លែឈើ។ ការទទួលទានបាយបានផ្ដល់នូវជីវជាតិសម្រាប់រាងកាយ ពិសេសជាតិស្ករ ដែលល្អសម្រាប់រាងកាយដែលបានតមអាហារនាពេលថ្ងៃ។
នៅថ្ងៃចុងបញ្ចប់នៃពិធីបុណ្យនេះ សាសនិកឥស្លាមបានរួមគ្នាធ្វើពិធីរយៈពេលបីថ្ងៃ បួសសួងរួមគ្នា ហូបអាហាររួមគ្នា ប្ដូរអំណោយគ្នា និងបួងសួងដល់សាច់ញាតិដែលបានបាត់បង់ជីវិតឲ្យបានរួចផុតពី ទុក្ខទាំងឡាយជាដើម៕