ឡៅ ចិត្រា ទាត់៨ជើងផ្ដួលថៃផុយៗ ឡើងទៅចាំវគ្គផ្ដាច់ព្រ័ត្រខ្សែក្រវាត់ប្រាក់

2019-05-21 08:25:21
ចំនួនមតិ 0 | ចំនួនចែករំលែក 0

ចន្លោះមិនឃើញ

ជើងខ្លាំងមកពីក្លឹបទ័ពពិសេសឆត្រយោង ៩១១ ឡៅ ចិត្រា ទាត់ត្រឹម៨ជើងប៉ុណ្ណោះផ្ដួលថៃនៅទឹកទី១ បានឡើងទៅវគ្គផ្ដាច់ព្រ័ត្រខ្សែក្រវាត់ប្រាក់ សង្វៀន PNN កាលពីថ្ងៃអាទិត្យ ទី១៩ ខែឧសភា ២០១៩ កន្លងទៅនេះ។

អ្នកប្រដាល់វ័យក្មេងកំពុងឡើងកូដ ឡៅ ចិត្រា ប្រើពេលត្រឹមកន្លះទឹកប៉ុណ្ណោះ ក្នុងជំនួបចាញ់ធ្លាក់នៃកម្មវិធីដណ្ដើមខ្សែក្រវាត់ទឹកប្រាក់១ម៉ឺនដុល្លាររបស់សង្វៀន PNN សប្ដាហ៍មុននេះ។ ជើងខ្លាំងរបស់កម្ពុជារូបនេះមិនសូវស្ទាបស្ទង់សមត្ថភាពច្រើននោះទេ ពោលចេញកណ្ដាប់ដៃមួយៗ និងទាត់ខ្លាំងៗតែម្ដង។

ចិត្រា ប្រើជើងឆ្វេង និងស្ដាំរបស់គេត្រឹម៨ជើងប៉ុណ្ណោះ ធ្វើឲ្យអាជ្ញាកណ្ដាលរាប់កីឡាករថៃម្ដង ហើយក្រោយមកទៀត អាជ្ញាកណ្ដាលសម្រេចបញ្ឈប់ការប្រកួតត្រឹមពាក់កណ្ដាលទឹកទី១តែម្ដងទៅ ព្រោះមើលឃើញថាអ្នកប្រដាល់ឆ្លងដែន Jaroenlaph Sitwirachat ឈឺដៃ និងគ្មានសមត្ថភាពប្រកួតបន្តទៀតទេ។

រូបភាពផ្ដល់ឲ្យពី PNN

ឡៅ ចិត្រា ផ្ដួលថៃ Jaroenlaph Sitwirachat ក្នុងទឹកទី១ បានឡើងទៅវគ្គផ្ដាច់ព្រ័ត្រដណ្ដើមខ្សែក្រវាត់ប្រាក់ជាបន្តទៀត ដោយរង់ចាំរវាង សារឿន ចាន់ ប៉ះជាមួយថៃ សប្ដាហ៍នេះសិនទើបដឹងថានរណាត្រូវប៉ះប្អូនប្រុស ឡៅ ចន្រ្ទា។ ប្រសិនបើកីឡាកររូបណាឈ្នះខ្សែក្រវាត់ប្រាក់នេះហើយ នឹងអាចបន្តដំណើរទៅជុំទី២ដណ្ដើមខ្សែក្រវាត់មាសបន្តទៀតរបស់សង្វៀន PNN ដែលមានរង្វាន់ដល់ទៅ១ម៉ឺនដុល្លារ៕

វីដេអូប្រកួត៖