ពាន«ជើងឯកវិទ្យាល័យ»អាចផ្តល់ឱកាសយុវជនល្អៗឆ្ពោះទៅក្លឹបអាជីព

2019-05-24 04:22:07
ចំនួនមតិ 0 | ចំនួនចែករំលែក 0

ចន្លោះមិនឃើញ

ការប្រកួតពាន់រង្វាន់ «ជើងឯកវិទ្យាល័យ» លើកទី១ ឆ្នាំ២០១៩ នឹងចាប់ផ្ដើមនៅថ្ងៃទី៦ ខែមិថុនា ខាងមុខនេះ ដោយមាន៩ក្រុមចូលរួមមកពីគ្រឹះស្ថានចំណេះដឹងទូទៅរបស់រដ្ឋ និងឯកជន។

សន្និសីទកាសែត

ក្នុងសន្និសីទសារព័ត៌មានកាលពីម្សិលមិញ ថ្ងៃទី២៣ ខែឧសភា បានឲ្យដឹងថា ការប្រកួតជើងឯកកម្រិតវិទ្យាល័យនេះត្រូវបានរៀបចំឡើងដោយមានកិច្ចប្រតិបត្តិការរវាងសហភាពសហព័ន្ធយុវជនកម្ពុជារាជធានីភ្នំពេញនិងសមាគមក្លឹបបាល់ទាត់ បឹងកេត។ គោលបំណងលើកស្ទួយវិស័យកីឡាបាល់ទាត់នៅកម្ពុជាឲ្យមានសកម្មភាពរស់រវើក និងរីកចម្រើន។ ជាពិសេសសំដៅដល់ការបណ្ដុះស្មារតីឲ្យស្រឡាញ់កីឡា សុខភាព ចៀសឆ្ងាយពីគ្រឿងញៀន សម្រិតសម្រាំងធនធានកីឡាករបន្តវេន ព្រមទាំងរឹតចំណងមិត្តភាព សាមគ្គីភាពរវាងសិស្សានុសិស្សពីវិទ្យាល័យមួយទៅវិទ្យាល័យមួយ។

លោក បែ មករា

លោក បែ មករា អ្នកចាត់ការទូទៅបឹងកេត បាននិយាយថា ៖«គោលបំណងរបស់ក្លឹបដែលចូលរួមរៀបចំព្រឹត្តិការណ៍នេះឡើងគឺយើងចង់បានកីឡាករថ្មីៗល្អៗបន្ថែមទៀត ដូច្នេះទើបគ្រប់ការប្រកួតយើងមានក្រុមបច្ចេកទេសតាមដានកីឡាករដែលល្អពិតប្រាកដ។ សាលាខ្លះអាចមានកីឡាករល្អមួយឬពីរ ហើយសាលាខ្លះទៀតអាចមានច្រើននាក់ អីចឹងបើយើងឃើញថា ល្អ យើងនឹងជ្រើសរើសចូលហាត់ជាមួយថ្នាលយុវជនបឹងកេត»។

ជើងឯកវិទ្យាល័យដែលមានក្រុមចូលរួម៩នេះត្រូវប្រកួតតាមប្រព័ន្ធលីគពីរជុំ (Two round league) ដែលក្រុមនីមួយៗត្រូវប៉ះគ្នាពីរដង។ បន្ទាប់ពីការប្រកួតចប់ទាំងពីរ ក្រុមដែលទទួលបានពិន្ទុច្រើនជាងគេ នឹងក្លាយជាជើងឯកតែម្តង។

ក្រុមវិទ្យាល័យដែលចូលរួមប្រកួតមាន

វិទ្យាល័យ ច្បារអំពៅ
វិទ្យាល័យ ចាក់អង្រែ
វិទ្យាល័យ បឹងត្របែក
វិទ្យាល័យ ជាស៊ីម សាមគ្គី
វិទ្យាល័យ ព្រះស៊ីសុវត្ថិ
សាលា វេស្ទឡាញន៍
វិទ្យាល័យ ឬស្សីកែវ
វិទ្យាល័យ ហ៊ុនសែន ភ្នំពេញថ្មី
វិទ្យាល័យ ឥន្ទ្រទេវី

ប្រាក់រង្វាន់

លេខ១៖ ទទួលបាន ៦០លានរៀល និង មេដាយ ៣០គ្រឿង
លេខ២៖ ទទួលបាន ៤០លានរៀល និង មេដាយ ៣០គ្រឿង
លេខ៣៖ ទទួលបាន ២០លានរៀល និង មេដាយ ៣០គ្រឿង
រួមទាំងមានប្រាក់រង្វាន់លើកទឹកចិត្តមួយចំនួនទៀតផ្ដល់ជូន កីឡាករឆ្នើម អ្នកចាំទីល្អប្រចាំរដូវកាលទី១ផង៕