ស្រុកខ្មែរអ្នកជិះ Lamborghini ពេលខូចត្រូវធ្វើម៉េច?

2019-06-02 05:28:18
ចំនួនមតិ 0 | ចំនួនចែករំលែក 0

ចន្លោះមិនឃើញ

Lamborghini ជាប្រភេទរថយន្តស្ព័រមានតម្លៃថ្លៃកប់ពពក មានតែសេដ្ឋីស្រុកខ្មែរទើបមានជិះ។ យ៉ាងណាមិញបើសិន Lamborghini តម្លៃក្បែរលានដុល្លារដែលអ្នកមានក្នុងស្រុកកំពុងតែជិះនោះមានបញ្ហាឬខូចត្រង់ផ្នែកណាមួយវិញ ម្ចាស់ឡានមានតែចេញថ្លៃយន្តហោះជួលជាងពីបរទេសមកជួសជុលដល់ស្រុកខ្មែរតែប៉ុណ្ណោះ។

រូបថត៖ ហ្វេសប៊ុក Love Story II

លោកយី ដែលជាអ្នកជំនាញផ្នែកទីផ្សាររបស់ក្រុមហ៊ុន Porsche ភ្នំពេញ បង្ហើបថា បើតាមមិត្តភ័ក្ដិរបស់លោកពីរ បីនាក់ស្រុកខ្មែរដែលជិះ Lamborghini មានតែជម្រើសមួយប៉ុណ្ណោះគឺហៅជាងជំនាញពីបរទេសមកជួសជុលឡាន Lamborghini ផ្ទាល់ដល់ស្រុកខ្មែរ ពេលខូចម្តងៗ។

ដោយឡែកលោក គីម ហួត ថៅកែហ្គារ៉ាស់ច្នៃឡាន VKH ក៏អះអាងដូចគ្នាដែរថា ដោយសារស្រុកខ្មែរពុំមានអ្នកជំនាញជួសជុលរថយន្តស្ព័រដូច Lamborghini ដូច្នេះហើយម្ចាស់ឡានត្រូវតែចេញថ្លៃសំបុត្រយន្តហោះហៅជាងជំនាញពីបរទេសមកជួសជុលដល់ស្រុកខ្មែរតែម្តង។ លោកថា ជាងទាំងនោះភាគច្រើនមកពីប្រទេសថៃ។

លោកបន្ថែមថាចំពោះម្ចាស់ឡាន Lamborghini ខ្លះត្រូវដឹករថយន្តខ្លួនទៅក្រៅប្រទេស ដូចជាថៃជាដើម ដើម្បីជួសជុល។ សម្រាប់គ្រឿងបន្លាស់ ម្ចាស់រថយន្តត្រូវកុម្ម៉ង់ទិញពីបរទេសផ្ទាល់សម្រាប់ការជួសជុលក្នុងស្រុក៕

អត្ថបទ៖ ប៉ែត ផាន់និត