មានដំណឹង ព្រាប សុវត្ថិ នាំកូនៗចេញពីទឹកដីលោក ដូណាល់ ត្រាំ ទាំងនៅសល់ចំហាយគាំទ្រ

2019-06-04 07:52:11
ចំនួនមតិ 0 | ចំនួនចែករំលែក 0

ចន្លោះមិនឃើញ

ព្រាប សុវត្ថិ បាននាំក្រុមគ្រួសារ(កូនទាំង៣ និងភរិយា)បូករួមទាំងក្រុមភ្លេងផង សរុបមានគ្នា ៩នាក់ ចាកចេញពីសហរដ្ឋអាមេរិកមកដល់កម្ពុជាហើយកាលពីប៉ុន្មានថ្ងៃមុននេះ ក្រោយពីបញ្ចប់បេសកកម្មរយៈពេល ២ខែនៅលើទឹកដីលោក ដូណាល់ ត្រាំ។

ដំណើររបស់ក្រុមរបស់តារាចម្រៀងកំពូលរបស់កម្ពុជារូបនេះ មិនត្រូវបានគេបើកចំហឡើយ ក្រោយពីការសម្ដែងលើកចុងក្រោយរបស់លោកនៅឡូវ៉ែល ត្រូវបានបញ្ចប់តាំងពីថ្ងៃទី ២៦ ឧសភា។ ប៉ុន្តែតាមព័ត៌មានលោកបានមកដល់កម្ពុជា តាំងពីថ្ងៃ ៣០ ឧសភា ម្ល៉េះ។

ចំពោះការលាក់ការសម្ងាត់នៃដំណើររបស់ក្រុមលោក ព្រាប សុវត្ថិ នេះ ត្រូវបានប្រភពមួយបង្ហើបថា ព្រោះតែលោក ចង់ធ្វើឲ្យសមាជិកក្រុមគ្រួសារផ្សេងទៀតរបស់លោកនៅស្រុកខ្មែរ មានការភ្ញាក់ផ្អើល ក្រោយពីលោកចេញចោលផ្ទះតាំងពីមុនបុណ្យចូលឆ្នាំខ្មែរ។

ដំណើរចាកចេញពីអាមេរិកលើកនេះ មានដំណឹងថា ចំហាយការគាំទ្ររបស់លោកនៅតែមានខ្លាំងនៅឡើយ បើទោះជាមុនចេញទៅ មានដំណឹងខ្លះថា មនុស្សមួយចំនួននឹងពហិការមិនចូលរួមក៏ដោយ។ តាមលោក ហង្ស ឈា បុគ្គលម្នាក់ក្នុងចំណោមអ្នកសហការរៀបចំដំណើររបស់ក្រុមលោក ព្រាប សុវត្ថិ មកសហរដ្ឋអាមេរិកលើកនេះ បានឲ្យដឹងថា តាមត្រូវ គឺតារាលេខ១ហង្សមាស អាចនៅបន្តការសម្ដែងបន្តទៀត។

លោក ឈាន លើកឡើងបន្តទៀតថា អ្នកគាំទ្ររបស់លោកមួយចំនួនធំ បានទទូចឲ្យលោក និងក្រុមរបស់លោកបន្ត ក៏ដូចជាពន្យារពេលការវិលត្រឡប់មកកម្ពុជាវិញ។ ប៉ុន្តែអ្វីៗមិនអាចទៅរួចដោយសារតែ លោក ព្រាប សុវត្ថិ មិនមានសល់ពេលសម្រាប់ធ្វើដូច្នោះឡើយ។ "អ្នកគាំទ្រច្រើន ចង់ឲ្យគាត់បន្តនៅសម្ដែងទៀត ប៉ុន្តែអត់អាចទៅរួចដោយសារតែ បង សុវត្ថិ គាត់ជាប់កុងត្រាការងារគេច្រើននៅស្រុកខ្មែរនេះ។ អីចឹងហើយ គាត់ត្រូវតែមក"។ ហង្ស ឈា បង្ហើប។

២ ខែនៅសហរដ្ឋអាមេរិក តាមប្រភពខាងលើដដែល បញ្ជាក់ថា ក្រុមរបស់លោក ព្រាប សុវត្ថិ បានបន្សល់ផ្លែផ្កាជាច្រើនសម្រាប់ការងាររបស់លោកដែលជាអ្នករៀបចំនាំយកពួកគេមកកាន់អាមេរិក។ ដូច្នេះហើយ យោងទៅលើហេតុផលនេះ លោក ហង្ស ឈា បង្ហើបថា លោកអាចនឹងនាំយកពួកគេមកកាន់សហរដ្ឋអាមេរិកជាថ្មីទៀតនាពេលខាងមុខ ក្នុងនោះ ប្រសិនបើពេលវេលាសមស្របសម្រាប់ទាំងសងខាង ផែនការនោះ អាចនឹងកើតមាននៅឆ្នាំក្រោយតែម្ដង។

ព្រាប សុវត្ថិ បានចាកចេញពីកម្ពុជា តាំងពីថ្ងៃទី ២១ មីនា និងបានវិលមកដល់កម្ពុជាវិញនៅចុងខែ ឧសភា។ ក្រោយពីមកដល់ មានលេចលឺដំណឹងថា តារាចម្រៀងកំពូលរបស់កម្ពុជារូបនេះ គ្រោងនឹងទៅអូស្ត្រាលីទៀតនៅខែក្រោយ៕