មុនរើសជំនាញសិក្សា ឬការងារធ្វើចាំបាច់ណាស់ត្រូវចេះវាយតម្លៃខ្លួនឯងឲ្យបានត្រឹមត្រូវបំផុត

2019-06-06 22:00:52
ចំនួនមតិ 0 | ចំនួនចែករំលែក 0

ចន្លោះមិនឃើញ

ស្គាល់ខ្លួនឯងបានច្បាស់ ជាកត្តាសំខាន់មួយដែលមនុស្សម្នាក់ៗត្រូវមាន។ ព្រោះវាអាចឲ្យមនុស្សស្គាល់ពីទីតាំងដែលខ្លួនកំពុងស្ថិតនៅ ស្ថានភាពដែលខ្លួនកំពុងជួបប្រទះ និងគោលដៅដែលត្រូវទៅ។ ការស្គាល់ខ្លួនឯង អាចជួយឲ្យមនុស្សអភិវឌ្ឍខ្លួនដោយមានប្រសិទ្ធភាព និងត្រូវតាមអ្វីដែលខ្លួនស្រលាញ់ពេញចិត្ត។

រូបភាពតំណាង

ដើម្បីស្គាល់ខ្លួនឯងបាន មនុស្សម្នាក់ៗ ត្រូវចេះវាយតម្លៃខ្លួនឯង។ ដើម្បីវាយតម្លៃខ្លួនឯង ឲ្យបានត្រឹមត្រូវភាគច្រើនបំផុត មុននឹងជ្រើសមុខវិជ្ជាសិក្សា ឬរកការងារធ្វើនោះ គេត្រូវមើលទៅលើចំណុចបួនយ៉ាងសំខាន់ៗ ដែលនឹងរៀបរាប់ខាងក្រោម។ ចំណុចទាំងនេះត្រូវបានដកស្រង់ចេញពី www.thebalancecareers.com ។

តម្លៃ

អ្នកឲ្យតម្លៃទៅលើអ្វី ដែលអ្នកគិតវាជាសំខាន់ក្នុងជីវិតអ្នក។ អ្នកឲ្យតម្លៃលើចំណូល ឬការងារសង្គម ឬការអប់រំ វាអាស្រ័យលើនិស្ស័យរបស់អ្នក។ បើអ្នកឲ្យតម្លៃទៅលើមុខវិជ្ជាណា ការងារណា អ្នកនឹងប្ដូរផ្ដាច់ជាមួយមុខវិជ្ជានោះ ការងារនោះ។

តម្លៃមានពីរយ៉ាង គឺតម្លៃពិតខាងក្នុង និងតម្លៃសន្មតខាងក្រៅ។ តើមានន័យដូចម្ដេច?

តម្លៃពិតខាងក្នុង គឺបានន័យថាគុណសម្បត្តិ ដែលមាននៅក្នុងការងារស្រាប់ និងបានជួយរួមចំណែកក្នុងសង្គម។ រីឯតម្លៃសន្មតខាងក្រៅ គឺសំដៅដល់មុខមាត់ការងារ និងប្រាក់ចំណូលដែលទទួលបាន។

និយាយពីគុណតម្លៃក្នុងករណីនេះអ្នកគួរគិតដល់សំណួរចំនួន៤៖

១- តើប្រាក់ខែច្រើនពិតជាសំខាន់សម្រាប់អ្នក?

២- តើការទំនាក់ទំនងជាមួយមនុស្សក្នុងសង្គមវាសំខាន់សម្រាប់ការរៀន និងការងារអ្នកដែរទេ?

៣- តើអ្នកឲ្យតម្លៃលើការរួមចំណែកកិច្ចការសង្គម ក្នុងការរៀន និងការងារដែរទេ?

៤- តើកិត្យានុភាពនៃការងារវាសំខាន់សម្រាប់អ្នកឬទេ?

ចំណាប់អារម្មណ៍

ចំណាប់អារម្មណ៍តែងតែពញ្ញាក់ចិត្តមនុស្សឲ្យចង់ដឹងចង់ស្គាល់អ្វីមួយ។ បើនិយាយពីការងារសារព័ត៌មានវិញ អ្នកខ្លះចាប់អារម្មណ៍រឿងនយោបាយ អ្នកខ្លះរឿងសេដ្ឋកិច្ច អ្នកខ្លះកីឡា ឬសិល្បៈជាដើម។ ការរៀនដូចគ្នា សិស្សខ្លះចាប់អារម្មណ៍លើកសិកម្ម ខ្លះទៀតទាក់ចិត្តលើប្រព្រឹត្តិកម្មគីមី។ល។ សួរថាតើអ្នកចាប់អារម្មណ៍លើអ្វី? អ្នកត្រូវឆ្លើយសំណួរនេះឲ្យចេញ។ ព្រោះចំណាប់អារម្មណ៍ធ្វើឲ្យមនុស្សម្នាក់ចង់ចេះ ចង់ដឹង ចង់ធ្វើ និងតាមដានបំផុតនូវអ្វីដែលខ្លួនឯងបានចាប់អារម្មណ៍លើ។

បុគ្គលិកលក្ខណៈ

អ្នករៀន និងអ្នករកការងារធ្វើក៏ត្រូវដឹងពីបុគ្គលិកលក្ខណៈរបស់ខ្លួនឲ្យបានច្បាស់ដែរ។ បុគ្គលិក លក្ខណៈនៃមនុស្សម្នាក់ៗ គឺសំដៅដល់៖

របៀបនៃការទទួលកម្លាំងចិត្តនៃមនុស្សនោះ (តាមរយៈអ្នកដទៃ និងក្នុងខ្លួនផ្ទាល់)
ការដឹង និងការទទួលដំណឹង
ការទទួលអារម្មណ៍ និងការគិតពិចារណា
ការវិនិច្ឆ័យ និងសម្រេចចិត្ត
ទស្សនវិស័យ និងការកំណត់គោលដៅ។

នេះជាការលើកឡើងនៃទ្រឹស្ដីរបស់លោក Carl Jung អ្នកជំនាញផ្នែកបុគ្គលិកលក្ខណៈ។

សមត្ថភាព ឬសម្បទា

ពូកែខាងអ្វី? អ្នកត្រូវរកឲ្យឃើញ។ បើនិយាយពីការរៀននៅថ្នាក់មធ្យមសិក្សាក្នុងចំណោមមុខវិជ្ជាទាំងជាង១០មុខ អ្នកអាចធ្វើបានល្អជាងគេលើ គណិតសាស្ត្រ ភាសាខ្មែរ សីលធម៌-ពលរដ្ឋ រូប គីមី...។ បើនិយាយពីការងារ អ្នកអាចស្ទាត់ និងធ្វើបានល្អលើការសរសេរ និយាយរៀបរាប់ (អភិប្រាយ) ថតរូប សរសេរកូដ...។

នៅពេលអ្នកធ្វើការបានល្អ អ្នកនឹងសប្បាយចិត្ត ហើយចូលចិត្តធ្វើវាជារឿយៗ រហូតទទួលបានលទ្ធផលជាទីគាប់ប្រសើរ។ ម្យ៉ាងទៀតវាក៏ជួយឲ្យអ្នកមានការតាំងចិត្តខ្ពស់ក្នុងការងារ និងការសិក្សា និងមិនងាយបាក់ទឹកចិត្តផងដែរ។

អត្ថបទ៖ ឈិន ធារ៉ាត់