អ្វីៗហួសពេលហើយ នាយ ហុងដា បញ្ឈប់ការប្រកាសលក់ផ្ទះវិញ!

2019-06-14 05:48:44
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រោយពីបានប្រកាសលក់ផ្ទះតែមួយគត់របស់ខ្លួនដែលមានទីតាំងនៅម្ដុំផ្សារឈូកមាស កាលពីចុងខែឧសភាយ៉ាងតក់ក្រហល់នោះ នៅពេលនេះ នាយ ហុងដា បញ្ជាក់ថា លោក បញ្ឈប់បំណងចង់លក់ផ្ទះផ្ទាល់ខ្លួននោះទៀតហើយ។

“ឈប់លក់ហើយ ឈប់លក់ហើយប្អូន លក់ទៅធ្វើអីបើឪពុកលែងនៅហើយ!”។ នាយ ហុងដា ថ្លែង។

នាយ ហុងដា បានប្រកាសលក់ផ្ទះរបស់ខ្លួនកាលពីថ្ងៃទី ២៩ ឧសភា ២០១៩ ដោយសារតែលោកមានធុរៈបន្ទាន់ ពោលគឹត្រូវការយកប្រាក់ខ្លះទៅសងបំណុលគេ និងខ្លះទៀត ទុកសម្រាប់ព្យាបាលលោកឪពុកនាពេលនោះ ដែលអ្នកមានគុណមានជំងឺរលាកសួតធ្ងន់ធ្ងរ ត្រូវការប្រាក់បន្ទាន់ដើម្បីតទល់នឹងមច្ចុរាជ។ ប៉ុន្តែអ្វីៗ ដូចជាលឿនហួសការគិត ព្រោះរំលងបានតែ ២ថ្ងៃប៉ុណ្ណោះ លោកឪពុកបានចែកឋានគួរឲ្យសោកស្ដាយបំផុត។

“កាលហ្នុងលក់ គឺដើម្បីយកលុយមើលពុកហ្នឹង ដល់ឥឡូវគាត់លែងនៅហើយ លក់ធ្វើអីទៀត!”។ ផ្ទះនាយហុងដា ជាប្រភេទផ្ទះល្វែង១ជង់មាន ២ជាន់ ស្ថិតនៅផ្លូវកែងចម្ងាយត្រឹម ១០០ម៉ែត្រពីផ្សារឈូកមាស ដែលកាលប្រកាសលក់យ៉ាងតក់ក្រហល់នោះ នាយបញ្ជាក់ថា លក់ក្នុងតម្លៃជិត ១០ម៉ឺនដុល្លារអាមេរិក។ លោកបង្ខំចិត្តលក់ ដើម្បីយកលុយ ទៅស្រាយបំណុល ដែលនាយ អះអាងថា មានចំនួនច្រើន សល់ពីការចំណាយមើលជំងឺឪពុក។

ប្រាក់នៅសល់ គឺដើម្បីបន្តព្យាបាលលោកឪពុក ព្រោះពេលនោះ លោកអស់លទ្ធភាពទៅហើយ ទើបបង្ខំចិត្តលក់ ដោយសុខចិត្តចុះទៅរស់នៅជាមួយប្អូនវិញ។ ប៉ុន្តែក្រោយអ្វីផ្លាស់ប្ដូរលឿនហួសការគិតដល់ លោកបញ្ជាក់ថា សុខចិត្តរក្សាអចលនទ្រព្យនេះដដែលវិញ សម្រាប់ស្នាក់នៅផង និងអាស្រ័យផង។

លោក ហុងដា ប្រាប់ថា បច្ចុប្បន្នផ្ទះរបស់លោក ខាងក្រោមបានជួលទៅឲ្យគេបើកលក់ថ្នាំពេទ្យ ដោយបានប្រាក់មួយចំនួន ដើម្បីទប់ទល់ជីវភាព បន្ថែមពីលើការងារសិល្បៈផង៕

អត្ថបទ៖ ទារិកា