គួរឲ្យរន្ធត់! ស្លាប់យ៉ាងហោច ១៤នាក់ ក្រោយរលំតង់សង្កត់មនុស្សនៅឥណ្ឌា (មានវីដេអូ)
- 2019-06-24 03:40:29
- ចំនួនមតិ 0 | ចំនួនចែករំលែក 0
គួរឲ្យរន្ធត់! ស្លាប់យ៉ាងហោច ១៤នាក់ ក្រោយរលំតង់សង្កត់មនុស្សនៅឥណ្ឌា (មានវីដេអូ)
ចន្លោះមិនឃើញ
យ៉ាងហោចណាស់មនុស្ស ១៤នាក់ ត្រូវបានស្លាប់និងប្រមាណ ៥០នាក់ផ្សេងទៀតរងរបួសក្រោយពេលតង់ដ៏ធំរលំសង្កត់មនុស្សនៅក្នុងពិធីសាសនាក្នុងរដ្ឋ Rajasthan ប្រទេសឥណ្ឌាកាលពីថ្ងៃអាទិត្យកន្លងទៅ។
យោងតាមសារព័ត៌មាន NDTV ឲ្យដឹងថាហេតុការណ៍នេះកើតឡើងនៅជិតវិហារ Rani Bhatiyani ក្នុងសង្កាត់ Barmer ប្រមាណជា ៥០០គីឡូម៉ែត្រពីទីក្រុង Jaipur។ មុនពេលកើតហេតុ ប្រជាជននៅក្នុងតំបន់ បានប្រមូលផ្ដុំគ្នាចូលរួមពិធីសាសនាមួយឈ្មោះ Ram Katha ដែលធ្វើឡើងនៅទីធ្លាសាលារៀន។ ក្រោយចាប់ផ្ដើមពិធីមិនបានប៉ុន្មានផង ស្រាប់តែមានភ្លៀងធ្លាក់ខ្លាំង និងខ្យល់បោកបក់យ៉ាងសាហាវរហូតបណ្ដាលឲ្យតង់រលំសង្កត់លើមនុស្សរាប់រយនាក់ដែលនៅក្នុងនោះ។
យោងតាមអាជ្ញាធរឲ្យដឹងថា តង់ដែលបានរលំនោះ បានសម្លាប់មនុស្សមួយចំនួនដោយសារគ្រោងដែក និងច្រើននាក់ផ្សេងទៀតរងរបួស។ លើសពីនេះ ក្នុងចំណោមជនរងគ្រោះទាំងអស់ មានអ្នកស្លាប់ដោយសារឆក់ខ្សែភ្លើងដែលគេដំឡើងម៉ាស៊ីនភ្លើងនៅជិតនោះ។ អាជ្ញាធរបានបើកការស៊ើបអង្កេតបន្ដជុំវិញករណីនេះដែលបណ្ដាលឲ្យមានអ្នកស្លាប់ជាច្រើននាក់។
ជាមួយគ្នានេះ នាយករដ្ឋមន្ត្រីឥណ្ឌាលោក Narendra Modi បានបង្ហោះសារចូលរួមរំលែកទុក្ខសម្រាប់ក្រុមគ្រួសារជនរងគ្រោះដែលបានស្លាប់ និងជូនពរឲ្យអ្នករងរបួសឆាប់ជាសះស្បើយផងដែរ៕
សូមទស្សនាវីដេអូខាងក្រោម ៖