Neuer ប្រាប់ថាគ្មានសង្ឃឹមឈ្នះ Ballon d'Or តែថា Ronaldo អាច...

2014-11-18 15:58:19
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកចាំទីដែលជួយអាល្លឺម៉ង់ឈ្នះពាន World Cup 2014, Manuel Neuer បានអះអាងថាខ្លួនគេមិនមានសង្ឃឹមថាអាចឈ្នះពាន FIFA Ballon d'Or ឆ្នាំនេះបានទេព្រោះលោកមិនសូវល្បីដូចខ្សែប្រយុទ្ធ Cristiano Ronaldo ឡើយ។

អ្នកចាំទីវ័យ២៨ឆ្នាំរូបនេះបាននិយាយប្រាប់កាសែត Kicker របស់អាល្លឺម៉ង់ថា៖ “ខ្ញុំជាកីឡាករធម្មតា មិនមែនជាឯកអគ្គរាជទូតអីដូច Ronaldo ទេ។ ហើយខ្ញុំក៏មិនចូលចិត្តដើរលើកម្រាលព្រំក្រហមអីនោះដែរ ត្រឹមដើរលើទីលានប្រកួតគឺគ្រប់គ្រាន់ហើយ។ បំណងតែមួយគត់របស់ខ្ញុំគឺធ្វើឱ្យបានល្អបំផុតនៅលើទីលានប្រកួត”។

លើសពីនេះទៅទៀត អតីតអ្នកចាំទីរបស់ក្រុម Schalke ខាងលើបានបន្ថែមទៀតថា៖ “Ballon d'Or ជាពានដែលគេឱ្យទៅកីឡាករណាដែលអាចរកគ្រាប់បាល់បានច្រើន បង្កើតឱកាសច្រើន និងបញ្ជូនបាល់ឱ្យមិត្តរួមក្រុមបានច្រើន។ ហើយចំពោះអ្នកចាំទីវិញតាំងពីឆ្នាំ១៩៦៣មក ពាននេះមិនដែលបានមកអ្នកចាំទីទេ ហើយខ្សែការពារវិញគឺមានតែ២នាក់គត់ដែលអាចទទួលបានវាកាលពី២០ឆ្នាំមុន ហើយក្រៅពីនេះគឺភាគច្រើនជាខ្សែប្រយុទ្ធ។ សម្រាប់ខ្ញុំអ្នកឈ្នះពានមួយនេះ Ronaldo ល្អបំផុតហើយ”។

បេក្ខភាព២៣នាក់ដែលបានប្រកាសកាលពីថ្ងៃទី២៨ខែតុលានោះនឹងត្រូវជម្រុះសល់៣នាក់នៅថ្ងៃទី១ខែធ្នូខាងមុខនេះហើយ ខណៈការប្រកាសលទ្ធផលអ្នកឈ្នះ នឹងធ្វើឡើងក្នុងកម្មវិធី FIFA Ballon d’Or gala ដែលរៀបចំនៅទីក្រុង Zurich ប្រទេសស្វីស នាថ្ងៃទី១២ ខែមករា ឆ្នាំ២០១៥។

ចាំមើលដល់ថ្ងៃប្រកាសលទ្ធផល តើការគិតរបស់ Manuel Neuer អាចពិតដែរឬទេ?

ចុចអាន៖ ជក់ចិត្ត! ព័រទុយហ្គាល់ CR7 ប៉ះអាហ្សង់ទីន Messi យប់នេះ

ប្រែសម្រួល៖ មុន្នី រម្យ ប្រភព៖ marca