ក្រុមកីឡាបាល់ទះកម្ពុជា ចេញដំណើរទៅហាត់នៅចិនហើយព្រឹកមិញនេះ

2019-07-01 07:36:03
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមបាល់ទះកម្ពុជា បានចេញទៅហ្វឹកហាត់នៅឯប្រទេសចិនហើយនាព្រឹកមិញនេះ ដែលដឹកនាំដោយគ្រូជម្រើសជាតិជនជាតិចិន ដើម្បីហ្វឹកហាត់ និងប្រកួតមិត្តភាពរយៈពេល២ខែជាការត្រៀមប្រកួតស៊ីហ្គេមចុងឆ្នាំនេះ។

រូបភាពហ្វេសបុកផេកបាល់ទះវិសាខា

ដូចទៅនិងការលើកឡើងកន្លងទៅនេះរបស់លោកគ្រូ សាន សុក្រិត ថានៅថ្ងៃទី១ ខែកក្កដា ឆ្នាំ២០១៩ នេះកីឡាករ និងគ្រូចំនួន ២២នាក់ ត្រូវធ្វើដំណើរចេញទៅប្រទេសចិន រយៈពេល២ខែ ដើម្បីហ្វឹកហាត់នៅទីនោះ។

គ្រូជំនួយជម្រើសជាតិខាងលើបន្ថែមទៀតថា ការចេញទៅហ្វឹកហាត់មានទាំងក្រុមឈុតធំ និងក្រុមថ្នាល គោលបំណងនោះគឺចង់ពង្រឹងសមត្ថភាពបន្ថែម កែប្រែចំណុចខ្វះដែលមានកន្លងមក ជាក់ស្ដែងដូចជាកង្វះខាតកាលពេលប្រកួតនៅប្រទេសថៃជាដើម។ ម្យ៉ាងវិញទៀតគឺបានប្រកួតជាមួយក្រុមខ្លាំងៗនៅទីនោះ ជាឱកាសសម្រាប់កីឡាករស្វែងយល់ និងទទួលបានបទពិសោធថ្មីៗថែមទៀត។ ការហ្វឹកហាត់នៅប្រទេសចិននេះក៏ជាការត្រៀមសម្រាប់ការប្រកួតនៅស៊ីហ្គេម ២០១៩ ឯប្រទេសហ្វីលីពីនផងដែរ ទន្ទឹងនិងនេះទៀតនោះគឺដំណើរហ្វឹកហាត់វែងឆ្ងាយឆ្ពោះទៅការប្រកួតនាឆ្នាំ២០២៣ នៅពេលកម្ពុជាធ្វើម្ចាស់ផ្ទះស៊ីហ្គេម។

រូបភាពហ្វេសបុកផេកបាល់ទះវិសាខា

រំលឹកដែរថា កីឡាករ រួមនិងគ្រូបង្វឹកចំនួន២២នាក់របស់ក្រុមកីឡាបាល់ទះកម្ពុជាបានចេញដំណើរទៅប្រទេសចិនហើយកាលពីព្រឹកមិញនេះ។ ពួកគេនឹងវិលត្រលប់មកកម្ពុជាវិញនៅថ្ងៃទី១ ខែកញ្ញា ២០១៩៕

អត្ថបទ៖ នួន ស៊ីណា