តាមពិតអ្នកនិពន្ធទំនុកច្រៀងបទ “សោកនាដកម្ម” ក៏ជាអ្នកនិពន្ធបទ "មាន់ស្រែ" ដែរ!

2019-07-02 02:24:13
ចំនួនមតិ 0 | ចំនួនចែករំលែក 0

ចន្លោះមិនឃើញ

នៅមុននេះបន្តិច មានការចាប់អារម្មណ៍ទៅលើបទចម្រៀងមួយបទមានចំណងជើងថា ”សោកនាដកម្ម” របស់ផលិតកម្មមរតកមេឌៀ ដែលបានទួញថ្ងូររៀបរាប់អំពីភាពសោកសង្រេងទុក្ខសោកគួរឲ្យស្រណោះ ដែលជាសំណល់សល់ពីព្រឹត្តិការណ៍បាក់រលំអគារនៅខេត្តព្រះសីហនុ។ មកដល់ថ្ងៃនេះ ទើបធ្លាយពីសមាសភាពអ្នកនៅពីក្រោយ ដែលលោកក៏ជាអ្នកនិពន្ធបទ "មាន់ស្រែ" ដ៏ល្បីរបស់កញ្ញា រ៉ាប៊ី ដែរ។

អ្នកនិពន្ធទំនុកច្រៀងនេះត្រូវបានគេស្គាល់ថាជាលោក សយ រតនា ក៏ជាតារាចម្រៀងប្រចាំផលិតកម្មនេះផងដែរ។លោក សយ រតនា ត្រូវបានអ្នកសិល្បៈពិសេសតារាចម្រៀងស្គាល់ច្រើនព្រោះតែលោកធ្លាប់និពន្ធបទចម្រៀងជាច្រើនសម្រាប់តារាល្បីៗមួយចំនួននៅផលិតកម្ម ថោន ពិសេសបទ "មាន់ស្រែ” ដែលបានជួយឲ្យប្រជាប្រិយភាពកញ្ញា រ៉ាប៊ី ត្រូវបានលើកកម្ពស់មួយកម្រិតទៀត។

សយ រតនា ក៏ត្រូវបានទទួលស្គាល់ថាជាអ្នកនិពន្ធវ័យក្មេងមានសមត្ថភាព និងបានធ្វើឲ្យគេចាប់អារម្មណ៍ក្នុងមួយរយៈពេលចុងក្រោយនេះ ក្រោយពីលោកបាននិពន្ធបទចម្រៀង សោកនាដកម្ម” ដែលធ្វើឲ្យអ្នកស្ដាប់ស្ទើរទប់ទឹកភ្នែកមិនបាន។នេះ ជាបទចម្រៀងលំនាំបទមរតកដើមមានចំណងជើងថា “កតញ្ញូ” ដោយបានធ្វើឲ្យអ្នកស្ដាប់ ស្ដាប់ហើយ ស្ទើរតែស្រក់ទឹកភ្នែក អមដោយខ្លឹមសារ និងរូបភាពដ៏គួរឲ្យខ្លោចផ្សា។

បទចម្រៀងខាងលើនេះ ត្រូវបានចូលរួមច្រៀងដោយតារាចម្រៀង៩រូបក្នុងផលិតកម្មមរតកគឺ លោក នាង ប្រាក់សុគន្ធ កញ្ញា ដានីកា លោក សយ រតនា នាយ ព្រែក អ្នកស្រី ចាន់ធឿន លោក សុភ័ស កញ្ញា សុវណ្ណរ័ត្ន កញ្ញា គ្រីប លក្ខិណា និង លោក ណាវ៉ាត់។

តាមសាវតារខ្លះៗ លោក សយ រតនា ធ្លាប់បាននិពន្ធបទចម្រៀងឲ្យស្ទើរគ្រប់ផលិតកម្ម ក្នុងនោះនិយាយតែចំពោះ ផលិតកម្ម ថោន លោកបានប្រាប់ថា ធ្លាប់និពន្ធឲ្យ មិនក្រោម៥០បទនោះទេ។ បទដែលទទួលបានការគាំទ្រច្រើនមានដូចជាបទ "កុលាបពុលដី” ដែលច្រៀងដោយលោក កែវ វាសនា បទ "បំពេម្ដាយ” របស់ កញ្ញា មាស សុខសោភា បទ "អ្នកណាឲ្យអូនទៅ” របស់លោក ខេម បទ “មាន់ស្រែ” និងបទ "លុយលុយ” របស់កញ្ញា រ៉ាប៊ី ជាដើម៕

អត្ថបទ៖ ទារិកា