បទចម្រៀងវៀតណាមទើបចេញថ្មី សាងបានសមិទ្ធផលធំៗជាច្រើន

2019-07-04 04:07:07
ចំនួនមតិ 0 | ចំនួនចែករំលែក 0

ចន្លោះមិនឃើញ

បទចម្រៀងថ្មីមួយរបស់តារាចម្រៀងវៀតណាម Sơn Tùng M-TP ច្រៀងរួមគ្នាជាមួយតារាល្បីលំដាប់ពិភពលោក Snoop Dogg ចំណងជើងថា "Give It To Me” កំពុងធ្វើឲ្យប្រជាជនវៀតណាមមានមោទកភាពជាខ្លាំង ព្រោះបទនេះបង្កើតបានសមិទ្ធផលធំៗជាច្រើន។

វីដេអូចម្រៀងនៃបទនេះ បានចេញផ្សាយលើបណ្ដាញ YouTube កាលពីថ្ងៃ ១ ខែកក្កដា ដោយចេញផ្សាយជាលក្ខណៈ Premiere។ ក្នុងការ Premiere នេះ វាអាចប្រមូលចំនួនអ្នកទស្សនាបានដល់ទៅ ៦៣៥ ០០០ នាក់ ក្លាយជាវីដេអូ YouTube Premiere ដែលមានអ្នកទស្សនាច្រើនជាងគេលំដាប់លេខ ៣ នៅពីក្រោយបទចម្រៀង "thank u, next” របស់ Ariana Grande (៨២៩ ០០០ នាក់) និងបទ "Kill This Love” របស់ BLACKPINK (៩៧៩ ០០០ នាក់)។

ជាងនេះទៅទៀត វាអាចឡើងទៅកាន់ផ្នែក Trending (វីដេអូពេញនិយម) លើ YouTube នៅវៀតណាមដោយជាប់លេខ ១ ហើយក៏ជាប់លេខក្នុងប្រទេសធំៗជាច្រើនទៀតដូចជាជាប់លេខ ១ នៅកូរ៉េខាងត្បូង, លេខ ១ នៅអូស្ត្រាលី, លេខ ៨ នៅសហរដ្ឋអាមេរិក, លេខ ៣ នៅកាណាដា, លេខ ៤ នៅតៃវ៉ាន់, លេខ ៩ នៅអាល្លឺម៉ង់ និងសិង្ហបុរី, លេខ ១៩ នៅអង់គ្លេស, លេខ ៤៩ នៅសាធារណរដ្ឋឆេក។

ក្នុងរយៈពេល ២៤ ម៉ោង វីដេអូចម្រៀងបែបកន្ត្រាក់អារម្មណ៍នេះ ប្រមូលចំនួនទស្សនាបាន ២៣,៥ លានដង ហើយគិតត្រឹមពេលនេះ (ព្រឹកថ្ងៃទី ៤ ខែកក្កដា) វាមានចំនួនទស្សនាជាង ៤០ លានដងឯណោះ៕